Salmos
Davidan salmopa.
144 Jehová Diosaw nayan Qarqajajja,*+ jupajj jachʼañchatäpan,
jupaw amparanakajarojj nuwasiñatak wakichtʼi,
jupaw lukʼananakajarojj guerratak wakichtʼi.+
2 Jupaw munasiñat jan jaytjasirïtap uñachtʼayitu, jupaw jachʼa perqanakampi muyuntat markajasa,
seguro imantasiñajasa, salvirijasa,
escudojasa, juparuw nayajj imantasta,+
juparakiw apnaqañajatakejj markanak katuyitu.+
3 Jehová Dios Tata, ¿kunarak jaqesti jupar yäqañamatakisti?
¿Kunarak jiwir jaqen yoqapasti jupar istʼañamatakisti?+
5 Jehová Dios Tata, alajjpachanakam altʼayanim,* saraqanirakim,+
qollunakar llamktʼasin jewqʼetatayam.+
6 Lliju llijunak llijtayasin enemigonakar aywitatayam,+
flechanakam taqe toqer flechtʼasin jan kamachtʼirjam jupanakar tukuyam.+
7 Amparanakamjja alajjpachatpach loqatatanim,
salvita, wali colerat umanakatsa salvita,
extranjero jaqenakan amparanakapatsa salvita,+
8 jupanakan lakanakapajj kʼarinakwa parlapjje,
kupi amparanakapsa falso juramento lurañatakiw aytapjje.
9 Dios Tata, nayajj mä machaq canción jumatakejj cantäjja.+
Tunka cuerdanakan instrumentompiw jumar alabanzanak cantäma,*
10 khititï reyinakar atipjayki,*+
khititï jiwayir espadat David serviripar salvki ukaruw nayajj cantäjja.+
11 Extranjero jaqenakan lakanakapajj kʼarinakwa parlapjje,
kupi amparanakapsa falso juramento lurañatakiw aytapjje,
jupanakat salvita, extranjero jaqenakan amparanakapatsa salvita,
12 ukhamatwa yoqall wawanakasajj jankʼak jiltir machaq alinakar uñtasitäpjjani,
imill wawanakasajj mä palaciotak suma lurat esquin columnanakar uñtasitäpjjarakini.
13 Manqʼañanak imañ utanakasajj taqe kasta manqʼañanakampiw jilarani.
Camponkir ovejanakasasa cabranakasas jan jaktʼkañ waljapuniw mirantani.
14 Wallqʼe vacanakasajj janiw kuna jan waltʼäwinsa uñjasipkaniti ni sullsupkanisa,
plazanakasanjja janiw llakisiñat arnaqasiñanakajj utjkaniti.
15 ¡Kawkïr markatejj ukhaman jikjjataski uka markajj kusisitawa!
¡Kawkïr markatejj Jehová Diosat Diosanïki uka markajj kusisitawa!+