Proverbios
8 ¿Janit yatiñajj artʼaski?
¿Janit amuytʼañajj jachʼat artʼaskaraki?+
2 Yatiñajj alto lugaranakana,+ thakinakana,
thakejj cruzjaski uka cheqanakanwa saytʼasi.
3 Markar mantañ punkunakansa,
punku mantañawjanakansa,
yatiñajj wali jachʼat arnaqasiskakiwa, akham sasa:+
4 “Jaqenaka, jumanakaruw nayajj jawsasipksma,
taqeniruw* nayajj parlasipksma.
5 Jan experiencian jaqenaka, amuytʼasirïñ yateqapjjam,+
jan amuytʼasir jaqenaka, yatiñan chuyma jikjjatapjjam.
6 Istʼapjjam, kuntï nayajj siskta ukajj wali importantewa,
kunatï cheqapäki ukwa lakajajj parli.
7 Lakajajj kunatï cheqäki ukwa parli,
kunatï jan walïki ukatjja lakajajj ajjtasiwa.
8 Lakajan taqe arunakapajj cheqapawa,
uka arunakat janiw maynis qʼewjatäkiti ni engañjirïkisa.
9 Amuytʼasir jaqetakejja taqpach uka arunakajj wali qhanawa,
uñtʼaña jikjjatir jaqenakatakejja uka arunakajj cheqapawa.
10 Qollqe lantejj nayan cheqañchäwij ajllipjjam,
wali suma qori lantejj uñtʼaña ajllipjjam,+
11 kuna laykutejj yatiñajj coralanakat* sipansa jukʼamp sumawa,
kunanakatï wali valoranïki ukanakajja janiw yatiñampejj igualaskaspati.
12 Nayajj yatiña satätwa, amuytʼasirïñampiw jakarakta,
uñtʼaña ukhamarak suma amuytʼasirïñwa jikjjatta.+
13 Jumatï Jehová Diosar ajjsarsta ukhajja, kunatï jan walïki ukjja uñisïtawa.+
Wali wal tukuñsa, jachʼa jachʼa tukuñsa,+ jan wali thaksa, jan wali parlañanaksa+ nayajj uñistwa.
14 Nayajj suma ewjjtʼanakanïtwa, yatiñanirakïtwa.+
Amuytʼañasa+ chʼamasa+ nayankiwa.
15 Yanaptʼajampiw reyinakajj apnaqasipkaki,
yanaptʼajampiw gobernantenakajj cheqap leyinak apsupjje.+
16 Yanaptʼajampiw principenakajj apnaqasipkaki,
yanaptʼajampiw pʼeqtʼirinakajj cheqapar juzgapjje.
17 Khitinakatï nayar munasipkitu ukanakarojj nayajj munastwa,
khitinakatï nayar thaqapkitu ukanakajj jikjjatapjjetaniwa.+
18 Utjirinïñasa jachʼañchäwisa nayankiwa,
walja tiempotak utjirinïñasa cheqapasa nayankiwa.
19 Kuntï nayajj jumar churksma ukajja qorit sipansa, suma qorit sipansa jukʼamp sumawa,
kunanaktï nayajj jumar churksma ukanakajj wali suma qollqet sipansa jukʼamp sumawa.+
20 Cheqap thaknamwa nayajj sarnaqta,
justician thakinakap taypinwa nayajj sarnaqta.
21 Khitinakatï nayar munasipkitu ukanakarojj mä suma herencia nayajj churta,
manqʼañanak imañ utanakapsa phoqtʼayaraktwa.
22 Jehová Diosaw nayarojj luritu, luräwipat* nayaw qalltäwipätjja.+
Kunanaktï nayra tiempon lurkäna ukanakat nayrïrïtwa.+
24 Janïr manqha umanakajj utjkäna ukhaw nayajj luratäjjayäta,+
janïr uma jalsunakajj oraqet jalskäna ukhaw nayajj luratäjjayäta.
25 Janïr qollunakajj lugaranakapar uchatäkäna,
janïr jiskʼa qollunakajj lugaranakapar uchatäkäna ukhaw nayajj luratäjjayäta,
26 janïr jupajj oraqsa oraqen camponakapsa lurkäna,
janïr oraqen nayrïr khulanakapsa lurkäna ukhaw nayajj luratäjjayäta.
27 Kunapachatï jupajj alajjpachanak wakichkäna+ ukhaw nayajj ukankjjayäta.
Kunapachatï jupajj alajjpachampi lamar qotampi jikisiyir qorpa uskkäna,+
28 kunapachatï alajjpachar qenayanak uskkäna,*
kunapachatï manqha umanak lurkäna,
29 kunapachatï lamar qotatakejj mä decreto apskäna,
ukhamat lamar qotan umanakapajj kuntï jupajj siskäna ukat jukʼamp jan pasapjjañapataki,+
kunapachatï oraqen cimientonakap uskkäna ukhajja,
30 suma yatjjattʼat mä trabajirjamaw nayajj jupa jakʼankayäta,+
sapüruw jupajj nayat wal kusisïna,+
jupa nayraqatanjja nayajj kusisitapunïyätwa.+
31 Jaqenakan jakapjjañapataki jupajj lurkäna uka oraqetjja nayajj wal kusisiyäta,
jaqenakarojj* nayajj wal munasiyäta.
32 Jichhajj nayan wawanakaja, istʼapjjeta.
¡Khitinakatï thakinakaj arkapki ukanakajj kusisitäpjjewa!
33 Cheqañchatajj istʼasipjjam,+ yatiñan jaqer tukupjjam,
janipun cheqañchäwjja apanukupjjamti.
34 Nayar istʼir jaqejj kusisitawa,
jupajj sapüruw punkunakajarojj alwat purini,
jupajj utaj mantañawjanwa suyaraki.
35 Khititï nayar jikjjatkitu ukajja jakañ vida jikjjatani,+
Jehová Diosampis suma uñjatarakïniwa.
36 Ukampis khititï nayar jan yäqkitu ukajja, jupa pachpaw jan waltʼayasi,
khitinakatï nayar uñisipkitu ukanakajj jiwañaruw munasipjje”.+