Hebreo arut mä jiskʼa letrajja, Diosar confiyañatakiw yanaptʼistu

¿Kunanaktï Diosajj arsuwayki ukanakar confiysnati? Diosajj arsutanakap phoqaniwa sasaw Jesusajj confiyäna, ukham lurapjjañapatakiw jaqenakar chʼamañchtʼarakïna. Mä qollun yatichkasajja, Jesusajj Mateo 5:18 qellqatankki uka uñachtʼäwitwa parläna, akham sasa: “Qhanakwa sapjjsma, alajjpachasa aka oraqesa pasaspawa. Ukampis janipuniw Leyin mä jiskʼa letrapasa ni letran mä puntopas ukhamak paskaniti, jan ukasti taqpachapuniw phoqasini”.

Hebreo arun alfabetopan jukʼamp jiskʼa letrajja י (yod) ukawa, uka letrajj Tetragrámaton ukan nayrïr letrapawa, ukajj Diosan Jehová sutipanwa uñsti.a Escribanakasa fariseonakasa Diosan Leyinakapan utjkäna uka arunaksa, mä jiskʼa puntsa wali wakiskiritwa uñjapjjäna.

Jesusajja alajjpachasa aka oraqesa pasaspawa, ukampis janipuniw Leyin mä jiskʼa letrapasa ni letran mä puntopas ukhamak paskaniti, jan ukasti taqpachapuniw phoqasini sasaw säna. Bibliarjamajja aka oraqesa alajjpachasa wiñayatak luratäpjjewa (Salmo 78:69). Ukhamasti Diosan Leyipan qellqatäki ukanakajj taqew phoqasini, ukwa Jesusan arunakapajj yatichistu.

Jehová Diosajja ¿jiskʼa letranakarusa jan yäqañjam arsutanakarusa wakiskiritti uñjpacha? Jïsa ukhamawa. Amuytʼañäni, israelitanakarojja Jehová Diosajj pascuatak wakichatäki uka uywan chʼakhanakap janiw pʼakinoqapjjätati sasaw säna (Éxodo 12:46). Ukajj jan yäqañjamäspänwa. Maysa toqetjja israelitanakajj ¿kunatsa uywan chʼakhanakap jan pʼakinoqapjjañapäkäna uk amuyapjjpachänti? Inas jan amuyapkchïnti. Ukampis ukajj Jehová Diosatakejj mä wakiskir profecian phoqasiñapatakïnwa. Mesiasar mä lawar chʼakkatas jiwayapjjäna ukhajja, janiw jupan mä chʼakhapas pʼakjatäñapäkänti (Salmo 34:20; Juan 19:31-33, 36).

Jesusan arunakapajja, taqe kunanaktï Jehová Diosajj arsuwayki ukanak phoqapuniniwa sasin confiyañatakiw yanaptʼistu. Hebreo arun jiskʼa letrapajja Diosan arsutanakapar jukʼamp confiyañatakiw yanaptʼistu.