Isaías
51 ”Kunatï cheqapäki ukan qhepap saririnaka, istʼapjjeta,
Jehová Diosar thaqerinaka, istʼapjjeta,
jumanakajj apaqatäpkayäta uka qarqat* amtasipjjam,
qala kʼutañ lugarat amtasipjjam, jumanakajj uka lugarat apsutäpjjayätawa.
2 Abrahán awkimat amtasipjjam,
Saratsa+ amtasipjjam, jupaw jumanakarojj ususipjjayätamjja.
Abrahanar nayajj jawskayäta ukhajja, jupajj sapakïnwa.+
Ukatjja nayajj jupar bendisiyätwa, wawanakaparus waljaniruw tukuyarakiyäta.+
3 Jehová Diosaw Sionarojj chuymachtʼani.+
Taqe laqayanakaparus chuymachtʼarakiniwa,+
wasaraparus Edén jardinarjamaw tukuyani,+
wasar pampaparus Jehová Diosan jardinaparjamaw tukuyani.+
Ukanjja wali kusisiñampi kʼuchisiñampiw utjani,
yuspärasiñanakampi suma cancionanakampiw utjarakini.+
4 Nayan markaja, wali atencionamp istʼita,
nayan markaja, istʼita.+
5 Nayan justiciajajj jakʼachasisinkiwa.+
6 Alajjpachanakar uñtapjjam,
oraqer uñtanipjjarakim.
Kuna laykutejj alajjpachanakajj jewqʼer uñtataw chhaqtjjapjjani,
oraqejj isir uñtataw merqʼesirakini,
oraqen jakirinakas chhichhillankhanakjamaw jiwarapjjani.
7 Kunatï cheqapäki uk uñtʼirinaka, istʼapjjeta,
khitinakatï nayan leyij* chuymanakamar katoqapkta+ ukanakajj istʼapjjeta.
Jiwir jaqenakan burlasitanakapat jan ajjsarayasipjjamti,
insultonakapatsa jan ajjsarayasipjjamti.
8 Kuna laykutejj mä thuthaw jupanakarojj isir uñtat thuthantani,
thuthajja chʼankharjamaw jupanakarojj qʼal thuthantani.+
Ukampis justiciajajj wiñayatakïniwa,
salvacionajajj wiñayatakïniwa”.+
9 ¡Sartasim! ¡Sartasim! ¡Jehová Diosan amparapa,+
chʼamampi isthapisim!
Nayra urunakanjam sartasim, nayra tiemponakanjam sartasim.
¿Janit jumajj Rahab*+ ukarojj qʼal tʼunjkayäta?
¿Janit jumajj lamar qotankir jachʼa animalar maysat maysa passuykayäta?+
10 ¿Janit jumajj qotar wañtʼaykayäta, janit jumajj walja umanak wañtʼaykayäta?+
¿Janit jumajj qotankir manqha umanakap mä thakir tukuykayäta, ukhamat salvatanakajj* uknam pasapjjañapataki?+
11 Jehová Diosan salvatanakapajj kuttʼanipjjaniwa.+
Jupanakajj kusisiñampi kʼuchisiñampi phoqtʼatäpjjaniwa,
llakisiñasa llakirtʼasiñasa chhaqtjjaniwa.+
12 “Naya pachpaw jumanakarojj chuymachtʼapjjsmajja.+
¿Kunatarak jumajj jiwir jaqer ajjsarañamäspasti?+
¿Kunatarak qorar uñtat wañsuri jaqen yoqapar ajjsarañamäspasti?
13 ¿Kunatsa Jehová Dios Luririmat armasta?+
¿Kunatsa alajjpachanak isir uñtat janatatki+ ukhamarak oraqen cimientonakap uchki uka Diosat armasta?
Uru jurnälaw tʼaqesiyirin colerasitapat ajjsartajja,
jupajj jumar tukjañatak chʼamanïkaspas ukhama.
¿Jichhajj kawkinkarak tʼaqesiyirin colerasitapasti?
14 Kʼumtʼatanakasa cadenanakampi ñachʼantatanakasa* niyaw librëjjapjjani,+
janiw jiwapkaniti, ni sepulturarus jaqontatäpkaniti,
janirakiw tʼantʼapas faltkaniti.
15 Ukampis nayaw juman Jehová Diosamätjja,
khititï lamar qota onjjtayki, oladanaksa wal sartayki uka Diosätwa,+
nayan sutijajj ejercitonakan Jehová Diosapa satawa.+
16 Lakamaruw nayajj arunakaj usköjja,
amparajan chʼiwipampiw imjjatarakïma,+
ukhamat alajjpachanak uttʼayañataki, oraqen cimientonakap uchañataki,+
ukhamarak Sionar akham sañataki: ‘Jumaw nayan markajätajja’+ sasa.
17 ¡Sartasim! ¡Sartasim! Jerusalén marka, sartasim,+
jumajj Jehová Diosan amparapatwa colerasiñ copapat umtʼtajja.
Jumajj vino copatwa umtʼaraktajja,
liwinaqtayki uka copjja chʼusak jayttajja.+
18 Jupajj ususkäna taqe uka wawanakatjja janiw khitis jupar irpañatakejj ukankkiti,
jupajj uywkäna taqe uka wawanakatjja janiw khitis amparat wayjjarkiti.
19 Aka pä jan waltʼäwinakaw jumjjar jutani.
¡Tukjatäñampi tʼunjatäñampi, manqʼat awtjatäñampi espadampi!+
¿Khitis jumat khuyaptʼayasini?
¿Khitis jumarojj chuymachtʼätam?+
20 Yoqall wawanakamajj desmayjjapjjewa.+
Taqe callenakan esquinanakapanwa jaqosisipki,
trampar jaltʼir animalanakjama.
Jehová Diosan colerasiñapampi phoqtʼatäpjjewa, Diosaman cheqañchäwipampi phoqtʼatäpjjewa”.
21 Mirä amp suma, ak istʼam,
llakisiyat warmi, machantat warmi, ukampis janiw jumajj vinomp machantatäktati.
22 Jehová Dios Tatitumajj akham siwa, mä arunjja markapar arjjatir Diosamajj akham siwa:
“Liwinaqtayir copjja amparamat apaqämawa,+
vino copjja, mä arunjja colerasiñ copaj-jja apaqarakïmawa,
janipuniw mayampis umjjätati.+
23 Jumar tʼaqesiyapktam ukanakan amparaparuw uk uchäjja,+
khitinakatï ‘¡liwnoqtam, ukhamat juma patnam pasañataki!’ sasin sapkayätam ukanakan amparaparuw uk uchäjja,
jumasti jikhanimjja oraqëkaspas ukhamwa tukuyayätajja,
jupanakan sarnaqañ callëkaspas ukhamwa tukuyarakiyätajja” sasa.