Jeremías
29 Akajj Jeremías profetajj apaykäna uka cartan arunakapawa, jupajj Jerusalenatwa yaqha markar apatäpkäna uka taypinkir ancianonakampiru, sacerdotenakampiru, profetanakampiru, taqpach markampir apayäna. Jupanakarusti Nabucodonosor reyiw Jerusalenat Babiloniar apäna, 2 kunapachatï Jeconías+ reyisa, reyin mamapasa,+ palacion trabajir jilïrinakasa, Judá markampin Jerusalén markampin principenakapasa, artesanonakasa, metalamp trabajirinakasa* Jerusalén markat sarjjapjjäna uka qhepat apayäna.+ 3 Jupajj Safán+ chachan Elasá sat yoqap taypi ukhamarak Hilquías chachan Guemarías sat yoqap taypiw uka carta apayäna, uka chachanakaruw Judá markan Sedequías+ reyipajj Babilonia markan Nabucodonosor reyipan ukar Babiloniar khitäna. Uka cartanjja akham sänwa:
4 “Israelan Diosapäki uka ejercitonakan Jehová Diosapajj yaqha markar apatäpki taqe uka jaqenakarojja, Jerusalén markat Babiloniar apayki ukanakarojj akham siwa: 5 ‘Utanak lurasipjjam, ukan jakapjjarakim. Achunak churiri alinak ayrusipjjam,* achunakapat manqʼapjjarakim. 6 Casarasipjjam, yoqanakanïpjjam, phuchanakanïpjjam. Yoqanakamarojj casarapjjam, phuchanakamarojj casarapjjarakim, ukhamatwa jupanakajj yoqanakanïpjjani phuchanakanïpjjani. Ukansti waljanir tukupjjam, jan jukʼaptapjjamti. 7 Kawkïr markarutï nayajj preso apayapksma uka markan sumankañap thaqapjjam, uka markatakejj Jehová Diosar oración lurapjjarakim, uka markan sumankañ utjatapatjja jumanakajj sumankapjjarakïtawa.+ 8 Kuna laykutejj Israelan Diosapäki uka ejercitonakan naya Jehová Diosapajj akham sistwa: “Jumanak taypin utjki uka profetanakampis yatirinakampis jan engañayasipjjamti,+ samkasipki uka samkanakapsa jan istʼapjjamti. 9 Kuna laykutejj ‘nayan sutij-jjaruw jupanakajj kʼari profecianak arsusipktamjja. Nayajj janiw jupanakar khitankti’,+ sistwa naya Jehová Diosajja”’”.
10 “Jehová Diosajj akham siwa: ‘Babilonia markankapjjatamajj 70 maranak phoqasjjani ukhajja, nayaw jumanakarojj uñtanipjjäma,+ jumanakar aka lugarar mayamp kuttʼayanisaw promesa arunakaj phoqäjja’+ sasa.
11 ”‘Kunanaktï nayajj jumanakatak amtkta ukanak sum yatta’, siw Jehová Diosajja, ‘nayajj jumanakar sumankañ churapjjäma, janiw jan waltʼañ churapkämati.+ Nayajj mä suytʼäwi jutïritak churañ munapjjsma.+ 12 Jumanakasti nayaruw jawsapjjetäta, nayaruw oracionan mayisipjjetäta, nayasti jumanakarojj istʼapjjämawa’.+
13 ”‘Jumanakajj thaqapjjetätawa katupjjarakitätawa,+ kuna laykutejj taqe chuymaw nayar thaqapjjetäta.+ 14 Nayasti jumanakampejj katuyasïwa’,+ siw Jehová Diosajja. ‘Yaqha markan katuntatäpkta ukat kuttʼayanjjapjjämawa, jumanakarojj anatatapksma taqe uka markanakatsa taqe lugaranakatsa apthapipjjämawa’,+ siw Jehová Diosajja. ‘Ukatsti kawkjattï preso katuntat apayapksma uka lugararuw kuttʼayanjjapjjarakïma’.+
15 ”Ukampis jumanakajj akham sapjjtawa: ‘Jehová Diosajj profetanak Babilonia markan saytʼayarapistu’ sasa.
