Isaías
58 “¡Wali jachʼat arnaqasim, arnaqasiskakim!
Mä pututur uñtat jachʼat arnaqasim.
Markajarojj naya contra saytʼasitapat qhanañcham,+
Jacobun utapankirinakar juchanakap qhanañcham.
2 Jupanakajj sapüruw nayar thaqapjjetu,
thakinakaj uñtʼañ walsa gustkaspa ukhamwa parlapjje,
cheqapar sarnaqer markäpkaspas ukhamwa parlapjje,
janis Diosapan leyinakap jaytanukupkaspa ukhamwa parlapjje.+
Diosar jakʼachasiñajj wals gustkaspa+
ukhamwa jupanakajj cheqaparjam juzgañajatak mayipjjetu, akham sasa:
3 ‘Nanakajj ayunapjjta ukhajj ¿kunatsa jumajj jan uñjkta?+
Nanakajj humillasipjjta ukhajj ¿kunatsa jumajj jan uñjkta?’+ sasa.
Nayajj akham sarakiyätwa, jumanakajj ayunapkta uka urojj munañanakamakwa thaqapjjtajja,
trabajirinakamarus tʼaqesiyapjjtawa.+
4 Ayunapkta ukhajja nuwasiñanakampi toqesiñanakampikiw utji,
jumanakajj jan sinttʼasisaw chʼakuntapjjaraktajja.
Kunjamtï aka urun lurapkta ukham ayunasajja, janiw arunakam alajjpachan istʼasiñap suyapkasmati.
5 ¿Nayajj mayipksma uka ayunojj akhamäñapati?
¿Humillasiñ mä urjamäñapati?
¿Altʼat mä cañar uñtat pʼeqe altʼasiñ urjamäñapati?
¿Llakisiñ isi* patjjaru, qhella patjjaru winktʼasiñ urjamäñapati?
¿Ukarut jumajj ayunowa, Jehová Diosar kusisiyir uruwa sasin sista?
6 Janiw nayajj uk maykti. Nayajj maykta uka ayunojj akhamäñapawa:
yaqhanakar tʼaqesiyir cadenanak apaqapjjam,
yukunakan chinuñanakap apaqapjjam,+
tʼaqesitanakar libre jaytapjjam,+
taqpach yukunaksa chika taypit pʼakjapjjam,
7 manqʼat awtjatanakampi tʼantʼam compartipjjam,+
pobrenakarusa jan utani jaqenakarus utamar katoqapjjam,
jan isinïpki ukanakar isthapiyapjjam,+
familirianakamar jan rechazapjjamti.
8 Ukhamatwa qhanamajj qhantatir uñtat qhantʼani,+
ratukiw jumajj waliptjjarakïta.
Justiciajj juma nayraqataw sarani,
Jehová Diosan kʼajkiripajj juma qhepwa sararakini.+
9 Ukatjja jumajj jawsätawa, Jehová Diosasti jaysaniwa,
yanap mayiñatakiw artʼasïta, jupasti ‘¡akankasktwa!’ sarakiniwa.
Jumatï yuku juma taypit apaqäta,
janirak lukʼanampis señaltʼjjäta, janirak jan wali amtamp parljjäta,+
10 jumatï manqʼat awtjatanakar kuntï jumajj munkta uk churäta,+
tʼaqesiyatäpki ukanakarus kunatï faltki ukanak churarakïta ukhajja,
qhanamajj chʼamakansa qhantʼaniwa,
chʼamakamas chika urjamäniwa.+
11 Jehová Diosajja jumarojj irpaskakïtamwa,
waña oraqensa kunatï wakiski ukjja churätamwa,+
chʼamañchtʼarakïtamwa,
jumajj suma regat mä jardinar uñtasitayätawa,+
jan wañtʼir uma jalsur uñtasitayätawa.
12 Juma laykuw nayra laqayanakajj wasitamp saytʼayatäni,+
jumaw nayra tiempon jakir jaqenakan cimientonakap wasitamp saytʼayäta.+
Qʼala tukjat murallanak askichiri sapjjätamwa,+
thakinak mayamp askichiri sapjjarakïtamwa, ukhamat uka thakinak jakʼan jaqenakajj jakapjjañapataki.
13 Jumatï sábado uru respetatam layku sagrado urujan munañanakam jan thaqkäta,+
sábado ururojj wali kusisiñ urjam uñjäta, Jehová Diosan sagrado uruparjam uñjäta, importante urut uñjarakïta,+
munañanakam thaqañat sipansa chʼusa arunak parlañat sipansa sábado uru jachʼañchäta ukhajja,
14 Jehová Dios laykojj wal kusisïta,
oraqen utjki uka alto lugaranakapwa apnaqäta.+