Jeremías
52 Sedequías+ chachajj 21 maranïkäna ukhaw reyëjjäna, 11 maranakaw Jerusalén markan reyit apnaqäna. Jupan mamapajj Hamutal+ satänwa, Libná markankir Jeremías chachan phuchaparakïnwa. 2 Sedequías reyejj kunatï Jehová Dios nayraqatan jan walïkäna ukanak luraskakïnwa, kunjamtï Jehoiaquim+ reyejj lurkäna ukhamwa jupajj lurarakïna. 3 Jehová Diosan colerasitap laykuw Jerusalén markansa Judá markansa taqe ukanakajj pasäna, qheparusti Diosajj jupa nayraqatatwa jupanakar apanukjjäna.+ Ukatjja Sedequías reyiw Babilonia markan reyip contra saytʼasïna.+ 4 Sedequías reyejj llätunka maranakaw apnaqaskäna, tunkïri phajjsit tunka urunakaw saraqjjarakïna, ukhaw Babilonia markan Nabucodonosor* sat reyipajj taqpach ejercitopamp Jerusalén contra jutäna. Jupanakajj Jerusalén contraw campamentop saytʼayapjjäna, mä perqampiw markar muyuntapjjarakïna.+ 5 Sedequías reyejj 11 maranak apnaqaskän ukapachkamaw Jerusalenajj muyuntatäskäna.
6 Kunapachatï pusïri phajjsit llätunka urunak saraqaskäna ukhajja,+ manqʼat pistʼañajj walipuniw markan utjäna, markankirinakatakejj janiw manqʼañajj utjkänti.+ 7 Jupanakajj markan murallap qʼasantapjjäna, reyin jardinap jakʼankkäna uka pä perqa taypinkir punku mistusaw taqpach soldadonakajj aruman markat escapjjapjjarakïna, uka horasasti caldeonakajj markaruw muyuntasipkäna. Jupanakajj Arabá toqer sarki uka thaki sarjjapjjarakïna.+ 8 Ukampis caldeonakan ejercitopaw Sedequías+ reyir arktäna, Jericó markan wasar pampa oraqenakan katjapjjarakïna, jupan soldadonakapajj taqpachaniw jupan ukat aywitatjjapjjäna. 9 Ukatsti reyir katuntasajj Hamat oraqenkir Riblá markaruw Babilonia markan reyipan ukar apapjjäna, ukanwa reyejj jupar juchañchäna. 10 Babilonia markan reyipajj Sedequías reyin uñjkataw yoqanakaparojj jiwarayäna, ukatsti Riblá markanwa Judá markan taqe principenakapar jiwarayarakïna. 11 Ukatjja Babilonia markan reyipajj Sedequiasaruw juykhuptayäna,+ cobre cadenanakamp chinuntasaw Babilonia markar apjjarakïna, ukansti jiwañapkamaw preso katuntäna.
12 Babilonia markan Nabucodonosor* reyipajj 19 maranakaw apnaqaskäna, phesqëri phajjsit tunka urunakaw saraqaskarakïna, ukhaw Babilonian reyipan yanapiripäkäna uka Nebuzaradán sat guardianakan jilïripajj Jerusalén markar purïna.+ 13 Nebuzaradán chachajj Jehová Diosan utapsa, reyin utapsa,* Jerusalenankir taqe utanaksa, wali importante jaqenakan utanakapsa phichantänwa.+ 14 Jerusalén markar muyuntkäna uka murallanaksti, guardianakan jilïripamp chikäpkäna uka caldeonakan taqpach ejercitopaw allinuküna.+
15 Nebuzaradán sat guardianakan jilïripajja, humilde jakasir jaqenakat mä qhawqhanimpiru, markan jiltʼapkäna uka jaqenakampiruw preso katuntat apjjäna. Ukatjja Babilonia markan reyip toqet saytʼasjjapjjäna ukanakampiru wali yatjjattʼat artesanonakat jiltʼapkäna ukanakampiruw preso katuntat apasjjapjjäna.+ 16 Ukampis guardianakan jilïripäkäna uka Nebuzaradán chachajja, uka markan wali pobren jakasiri jaqenakarukiw jiltʼayäna, ukhamat jupanakajj uvas yapunakan trabajipjjañapataki ukhamarak yapuchirjam obligat trabajipjjañapataki.+
17 Jehová Diosan utapankir cobret lurat columnanaksa,+ Jehová Diosan utapan utjkäna uka carritonaksa,+ cobret lurat Lamar Qota+ sat uma estanksa jiskʼa jiskʼa caldeonakajj tʼunjapjjäna, ukatjja Babiloniaruw uka cobre taqpach apasjjapjjäna.+ 18 Qhellatak baldenaksa, lampanaksa, pabilonak khuchoqañatak tijeranaksa, pʼujru* platonaksa,+ copanaksa,+ kunanakatï templon serviñatak cobret luratäkäna ukanaksa apasjjapjjarakïnwa. 19 Guardianakan jilïripaw fuentenaksa,+ braserillonaksa, pʼujru* platonaksa, qhellatak baldenaksa, candelabronaksa,+ copanaksa, suma qorita suma qollqet lurat pʼujru platonaksa apasjjäna.+ 20 Salomón reyejj Jehová Diosan utapatak pä columnanakampi, Lamar Qota sat uma estanquempi, Lamar Qota sat uma estanquet manqha toqenkkäna uka cobret lurat 12 toronakampi,+ carritonakampi lurkäna taqe uka cobrejja, waljätapat qhawqhas pesäna ukajj janiw yatiñjamäkänti.
