1 Crónicas
28 Ukatjja Davidajj Israelan taqe principenakaparuw Jerusalén markan tantachtʼäna: tribunakan principenakaparu,+ reyir servipkäna uka gruponakan comandantenakaparu, 1.000 chachanakar pʼeqtʼirinakaru, 100 chachanakar pʼeqtʼirinakaru,+ David reyimpin yoqanakapampin+ taqe utjirinakapampit vacanakapampit encargatanakaru,+ palacion trabajir jilïrinakaru ukhamarak wali chʼamani jan ajjsariri chachanakaruw tantachtʼäna.+ 2 Ukatjja David reyejj saytʼasisaw akham säna:
“Jilatanaka, nayan markaja, istʼapjjeta. Jehová Diosan pactor mantat arcapatakisa Diosasan kayu taktʼasiñapatakis+ nayaw chuymajan mä uta lurañ munayätjja, nayarakiw uka uta lurañatakejj wakichta.+ 3 Ukampis cheqpach Diosajj akham situwa: ‘Jumajj guerranakan nuwasir chachätawa, wilsa wartaraktawa,+ janiw jumajj sutij jachʼañchañatakejj mä uta lurarapkitätati’+ sasa. 4 Ukampis Israelan Jehová Diosapaw nayarojj tatajan utapat ajllisitu, ukhamat Israel markar reyit wiñay apnaqañajataki,+ kuna laykutejj Judá triburuw pʼeqtʼañapatak ajlli,+ Judá tributsti tatajan familiaparuw ajlliraki,+ tatajan yoqanakapatsti nayaruw ajllisirakitu, ukhamat Israel markpachar reyit uttʼayañataki.+ 5 Jehová Diosaw nayarojj walja yoqanakampi bendisitu,+ taqe uka yoqanakaj taypitwa Salomón+ yoqajar ajlliraki, ukhamat Jehová Diosan tronopan qontʼasisajj Israel markar apnaqañapataki.+
6 ”Jupajj akham situwa: ‘Salomón yoqamaw utajampi pationakajampi lurarapitani, nayaw juparojj yoqajäñapatak ajllista, nayasti jupan tataparakïyäwa.+ 7 Jupatejj kunjamtï jichhajj luraski ukham nayan mandamientonakajsa kunanaktï nayajj Juezjamajj amtkta ukanaksa,+ jan payachasis phoqani ukhajja, nayaw jupan reinop* wiñayatak sum uttʼayäjja’+ sasa. 8 Ukatwa nayajj kawkïritejj Jehová Diosan congregacionapäki uka Israel marka nayraqatan akham sista, Diosasas istʼaskarakiwa: Jehová Diosan mandamientonakap thaqapjjam, uñtʼapjjam, phoqapjjarakim, ukhamat suma oraqen jakasipkakiñamataki,+ yoqanakamarus jaya tiempotak herenciat uk jaytapjjañamataki.
9 ”Salomón, nayan yoqaja, tataman Diosapar uñtʼam, juparojj phoqat chuymampi+ suma amtampi servirakim, kuna laykutejj Jehová Diosajj taqpach chuymanakwa+ uñakipaski, jupajj chuyman amuyunakapsa yatiwa.+ Jumatejj jupar thaqätajja, jumampejj katuyasiniwa,+ ukampis jumatejj jupar apanukütajja, jumarojj wiñayatakiw apunukütam.+ 10 Jichhasti wal amuytʼasim, Jehová Diosaw jumarojj mä uta lurañamatak ajllistamjja, ukhamat uka utajj santuariopäñapataki. Jumajj jan ajjsaramti, trabajiñ qalltarakim” sasa.
11 Ukatjja Davidajj Salomón yoqaparojj mä plano churäna,+ uka planonwa pórtico+ sat mantañ cheqasa, cuartonakasa, imañ utanakasa, patjjankir cuartonakasa, manqhäjj cuartonakasa, sumankthapiñatak utas* uñstäna.+ 12 Jupasti Jehová Diosan utapan pationakapatsa,+ muytpachan utjkäna taqe uka comedoranakatsa, cheqpach Diosan utapankir wali valoraninak imañ cheqanakatsa, kunanakatï sagrador tukuyatäki* uka wali valoraninak imañ cheqanakatsa,+ kunjamtï Diosan espiritup taypejj katoqkäna taqe ukanak mä planor churäna; 13 gruponakar jaljat sacerdotenakatsa+ levitanakatsa, Jehová Diosan utapan taqe lurañanakapatsa, kunanakatï Jehová Diosan utapan serviñatak wakiski ukanakatsa juparojj ewjjtʼarakïnwa; 14 kunaymanit serviñatakejj kunanakatï apnaqaski uka qorin pesopajj qhawqhänisa, kunaymanit serviñatakejj kunanakatï qollqe metalat luratäki ukanakan pesopajj qhawqhänisa ukanaks sarakïnwa; 15 jupajj qori candelabronakampin+ qori lamparanakapampin pesopajj qhawqhänisa, qollqe candelabronakampin qollqe lamparanakampin pesopajj qhawqhänisa ukanakjja, kunatakis apnaqasini ukarjamaw amtäna; 16 Diosar loqtat tʼantʼanakajj uchaski uka sapa mayni mesanakan qorin pesopajj qhawqhänisa,+ qollqe mesanakan pesopajj qhawqhänisa, 17 jachʼa qori tenedoranakana, qori pʼujru* platonakana,+ suma qori jarranakan pesopajj qhawqhänisa, sapa mayni jiskʼa qori pʼujru platonakampin sapa mayni jiskʼa qollqe pʼujru platonakampin pesopajj qhawqhänis uksa sarakïnwa. 18 Incienso loqtañatak altaratakisa,+ Diosan carropamp saski ukatakisa,+ mä arunjja Jehová Diosan pactor mantat arcap patjjan ayatatat chheqanakapampi chʼiwtʼayki uka qori querubín+ angelanakatakisa, qhawqha suma qoris wakisi uksa sarakïnwa. 19 Davidajj akham sänwa: “Jehová Diosan amparapaw nayjjankäna, jupaw suma amuysa churarakitu, ukhamatwa kuna ewjjanakatï aka uta lurañatakejj utjki+ taqe ukanak qellqantarakta”+ sasa.
20 Ukatsti Davidajj akham sasaw Salomón yoqapar säna: “Jan ajjsaramti, chʼamani saytʼasim, trabajiñ qalltarakim. Jan ajjsaramti ni sustjasimsa, nayan Jehová Diosajaw jumampïski.+ Jupajj janiw jaytjkätamti ni apanukkätamsa,+ kuna lurañanakatï Jehová Diosan utap lurañatak utjki taqe ukanak tukuyasiñapkamaw jumampïskani. 21 Akankasipkiw sacerdote gruponakasa+ levita gruponakasa,+ jupanakajj cheqpach Diosan utapan serviñatakejj listokïpjjarakiwa. Kunaymanin serviñatak qʼapha ukhamarak wakichtʼata trabajirinakas+ utjaraktamwa, principenakas+ markpachas taqpach arunakam phoqapjjarakini” sasa.