16 ”Jehová Diosajj akham siw Davidan tronopar qontʼaski uka reyirusa,+ Jerusalén markan jakiri taqe jaqenakarusa, kawkïri jilanakamatejj jumanakamp chika yaqha markar jan apatäpkäna ukanakaru: 17 ‘Ejercitonakan naya Jehová Diosapajj akham sistwa: “Nayajj jupanak contraw espadampi, manqʼat pistʼañampi, usumpi*+ apayasinkta, jupanakarojj ñusat* higonakar uñtasit tukuyäjja, sinti jan walïtap laykojj janiw manqtʼañjamäkaniti”’.+
18 ”‘Nayajj espadampi,+ manqʼat pistʼañampi, usumpiw* jupanakar arknaqäjja, oraqenkir taqe reinonakatakejj* wali ajjsarkañaruw tukuyäjja,+ kawki markanakarutï jupanakar anatatkä uka markanak taypinjja, mä maldicionaru, wali musparkañaruw tukuyäjja, jupanakat khuyusipjjañapataki,+ jupanakar jiskʼachapjjañapataki,+ 19 nayar serviri profetanakajamp apayankta uka arunakaj jan istʼapjjatap layku’, sistwa naya Jehová Diosajja, ‘jupanakarojj kutin kutiniw khitanirakiyäta’.*+
”‘Ukampis jumanakajj janiw istʼapkayätati’,+ sistwa naya Jehová Diosajja.
20 ”Ukhamasti naya Jehová Diosan aruj istʼapjjam, jumanaka, yaqha markar taqe apatanaka, khitinakarutï nayajj Jerusalén markat Babilonia markar apaykta ukanaka. 21 Nayan sutij-jjaru kʼari profecianak arsusipki+ uka Colaya chachan Acab yoqapatsa Maaseya chachan Sedequías yoqapatsa akham siw Israelan Diosapäki uka ejercitonakan Jehová Diosapajja: ‘Babilonia markan Nabucodonosor* reyipan amparaparuw jupanakar katuyäjja, jupasti jumanakan uñjkataw jupanakar jiwarayani. 22 Kunanakatï uka chachanakar paskani ukajja, Judá markat Babilonia markar apatäpki ukanakajja maldicionanakapanwa jupanakar aytasipjjani. Jupanakasti akham sapjjaniwa: “¡Kunjamtï Sedequías chachampiru Acab chachampir lurki uka kikparak Jehová Diosajj jumar lurpan, Babilonia markan reyipaw jupanakarojj ninar kankantäna!” sasa. 23 Kuna laykutejj uka chachanakajj phenqʼaskañwa Israel markan sarnaqapjjäna,+ jaqe masinakapan warminakapampi adulterio jucha lurasaw sarnaqapjjäna, nayan sutij-jjarojj kʼari arunak parlapjjaraki, janiw nayajj ukanak ordenkayätti.+
”’“Nayaw uk yatta, nayarakiw ukat testigötjja”,+ siw Jehová Diosajja’”.
24 “Nehelam lugarankir Semaya+ chacharojj akham sarakïtawa: 25 ‘Israelan Diosapäki uka ejercitonakan Jehová Diosapajj akham siwa: “Jumajj Jerusalén markankapki uka jaqenakarusa, Maaseya chachan Sofonías+ sat yoqapäki sacerdotëkaraki uka chacharusa, taqe sacerdotenakarus juman sutimjjaruw cartanak akham sas apaytajja: 26 ‘Juma Sofonías chacharojj Jehová Diosaw Jehoiadá sacerdote lantejj sacerdotet uttʼaytamjja, Jehová Diosan utapan supervisoräñamataki, ukhamat kawkïritejj profetätwa siski uka loqhe jaqerojj cepor* uchañamataki.+ 27 Ukhamajj ¿kunatsa jumajj profetätwa sapktam uka Anatot+ markankir Jeremías profetarojj jan toqenoqkta?+ 28 Jupajj Babilonia markarus akham sasaw aka yatiyäwi apayanipjjetu: “¡Walja tiempow jumanakajj yaqha markankapjjäta! Utanak lurasipjjam, ukan jakapjjarakim. Achunak churiri alinak ayrusipjjam,* achunakapat manqʼapjjarakim...”+ sasa’”’”.
29 Kunapachatï Sofonías+ sacerdotejj Jeremías profetan istʼkat uka carta liytʼäna ukhajja, 30 Jehová Diosajj akham sasaw Jeremiasar säna: 31 “Yaqha markar apatäpki ukanakarojj akham sasin qellqam: ‘Jehová Diosajj akham siw Nehelam lugarankir Semaya chachatjja: “Janis nayajj Semaya chachar khitankstjja, jupajj profecía arunak jumanakar parlapjjtamjja, ukatsti kʼari arunakar confiyapjjañamatakiw parlapjjaraktamjja,+ 32 ukhamasti naya Jehová Diosajj akham sistwa: ‘Nayajj Nehelam lugarankir Semaya chacharus jupat jutirinakarus castigäwa. Aka markanjja janiw ni mä chachas familiapat jiltʼkaniti. Jupajj janiw kuna sumanaktï markajatak lurkä uk uñjkaniti’, sistwa naya Jehová Diosajja, ‘kuna laykutejj naya Jehová Dios contra saytʼapjjañapatakiw jupajj chʼamañchi’ sasa”’”.