21 Columnanakasti, sapa mä columnajj altorojj kimsaqallqo metronïnwa,* phesqa metrots jila* mediñatak mä pitampiw* muytpachajj midtʼasispäna,+ uka columnan cobrepajj pusi lukʼana* ukchʼa thurünwa,* phusarakïnwa. 22 Columna patjjar uchat capitel* sat adornojj cobret luratänwa, altorojj 2 metro 20 centimetronïnwa.*+ Capitel muytpachar uchat granada frutanakar uñtasit adornonakasa mallapasa cobret luratkamakïnwa. Payïr columnajj maynïr columna kikpa luratarakïnwa, granada frutanakar uñtasitanakas ukhamaraki. 23 Ladonakanjja 96 granada frutanakar uñtasit adornonakaw utjäna, taqpachajj 100 granada frutanakar uñtasitanakaw mallar muytäna.+
24 Guardianakan jilïripajja, Seraya+ sat jilïr sacerdoterusa, Sofonías+ sat payïri sacerdoterusa, kimsa porteronakarus katuntarakïnwa.+ 25 Ukatsti jupajj akanakaruw markat apasïna: soldadonakan comandantepäkäna uka palacion trabajir jilïriru, markankasipkäna uka reyin paqallqo amuytʼayirinakaparu, ejército pʼeqtʼirin secretariopäkäna, mä arunjja ejercitotak markankir jaqenak tantachtʼirïkäna uka jaqeru, markan jiltʼapkäna uka 60 aleq jaqenakampiru. 26 Nebuzaradán sat guardianakan jilïripasti, jupanakar katuntasajj Riblá markaruw Babilonian reyipan ukar apäna. 27 Babilonian reyipajj Hamat oraqenwa Riblá+ markan jupanakar jiwarayäna. Ukhamaw Judá markajj yaqha markar preso apat uñjasïna.+
28 Nabucodonosor* reyejj paqallqo maranak apnaqaskäna ukhajja, 3.023* judionakaruw katuntat apjjäna.+
29 Nabucodonosor* reyejj 18 maranak apnaqaskäna ukhajja,+ 832 jaqenakaruw Jerusalén markat apäna.
30 Nabucodonosor* reyejj 23 maranak apnaqaskäna ukhajja, guardianakan jilïripäki uka Nebuzaradán chachaw 745 judionakar katuntat apjjäna.+
Taqpachanejj 4.600 jaqenakaw katuntat apatäpjjäna.
31 Ukatsti Judá markan Joaquín+ reyipajj 37 maranakaw preso apatäjjäna, tunka payanïr phajjsit 25 urunakaw saraqjjarakïna, ukhaw Babilonia markan Evil-Merodac sat reyipajj Judá markan Joaquín reyiparojj carcelat apsjjäna. Evil-Merodac chachajj uka maranwa reyëjjäna.+ 32 Jupajj khuyaptʼayasiñampiw Joaquín reyirojj uñjäna, Babilonia markankapkäna uka mayni reyinakan tronopat sipansa jukʼamp jachʼaruw Joaquín reyin tronop aptäna. 33 Ukhamatwa Joaquín reyejj preso isip apsusjjäna, jiwañapkamaw Evil-Merodac reyin mesapan manqʼasirakïna. 34 Jupajj jiwañapkamaw Babilonia markan reyipan arsutaparjamajj taqe jakäwipan sapüru manqʼañ katoqarakïna.