Jeremías
23 “¡Ay kunakïkani nayajj awatkta uka ovejanakajar tukjapki anatatapkaraki uka awatirinakatjja!”, sistwa naya Jehová Diosajja.+
2 Ukhamasti markajar awatipki uka awatirinak contrajj akham siw Israelan Jehová Diosapajja: “Jumanakaw ovejanakaj anatatapjjtajja, ananukusipkaktawa, janirakiw sum uñjapktati”.+
“Ukatwa nayajj jan wali luratanakamat jumanakar castigapjjäma”, sistwa naya Jehová Diosajja.
3 “Ukatsti jiltʼir ovejanakajarojj taqe oraqenakar nayajj anatatkta uka oraqenakatwa tantachthapëjja,+ pastonakaparuw anakinjjarakëjja,+ jupanakajj mirtapjjaniwa, waljanëjjapjjarakiniwa.+ 4 Nayajj suma amuyump uñjir awatirinakwa jupanakjjar uttʼayäjja.+ Janiw ajjsarjjapjjaniti, ni sustjasjjapjjanisa, janiw ni mayas faltkarakiniti”, sistwa naya Jehová Diosajja.
5 “Urunakajj jakʼachasisinkiwa”, sistwa naya Jehová Diosajja, “ukhaw nayajj Davidat jutir cheqaparjam uñjir mä reyirojj tronor uttʼayäjja.*+ Jupaw cheqpachans reyit apnaqani,+ suma amuyumpi uñjani, kunatï cheqapäki uks janirakiw oraqen chhaqtaykaniti.+ 6 Jupan urunakapanjja Judá markajj salvatäniwa,+ Israelajj jan kuna llakiniw jakasini.+ Jupajj aka sutinëjjarakiniwa: cheqaparjam uñjañajj Jehová Diosatwa juti”.+
7 “Ukampis urunakajj jakʼachasisinkiwa”, sistwa naya Jehová Diosajja, “ukhaw jupanakajj akham sasin jan parljjapjjaniti: ‘¡Kunjamtï Jehová Diosajj cheqpachapun jakkir Diosäkejja, jupaw Israel markarojj Egipto oraqet apsunïna!’+ sasa. 8 Antisas akham sapjjaniwa: ‘¡Kunjamtï Jehová Diosajj cheqpachapun jakkir Diosäkejja, jupaw Israel markat jutirinakarojj alay toqenkir* oraqetsa jupanakar anatatkäna taqe uka oraqenakatsa apanjjäna!’ sasa. Jupanakasti pachpa oraqepanwa jakapjjani”.+
9 Nayajj profetanakarojj akham sistwa:
Naya manqhanjja chuymajajj pʼakintatawa.
Taqe chʼakhanakajarakiw khatatitu.
Nayajj mä umat jaqjamätwa,
vinomp machjat jaqjamätwa,
Jehová Dios kawsa, sagrado arunakap kawsa.
10 Kuna laykutejj aka oraqejj adulterio jucha luririnakamp phoqantatawa.*+
Jan walinak lurapjje, chʼamapampejj munañaparjamaw kuns lurapjje.
11 “Profetasa sacerdotesa qʼañuchatäpjjewa.*+
Pachpa utajanwa nayajj jan wali luratanakap katjta”,+ sistwa naya Jehová Diosajja.
12 “Ukhamasti thakipajj llustʼäniwa, chʼamakarakïniwa.+
Jupanakajj nuktʼatäpjjaniwa, jaqosipjjarakiniwa.
Kuna laykutejj mä jan waltʼäwi jupanakjjar apanëjja,
castigatäpkani uka marana”, sistwa naya Jehová Diosajja.
13 “Samaria+ markan profetanakapan mä ajjtaskañ uñjta.
Jupanakajj Baal diosan sutipjjaruw profecianak arsupjjäna.
Israel markajarojj maysaruw saranukuyapjjaraki.
14 Jerusalén markan profetanakapansti, sinti jan walinakpun uñjta.
Jupanakajj adulterio jucha lurapjje,+ kʼarinak parlapjjaraki.+
Jupanakajj jan wali luririnakaruw apoyapjje,*
janirakiw jan wali luratanakap jaytapkiti.
Nayatakejj taqe jupanakajj Sodoma markar uñtasitäpjjewa,+
markan jakirinakajj Gomorra markar uñtasitäpjjarakiwa”.+
15 Ukatwa ejercitonakan Jehová Diosapajj profetanak contrajj akham arsu:
“Jupanakarojj ajenjo manqʼayäjja,
venenon um umayarakëjja.+
Kuna laykutejj Jerusalén markan profetanakapajj apostasiampiw* oraq phoqantapjje” sasa.
16 Ejercitonakan Jehová Diosapajj akham siwa:
“Jumanakar profecianak arsuri profetanakan arunakap jan istʼapjjamti.+
Jumanakarojj engañasipktamwa.
Jupanakan pachpa chuymapat mistsuri visionatwa parlasipktamjja,+
janiw kunatï Jehová Diosan lakapat jutki uk parlapktamti.+
17 Khitinakatï jan respetapkitu ukanakarojj kutin kutiniw jupanakajj akham sapjje:
‘Jehová Diosajj akham siwa: “Suman jakasiñaw jumanakatak utjani”+ sasa’.
Jan istʼasir chuymapar arkirinakarojj akham sapjjewa:
‘Janiw kuna jan waltʼäwis jumanakjjar jutkaniti’+ sasa.
18 ¿Khitis Jehová Diosan amigonakap taypinki,
ukhamat arunakap uñjañataki istʼañataki?
