Job
6 Job chachajj akham sasaw arsurakïna:
2 “¡Taqe llakinakajajj+ pestʼatakïspa,
jan waltʼäwijamp chik balanza patjjar uchasispa!
3 Jichhasti taqe ukanakajj lamar qotanakan utjki uka chʼallanakat sipans jukʼamp jathiwa.
Ukatwa nayajj jan suma amuytʼat arunak arsta.+
4 Taqe Chʼamani Diosaw flechanakapamp flechtʼitu,
uka flechanakan venenop jichhajj umaskarakta.+
Diosat jutki uka wali ajjsarañanakaw naya contra saytʼasipjje.
5 ¿Salvaje asnonakajj+ pastonïkasat wararipjjani?
Jan ukajj ¿pastonïkasat mä torojj wararini?
6 ¿Jan saborani manqʼajj jan jayun manqʼasispati?
Jan ukajj ¿malva alin llawsapach saboranïspa?
7 Janiw nayajj ukanak llamktʼañ munkti.
Ukanakasti nayatakejj tʼamantat manqʼar uñtatawa.
8 ¡Kuntï nayajj maykta ukajj phoqasikispa,
kuntï munkta uk Diosajj churakitaspa!
9 ¡Diosajj nayar tukjakitaspa,
amparap loqatatasajj nayar tukjakitaspa!+
10 Ukaw nayarojj chuymachtʼitaspa.
Wal usuyaskasas kusisiñatwa thoqtirista,
kuna laykutejj Santo Diosan+ arunakap janiw nayajj ukhamak apanukkti.
11 ¿Nayajj suytʼaskakiñatakejj chʼamanïtti?+
¿Kuna sumarak nayatak utjaspasti, ukhamat nayan jakaskakiñajataki?
12 ¿Nayan chʼamajajj mä qarqar* uñtatati?
Jan ukajj ¿nayan jañchijajj cobret luratacha?
13 ¿Kunjamatsa naya pachpajj yanaptʼasirïsta,
jan khiti yanaptʼiri utjipansti?
14 Kawkïritejj jaqe masipar munasiñat jan jaytjasiñamp jan uñjki ukajja,+
Taqe Chʼamani Diosar ajjsarañ apanukjjarakiwa.+
15 Pachpa amigonakajas* janiw confiykañäjjeti,+ juyphipachan jalir umanakaruw tukupjje,
kunjamtï juyphipachan jalir umanakajj wañantki ukhama.
16 Uka jalir umanakajj chhullunkayampiw qoñchupti,
uka manqhanwa khunus chullurjjaraki.
17 Ukampis waña pachan janiw umanëjjeti, chhaqtjjarakiwa.
Kunapachatï caloräjje ukhajj wañantjjapjjewa.
18 Thakipajj maysaruw saranukjje,
chʼusa pampar purisajj ina chʼusarukiw tukusjje.
19 Temá+ lugarat walja gruponak viajirinakaw uka umanak thaqapjje,
20 Jupanakasti jan payachasis um thaqasajj phenqʼachataw uñjasipjje,
uka cheqakam purisajj chuymas pʼakintataw uñjasipjje.
21 Cheqas jumanakajj ukhamäpjjtaw nayatakejja.+
Nayan ajjsarkañ jan waltʼäwij uñjasajj wal sustjasipjjtajja.+
22 ¿Kuncha nayajj jumanakar mayipjjsma?
Jan ukajj ¿walja utjirinakamatcha kuns wajjtʼasipjjsma?
23 ¿Mä enemigon amparapatti salvatäñ mayipjjsma?
Jan ukajj ¿tʼaqesiyapkitu ukanakatcha salvatäñ mayipjjsma?
24 Kuns nayajj lurta uk sapjjeta, nayajj janiw kamskäsa.+
Pantjasitaj amuyañatak yanaptʼapjjeta.
25 ¡Maynin cheq arsutapajj janiw ustʼayaskiti!+
Ukampis ¿jumanakan cheqañchatanakamajj kuna walirakisti?+
26 ¿Arunakaj cheqañchañti thaqasipkta?
¿Jan kuns kamachtʼirjamäki,+ arunakapas thayan apatäjjaraki uka jaqen arunakapa?
27 Khitin esclavopänis uk yatiñatakejj ¡jumanakajj mä wajchatak* suertenak willtapjjasma!+
¡Pachpa amigonakamarus aljantapjjasmawa!*+
28 Jichhajj kutikipstanipjjam, uñkatapjjarakita,
janiw nayajj pachpa ajanunakaman kʼariskiristti.
29 Mirä amp suma, mayamp amuytʼapjjam, jan nayar juzgasajj pantjasipjjamti.
Jïsa, mayamp amuytʼapjjam, nayajj janiw kuna jan wals lurkti.*
30 ¿Kunatsa jumanakajj jan wals parlkirista ukham amuyapjjta?
¿Janit kunatsa jan waltʼäwin uñjasta ukajj nayatak qhanäki?