¿Jiwasar uñjasax mayninakax kuns yatiqasipxi?
1. ¿Jesusar uñjasax kuns arkirinakapax yatiqasipxäna?
1 Jesusax akham sänwa: “Nayan yugoxa apapxam, ukatsti nayat yatiqasipxarakita” sasa (Mateo 11:29). Chiqansa Jesusax janiw parla mayak parlirikänti jan ukasti sarnaqäwipampiw yatichirïna. Arkirinakapax kunsa jupar uñjasax yatiqasipxäna uk amuytʼañäni. Jupax suma chuymani, khuyaptʼayasiri, munasiri ukhamänwa (Mat. 8:1-3; Mar. 6:30-34). Altʼat chuymanïnwa (Juan 13:2-5). Jupamp chik yatiyasax arkirinakapax chiqa yatichäwinak taqi chuyma jan qarjtas suma yatichirïtap amuyapxäna (Luc. 8:1; 21:37, 38). ¿Yatiyir uñjapkistu ukanakax kunsa jiwasanakat amuyapxi?
2. ¿Isthaptʼasitasasa sarnaqäwisasa kunjamtʼayaspas jaqinakaruxa?
2 Yatiyktan ukanakaru. Yäpar isthaptʼasitasa, respetomp sarnaqirïtasa ukat taqi chuyma yanaptʼañ munirïtasaw jaqinakan chuymapar purtʼaspa (2 Cor. 6:3; Fili. 1:27). Ukatxa Bibliatpun liytʼirïtasa ukat arstʼapki ukhax respetomp istʼirïtassa amuyapxarakiwa. Uka tuqinakat sum sarnaqasaw Diosan Apnaqäwipat yatiyktan ukar istʼapxañapatakix yanaptʼi, ukxa amtapxapuniñasawa.
3. ¿Kunjamatsa jilat kullakanakarux yanaptʼsna?
3 Jilat kullakanakaru. Jilat kullakanakarux nayrar sartapxañapatakix yanaptʼaraksnawa, ¿kunjamatsa? Taqi chuym yatiyir sarasa, uk uñjasiñxa uka kikpa yatiyapxarakini. Kunjamatix hierrox yaqha hierrompi ariptayataxa, ukhamarakiw sum wakichtʼasisin jaqinakar yatiyañax jilat kullakanakar sum yatiyapxañapatak wiytarakini (Pro. 27:17). Yatiqañ munapki ukanakan sutinakapa ukat kunatï wakiski uk sum qillqtʼasiñäni ukat jankʼakirak kuttʼañäni ukhaxa, jilat kullakanakax uka kikpwa lurapxarakini. Diosan Arupat phuqatpach sum yatiyktan ukhaxa, jilat kullakanakaruw nayrar sartapxañapatak yanaptʼtanxa (2 Tim. 4:5).
4. ¿Jiwasar uñjasax mayninakax kunsa yatiqasipxi uk amuykiptʼasiñasax kunatsa wakisi?
4 ¿Kuntï lurktan kuntï arsktan ukax kunjamtʼayis mayninakarux uk amuykiptʼasiñasax janit wakiskaspa? Suma sarnaqäwisax Jehová Diosaruw kusisiyani ukat apóstol Pabljamarakiw jikxatasiñäni, jupax akham sänwa: “Nayata yatiqasirïpxamaya, kamisatï nayax Cristota [yatiqasktxa] ukhama” sasa (1 Cor. 11:1, MT).