¿Khitis arunakap wali amuyump istʼi?
19 Jehová Diosan colerasiñapajj mä jachʼa thayjamaw mistunini.
Mä thaya tutukjamaw muytas muytas jan wali jaqenakan pʼeqepjjarojj saraqanini.+
20 Jehová Diosan colerasiñapajj janiw apjtkaniti,
kuna amtanakatï chuymapan utjki ukanak phoqasiyañkama, lurañkama.
Qhepa urunakanwa jumanakajj sumpach uk amuyapjjäta.
21 Janiw nayajj profetanakar khitankti, ukampis jupanakajj tʼijukamaw jutapjje.
Janiw jupanakarojj parlkti, ukampis jupanakajj profecianak arsupjje.+
22 Ukampirus jupanakatï nayan amigonakaj taypinkapjjasapänjja,
markajarojj arunakaj istʼayapjjasapänwa,
jan wali thakipsa jan wali luratanakapsa jaytayapjjasapänwa”.+
23 “¿Jakʼankta ukhakit nayajj Diosätjja?”, sistwa naya Jehová Diosajja, “¿jayankta ukhajj janit Diosäkaraktjja?”.
24 “¿Mä jaqejj kawkjantï jupar jan uñjkirista uka imantasiñ lugarar imantasispati?”,+ sistwa naya Jehová Diosajja.
“Alajjpachansa oraqensa taqe kunwa nayajj uñjta”,+ sistwa naya Jehová Diosajja.
25 “Nayan sutij-jjaru kʼari profecianak arsur profetanakarojj akham arsur istʼta: ‘¡Nayajj samkastwa!’ ‘¡Nayajj samkastwa!’+ sasa. 26 ¿Kunapachkamas profetanakan chuymanakapan kʼari profecianak arsuñajj utjaskakini? Jupanakasti pachpa chuymapat kʼarinak parlir profetanakäpjjewa.+ 27 Jupanakkam samkanakat parlasaw markajarojj sutij armasiyañ munapjje, kunjamtï tatanakapajj Baal diosar adorasajj* sutijat armasipkäna ukhama.+ 28 Mä samkanïki uka profetajj samkapat parlpan, ukampis nayan arunakajanïki uka profetajj arunakaj cheq parlarakpan”.
“¿Kunansa pajampi granompejj kikpakïpjje?”, sistwa naya Jehová Diosajja.
29 “¿Janit arunakajajj ninar uñtasitäki?”,+ sistwa naya Jehová Diosajja, “¿janit jachʼa qarqar* tʼunjiri mä combor uñtasitäkaraki?”.+
30 “Ukatwa nayajj profetanakar castigäjja”, sistwa naya Jehová Diosajja, “yaqha profetanakat arunakaj apaqas qʼewjapki uka profetanakaru”.+
31 “Nayajj profetanakar castigäwa”, sistwa naya Jehová Diosajja, “khitinakatï lajjrapampi ‘¡jupajj akham siwa!’ sapki ukanakaru”.+
32 “Nayaw kʼari samkanak parlir profetanakarojj castigäjja”, sistwa naya Jehová Diosajja, “khitinakatï kʼarinakapampi, jachʼañchasir arunakapampi markajar saranukuyapki ukanakaru”.+
“Ukampis janiw nayajj jupanakar khitankti ni kuns ordenkarakti. Ukhamajj janiw ukanakajj kunans aka markar yanaptʼkaniti”,+ sistwa naya Jehová Diosajja.
33 “Ukatsti kunapachatï aka markasa, mä profetasa jan ukajj mä sacerdotes ‘¿kunas Jehová Diosan yatiyäwipajja?’* sasin jisktʼätam ukhajja, jumajj akham sasaw jaysañama: ‘“¡Jumanakajj chʼama tukuñäpjjtawa! Jumanakarojj apanukupjjämawa”,+ siw Jehová Diosajja. 34 Kawkïritï profetatsa, sacerdotetsa jan ukajj markankiritsa, ‘Jehová Diosan yatiyäwipawa’* siskani uka chacharojj castigäwa, utapankirinakarus ukhamaraki. 35 Sapa mayni jumanakat akham sasaw jaqe masiparus jilaparus sasipktajja: ‘¿Kamsasas Jehová Diosajj jaysani? ¿Kamsis Jehová Diosajja?’ sasa. 36 Jan jumanakajj Jehová Diosan yatiyäwipat* jukʼamp parlapjjamti, kuna laykutejj jumanakan pachpa arunakamakiw uka yatiyäwejja,* jumanakajj jakkir Diosan arunakapsa mayjtʼayapjjtawa, jiwasan Diosasäki uka ejercitonakan Jehová Diosan arunakapa.
37 ”Profetarojj akham sañamawa: ‘¿Kamsasas Jehová Diosajj jaysantam? ¿Kamsis Jehová Diosajja? 38 Jumanakatï “¡Jehová Diosan yatiyäwipawa!”* sasin sasipkakïtajja, Jehová Diosajj akham sarakiwa: “Jumanakarojj ‘janiw “¡Jehová Diosan yatiyäwipawa!”* sapjjätati’, sapkchiyäsmasa, ‘aka arunakajj Jehová Diosan yatiyäwipawa’* sasin sasipkaktawa, 39 ukatwa nayajj jumanakar aptasajj naya nayraqatat jayar jaqtapjjäma, jumanakarusa jumanakampiru nayra awkinakamampir churkta uka markarusa. 40 Jumanakjjarusti wiñay phenqʼachatäñampi wiñay jiskʼachatäñampi apanëjja, ukasti janipuniw armatäkaniti”+ sasa’”.