Jan qheparas yatiyasaw yupaychäwisan jiltatas uñachtʼaytanjja

Yatiyirejj sarañasapuniwa, ukhamatwa ajay toqet jiltaskakiñäni. Ukampis Diosan reinopat yatiyasajja, Jehová Diosan Qhanañchiripataswa uñachtʼaytanjja. Ukhamajj yatiyañajj wali wakiskiripuniwa (Isa. 43:10). Qhepa urunakanwa jakjjtanjja, ukhamajj jankʼaki yatiyañasawa. Janis wakiskirïkaspa ukham amuyañajj janiw akchʼas walïkaspati. Pablojj akham sänwa: ‘Diosarojj yupaychañasapuniwa. Aka yupaychañwa suma sacrificiot churañasa, lakasampi yupaychañäni’ sasa (Heb. 13:15).

Kunsa sapa semanan lurañäni uk amtkasajja, kuna urunakas yatiyir mistuñäni uk amtañasawa. Yatiyir mistuñatakejj inas semanpachatak tamanjj wakichatäjjchi, ukhamajj kuna urusa tamamp chika mistuñäni uk jiwasaw amtjjañasa. Kunayman toqetwa yatiysna, utat ut sarasa, revisitanak lurasa, Bibliat yateqerinakar yatichasa ukat kawkhanjjay yatiyañjamächi ukhansa yatiyaraksnawa. Taqe ukatakejja Bibliat apstʼat qellqatanakjja apasiñasapuniwa. Khitimpitï yatiyir mistkäta jupamp wasitat mistsuñatakis amtapjjarakismawa.

Jaqenakajja inas taqenis jan istʼapkchistaniti kunatejj uk sum yattanjja, ukampis yatiyaskakiñasawa (Mat. 13:15; 24:9).Ezequielajja, “kʼullu, qala chuymani jan amuytʼani” jaqenakaruw yatiyañapäna. Jehová Diosajj akham sasaw chʼamañchtʼäna: ‘Jumarojj jupanakjam tukuyäma’ ukat “diamantet sipansa jukʼampi chʼollqhe tukuyäma” sasa (Ezequiel 2:3, 4; 3:7-9). Ukhamajj jan qheparas yatiyaskakiñäni.