NAYRÏR JANAN PʼEQEÑCHÄWIPA | ¿KHITINAKAS ALAJJPACHAN JAKAPJJE?
Alajjpachan khitinakas jakapjje uka toqet jisktʼanaka
‘¿Khitinakas alajjpachan jakapjje? ¿Kunjamäpachas alajjpachajja?’ sasin inas jisktʼasirïsta. Ukampis janiw juma sapak ukham jisktʼasktati. Jaqenakajj nayratpachaw uka toqet kunaymaninak parlapjje. Yaqhepajj nayra achachilanakasaw alajjpachan jakapjje, jupanakarojj yupaychasiñapawa sasaw creyipjje. Yaqhepasti alajjpachan kusisita, jan kunat llakisisa jakasiñaw utji, ukanjja angelanakampi ukat jiwapki uka suma jaqenakampiw jakasipjje sasaw sapjjaraki. Ukhamarus yaqhepajja, alajjpachan walja waranqa diosanakas utjkaspa ukhamwa amuyapjjaraki.
Janiw alajjpachat kunsa yatksnati, janiw khitis uka cheqat aka Oraqer jutkiti sasaw waljanejj sapjjaraki, ukampis ukham parlasajj pantjasipjjewa. Janïr aka Oraqer jutkasajja, Jesusajj alajjpachanwa jakasïna. Khä nayrïr patak maranakanjja, akham sasaw Jesusajj religión pʼeqtʼirinakar säna: “Nayasti janiw alajjpachat munañajj lurasir jutkti, jan ukasti khitankitu ukan munañap luririw jutta” sasa. Arkirinakaparojja akham sasaw jupajj alajjpachat sarakïna: “Awkejjan utapanjja walja utjäwinakaw jakañatak utji” sasa (Juan 6:38; 14:2).
Jesusan Awkipajj Jehová satawa, Jupan ‘utapajja’ alajjpachankiwa (Salmo 83:18, NM). Ukhamasti Jehová Diosampi, Jesusampikiw kunjamas alajjpachajj uk sum qhanañchapjjestaspa. Cheqansa jupanakajj alajjpachat muspharkañ visionanakwa jan jitheqtas servirinakapar uñjayapjjäna.
Akjjar jutki uka yatichäwinjja, kunsa visionanakajj alajjpachat qhanañchistu ukwa uñjaskañäni. Ukanakat yatjjatkasajja, ak amuytʼañasawa; alajjpachajj janiw aka pachjamäkiti, alajjpachajj janiw uñjaskaspati ni llamktʼaskarakispasa. Kunjamas alajjpachajj ukjja, Jehová Diosajj wali sum qhanañchistu ukhamarus kuntï jaqenakajj sum uñtʼktan ukanakampiw qhanañcharakistu, ukhamat sum amuytʼañasataki. Biblian qellqatäki uka visionanakajja, khitinakas alajjpachan jakapjje uk sum amuytʼañatakiw yanaptʼistani.