Proverbios
26 Khunojj janiw juntʼupachan khunkaspati, jallojj janirakiw cosecha tiempon jallkaspati,
jan amuytʼasir jaqejj janirakiw jachʼañchatäkaspati.+
2 Kunjamtï mä jamachʼejj escapañatak razonanïkejja, mä golondrina jamachʼis jaltañatak razonanïkejja,
ukhamarakiw mä maldicionajj jan suma razonanejj jan purinkiti.*
4 Jan amuytʼasir jaqerojja jan amuytʼasis parlchi ukhajj jan jaysamti,
ukhamat jan jupa igualäñamataki.
5 Jan amuytʼasir jaqerojja jan amuytʼasis parlataparjam jaysam,
ukhamat yatiñani jaqëkaspas ukham jan tukuñapataki.+
6 Khititï jan amuytʼasir jaqer mä kuns lurañapatak confiyki ukajja,
cojoptañatak jupa pachpa kayunakap usuchjasir jaqer uñtasitawa.
7 Jan amuytʼasir jaqen lakapanjja yatiñamp arsut arunakajj
débil ukhamarak cojo kayunakar uñtasitawa.+
8 Jan amuytʼasir jaqer jachʼañchañajja,
qʼorawar mä qala chintʼañamp sasiwa.+
9 Yatiñamp arsut arunakajj jan amuytʼasir jaqen lakapanjja,
machantat jaqen amparapankir chʼapir uñtasitawa.
10 Khititï jan amuytʼasir jaqeru jan ukajj uka cheq pasaskir jaqer contratki ukajja,
arcomp flechtʼir jaqer uñtasitawa, jupajj ina ukhamak flechtʼasinwa maynir* usuchji.
11 Kunjamtï mä anojj waqʼaqsutapar* mayamp kutjjataskejja,
ukhamarakiw jan amuytʼasir jaqejj kutin kutin jan amuytʼasis kuns luri.+
12 ¿Yatir yatir tukur jaqer uñjirïtati?+
Jupar yanaptʼañat sipansa jan amuytʼasir jaqer yanaptʼañaw jukʼamp facilajja.
13 Jayra jaqejj akham siwa: “¡Mä leonaw thakinkaski!
¡Mä leonaw plazankaski!”+ sasa.
14 Kunjamtï mä punkojj bisagrapan muykejja,
ukhamarakiw jayra jaqejj ikiñapan uksar aksar suntʼiski.+
15 Mä jayra jaqejja manqʼäwin utjki uka fuenter amparap loqantkchisa,
lakapar manqʼa apantasiñatakejj wali qaritawa.+
16 Sum amuytʼasis jaysapki uka paqallqo jaqenakat sipansa,
jayra jaqejj jukʼamp yatiñanïkaspas ukhamwa amuyasi.
17 Khititï sarkasin mayninakan chʼajjwapjjatapat coleraski* ukajja,
mä anur jiñchunakapat katthapir jaqer uñtasitawa.+
18 Kunjamtï mä loqhe jaqejj aqkir flechanaksa jiwayir lanzanaksa jaqtʼkejja,
19 ukhamarakiw jan wali amtampi jaqe masipar engañjir jaqejja, engañjasajj jupajj akham sisjjakiwa: “¡Ukajj mä chansakïnwa!”+ sasa.
20 Kawkjantï phäñajj jan utjki ukanjja ninajj jiwtʼjjewa,
kawkjantï kʼarintir jaqejj jan utjki ukanjja chʼajjwañajj tukusiwa.+
21 Kunjamtï kʼillimasa* phäñas nina aqtaykejja,
ukhamarakiw jiskhisir jaqejj jukʼamp chʼajjwañanak utjayi.+
22 Kʼarintir jaqen arunakapajja suma manqʼar uñtasitawa,
manqʼantatasti cheqakiw purakar manti.+
23 Jan wali chuyman jaqen lakapat mistur suma arunakajja,
kunjamtï mä jiskʼa jikʼillarojj qollqe metalampi bañaski ukar uñtasitawa.+
24 Khititï mayninakar uñiski ukajja suma arunakampiw uñisiñap imtʼi,
ukampis chuymapanjja engañonakaw utji.
25 Suma arunaksa jupajj parlkchejja, jan jupar confiyamti,
kuna laykutejj chuymapanjja paqallqo ajjtaskañ amuyunakaw utji.*
26 Mä jaqejj uñisiñap imtʼañatakejj kʼarinaksa parlkchejja,
jan wali luratanakapajj congregacionanwa qhanstani.
27 Khititï mä pʼiya allski* ukajja uka pachpa pʼiyaruw jupajj jalantani,
khititï mä qala qorumiyki* ukajja uka pachpa qalamp atjjatataw uñjasini.+
28 Kʼarinak parlir lakajja, khitinakarutï kʼarinakampi jan waltʼayki ukanakarojj uñisiwa,
jachʼañchtʼir lakajja mayninakaruw jan waltʼayi.+