“Mandamientonakatjja ¿kawkïris jachʼa mandamientojja?”

¿Diosar kusisiyañatakejj kunsa lurañasa? ¿Jan tukuskir walja kamachinak phoqhañati? Cheqansa, janiw ukhamakiti. Kuntï Diosajj maykistu ukjja, mä arumpikiw qhanañchasispa, sasaw Jesucristo, Diosan Yoqapajj säna. (Marcos 12:28-31 liytʼäta.)

Nayraqatjja, kunanakas pasaskäna uk amuytʼañäni. Nisán phajjsitjja, 11 urunak saraqataskänwa, Jesusan jiwañapatakejj mä qhawqha urunakakiw faltjjäna, jupasti templonwa yatichaskarakïna. Uñisirinakapajja, jupar katuntañ laykojj walja jisktʼanakwa jisktʼapjjäna. Ukat Jesusajj uka jisktʼanakapar qhanañchkäna ukhajja, jupanakakiw aynachtʼapjjäna, ukatwa jupanakat maynejj akham sasin jisktʼi: “Mandamientonakatjja ¿kawkïris jachʼa mandamientojja?” sasa (28 jiskʼa tʼaqa).

Uka jisktʼajj janiw aleq jisktʼakïkänti, yaqhep judionakajj sojjta pataka jila mandamientonak Moisesajj katoqkäna ukanakat wal chʼajjwasipkäna. Yaqhepanakasti, taqpach mandamientonakaw wali wakiskiri, janiw mä mandamientojj yaqha mandamientot sipans wali jachʼäkiti sasaw sapjjarakïna. ¿Jesusajj kamsasas qhanañchpachäni?

Jupanakar qhanañchkasajja janiw mä mandamientotak arskänti jan ukasti paywa arsüna. Nayraqatjja akham sänwa: “Tatitu Diosamarusti taqe chuymamampi, taqe jakañamampi, taqe chʼamamampi munam” sasa (30 jiskʼa tʼaqa; Deuteronomio 6:5). Chuyma, amuyu, alma ukat chʼama siski uka arunakajja, janiw may mayäkiti.a Jan ukasti, kunjam jaqëktanti ukhampach Diosar munasiña, mä arunjja, kuntï yatktan ukat kunanakatï utjkistu taqe ukanakampi Jupar munasiña sañ muni. Bibliat parlir mä qellqatajj akhamwa uka toqet saraki: “Kunjam jaqëktantï taqe ukampiw Diosarojj munasiñasa” sasa. Ukatwa, khititï Diosar munaski ukajja, Diosampi sum apasiñatakejj taqe kunwa cheqapar lurañataki chʼamachasini (1 Juan 5:3).

Ukjjarusti Jesusajj akham sarakïnwa: “Jaqe masimaruw munäta, jumar munasktas ukhama” sasa (31 jiskʼa tʼaqa; Levítico 19:18). Diosar munasiñampi ukat jaqer munasiñampejj mayakiwa, mä arunjja, Diosar munasitas laykuw jaqenakar munastanjja (1 Juan 4:20, 21). Jaqe masinakasarutï jiwasarjam munasiñänejja, jupanakajj ukham munasiñampirakiw uñjapjjestani (Mateo 7:12). Ukham lurasajj Diosar munasitaswa uñachtʼaytanjja. Kunattejj taqeniruw Jupar uñtasit lurasiwayistu (Génesis 1:26).

Diosaru ukat jaqe masimar munasipjjam siski uka mandamientojj wali wakiskiripuniwa. Kunattejj “ukanakat sipanjja janiw kawkïr mandamientos jukʼamp jachʼäkiti” sasaw Jesusajj säna (31 jiskʼa tʼaqa). Niya uka pachpat parlkasajja, taqe mandamientonakajj uka pä mandamientonakjjar uttʼayatawa sasaw qhanañcharakïna (Mateo 22:40).

Diosampi askit uñjayasiñajj janiw chʼamakiti. Taqe kuntï jiwasanakat maykistu ukanakajj mä arumpikiw sissna: munasiña. Diosar cheqa yupaychäwinjja, munasiñajj utjapunïnwa ukat jutïrins utjaskakiniwa. Ukampis munasiñajj janiw aleq arunakakïñapäkiti jan ukasti luräwinakasanwa qhan uñachtʼayañasa (1 Juan 3:18). Niyakejjay ‘Diosajj munasirïchejja’, ¿kunjamsa Jehová Diosar munasiñam uñachtʼayasma? ¿uk yatiñ munasmati? (1 Juan 4:8.)