Moisés wawaruw qhispiyasi

UÑJAM aka tawaqun lukʼanapar katuntasisaw aka wawax wal jachtʼaski. Aka wawax Moisesawa. ¿Uka suma uñnaqtʼan tawaqux khitïpachasa uk yattati? Egiptonkir tawaquwa, Faraonan phuchapawa.

Mamitapaw kimsa phaxsinkam Moisés wawarux imantatayna, jan egipcionakax jiwayapxañapataki. Ukampisa Moisesarux katjapxaspaw sasaw jupax amuyasïna, ukat wawar qhispiyañatak kuns luratayna uk akan uñjañäni.

Umansa jan mantkiri mä canastwa lursutayna. Ukat Moisesarux uka canastaruw ichuntäna ukatxa Nilo sat jawir lakaruw canastxa jaytanïna totoranak taypiru. Ukat Moisesan María kullakaparuw aka wawa jayat uñjañapataki jaytäna.

Ukat Faraonan phuchapawa Nilo jawirar jarisir saräna. Mayak totor taypin mä canasta uñjäna. Yanapiriparuw akham säna: ‘Uka canasta aptanirapita’ sasa. Faraonan phuchapax canasta qhupiqäna ukhaxa, ¡mä suma asu waw uñjäna! Moisés asu wawax jachaskänwa, ukatwa uka tawaqux wal sintiqtʼasïna. Faraonan phuchapax janiw uka wawar jiwayaykänti.

Ukatxa Moisesan María kullakapaw purinïna. Aka uñkatasinkaskiwa. ‘Aka wawa jumatak uywañapataki mä israelit warmi irptirich sarä’ sasaw Faraonan phuchaparu sänxa.

‘Mirä uk yanaptʼita’ sasaw Faraonan phuchapax sarakïna.

Ukhamasti Mariax laqaw mamapar yatiyir tʼijüna. Kunapachatï Moisesan mamapax purinïna ukhaxa, akham sänwa Faraonan phuchapaxa: ‘Aka wawa uywarapita, nayasti uywatamatxa pagaskämaw’ sasa.

Ukhamasti Moisesan mamapaxa wawapwa uywasiskäna. Ukat kunapachatï Moisesax jachʼäxän ukhaxa, Faraonan phuchapaw irpasxäna, ukat wawapjam uywasxäna. Ukatwa Moisesax Faraonan utapan jiläna.