Génesis
48 Ukanak pasatatjja Josearojj akham sasaw yatiyapjjäna: “Tatamajj usuntatawa” sasa. Ukatwa Joseajj Manasés ukhamarak Efraín+ pä wawanakapar irpjjarusajj Jacobun ukar saräna. 2 Ukatjja Jacoburojj akham sasaw yatiyapjjarakïna: “José yoqamaw juman ukar jutatayna” sasa. Ukatwa Jacobojj* chʼamachtʼasisajj ikiñapan qontʼasïna. 3 Ukatsti akham sasaw Josear sarakïna:
“Taqe Chʼamani Diosaw Canaán oraqenkir Luz markan nayar uñstitu, ukanwa bendisirakitu.+ 4 Akham sasaw jupajj situ: ‘Walja wawanakanïyätawa, waljaruw tukuyäma, walja markanakaruw tukuyarakïma,+ aka oraqsa walja tiempotakiw wawanakamar churäjja’+ sasa. 5 Egipto markan jumatak naskäna uka pä wawanakamajj nayankjjewa,+ Egipto markar juman ukar janïr nayajj jutkayäta ukhaw uka pä wawanakamajj nasipjjäna. Kunjamtï Rubenasa Simeonas nayankkejja, ukhamarakiw Efrainasa Manasesas nayankani.+ 6 Ukampis pä wawanakam qhepat nasipkani uka wawanakajj jumankaniwa. Efrainampi Manasesampi herenciat katoqapkani+ uka oraqetjja jupanakajj katoqapjjarakiniwa. 7 Kunapachatï nayajj Padán oraqet jutaskayäta ukhaw Raquel mamamajj naya jakʼan jiwjjäna,+ Canaán oraqena. Efrat markar puriñatakejj wali jayaw faltaskäna, ukatwa juparojj Efrat,+ mä arunjja Belén+ markar sarki uka thaki jakʼar imtʼjjayäta” sasa.
8 Ukatjja Israelajj Josean wawanakapar uñjasajj akham sasaw jisktʼäna: “¿Jupanakat wawanakamajja?” sasa. 9 Joseajj awkipar sarakïnwa: “Jïsa, jupanakajj wawanakajawa, Diosaw jupanakarojj aka lugaran churitu”+ sasa. Israelajj sarakïnwa: “Mirä amp suma, jupanakar bendisiñajatak nayan ukar apanim”+ sasa. 10 Israelajj chuymanëjjatap laykojja nayrapajj juyktʼatäjjänwa, janirakiw sum uñjañ puedjjänti, ukatwa Joseajj wawanakaparojj awkipar jakʼachasiyäna. Israelasti jupanakarojj jampʼattʼänwa, qhomantarakïnwa. 11 Israelajj Josearojj akham sarakïnwa: “Janiw nayajj jumar wasitat uñjañ suykayätti,+ ukampis Diosajj wawanakamar kunaw uñjayitu” sasa. 12 Ukatjja Israelan qonqorinakap jakʼat wawanakapar irpaqasajja, oraqer puriñkamaw Joseajj altʼasïna.
13 Ukatjja Joseajj pä wawanakaparuw awkipan ukar jakʼachasiyäna. Efraín+ wawaparojja kupi amparapampiw Israelan chʼeqa ladopar uchäna, Manasés+ wawaparusti chʼeqa amparapampiw Israelan kupi ladopar ucharakïna. 14 Ukampis Efrainajj sullkäkchïnsa jupan pʼeqepjjaruw Israelajj kupi amparapamp loqjjatäna, chʼeqa amparapampisti Manasesan pʼeqepjjaruw loqjjatarakïna. Israelajj Manasesan jilïr wawätap yatiskchïnsa,+ amanutwa* amparanakapamp ukham loqjjatäna. 15 Ukatjja Israelajj akham sasaw Josear bendisïna:+
“Kawkïr cheqpach Diosampitï Abrahán nayra awkijasa Isaac awkijas sarnaqkäna,+
kawkïr cheqpach Diosatï mä awatirjam taqpach jakäwijan jichhürkam uñjkitu,+
16 kawkïr Diosatï angelap taypi taqe jan walinakat salvkarakitu+ uka Diosay uka pä yoqall wawanakarojj bendispan.+
Jupanakajj nayan sutij apapjjpan, Abrahán nayra awkijan sutipsa Isaac awkijan sutipsa apapjjarakpan,
oraqensa walja wawanakanïpjjpan”+ sasa.
17 Joseatakejja awkipan kupi amparapampi Efrainan pʼeqepjjar loqjjatatapajj janipuniw walïkänti. Ukatwa jupajj awkipan amparapjja Manasesan pʼeqepjjar loqjjatayañ munäna. 18 Joseajj akham sasaw awkipar säna: “Janiy ukham luramtejj papitu, jupaw jilïr wawajja.+ Jupan pʼeqepjjar kupi amparamamp loqjjatam” sasa. 19 Ukampis awkipajj janiw jupar istʼañ munkänti, ukatwa akham säna: “Wawa, uk yatisktwa, nayajj sum yatiskta. Jupajj mä markaruw tukurakini, wali jachʼarakïniwa. Ukampis sullka jilapajj jupat sipansa jukʼamp jachʼäniwa.+ Wawanakapas waljapunïniwa, walja markanakwa uttʼayapjjarakini”+ sasa. 20 Uka urojja Jacobojj jupanakar bendisiskakïnwa,+ akham sasa:
“Kunapachatï israelitanakajj maynit maynikam bendisisipjjani ukhajja, akham sapjjaniwa:
‘Kunjamtï Diosajj Efrainarusa Manasesarus bendiski ukhamarak jumar bendispan’ sasa”.
Ukhamaw Jacobojj Manasesar amparapamp loqjjatañat sipansa Efrainar loqjjatäna.
21 Ukatjja Israelajj akham sasaw Josear säna: “Nayajj jiwañampëjjtwa,+ ukampis Diosaw jumanakampïskani, juparakiw nayra awkinakaman oraqeparus kuttʼayjjapjjätam.+ 22 Uka oraqetjja jilanakamat sipansa jumaruw nayajj jukʼamp jil churjjsma, espadajampi flechtʼañ arcojampiw uka oraqjja amorreonakat nayajj aparta” sasa.