Bibliat yateqañ munirinakar ¿kunjamanakats jikjjatsna?
1. Bibliat yateqerinak jan jikjjatkstan ukhajja, ¿kuns lurañasa ukat kunatsa?
1 Bibliat yateqañ munirinakar jikjjatañajj ¿jumatak chʼamati? Jan qarjtamti thaqhaskakim. Jehová Diosajj munañap phoqhañatak chʼamachasirinakarojj bendiciwa (Gál. 6:9). Bibliat yateqañ munirinakar kunjamats jikjjatsna uka toqet phesqa yanaptʼanak uñjañäni.
2. ¿Kunjamatsa Bibliat yateqañ munirinakar jikjjatsna?
2 Cheqakwa jisktʼasma. Yatiyañataki ukat ¡Despertad! sat revistanakamp yatiyatasjja, waljaniw yatipjje, ukampis Bibliat yatichatasjja, janiw yatipkiti. Ukhamajj mayan utat uta yatiyir mistkäta ukhajja, ¿Bibliat yateqañ munasmati sasin janit cheqak jisktʼkasma? Ukat visittʼirïkta ukanakarus jisktʼarakismawa. Jan munapki ukanakarojj Bibliat apstʼat qellqatanakjja, aparapiskakismawa ukat yateqañ munañapatakis yanaptʼaskakismawa. Mä jilatajj walja maranakaw mä chacha warmitakejj revistanak aparapirïna. Mä urojja, machaq revistanak jaytawayasin niy sarjjaskäna ukhajja, “¿Bibliat yateqañ munapjjasmati?” sasaw jisktʼatayna. Jupanakajj jïsa, yateqañ munapjjtwa sapjjataynawa, jichhajj panpachaniw bautisatäjjapjje.
3. Tantachäwir jutapki ukanakajj Bibliat yateqasipkpachaw sasin amuyañajj ¿kunatsa jan walïki?
3 Tantachasiñ Utar visittʼir jutapki ukanakampiw parltʼasma. Tantachäwir jutapki ukanakajj Bibliat yateqasipkpachawa sasajj janiw amuyañasäkiti. Mä jilatajj akham siwa: “Bibliat yatichaskta ukanakatjja, jilapartejj tantachäwinwa jikjjatta” sasa. Wali ajjsarir mä warmejja, 15 maranakaw pä phuchhapamp Tantachasiñ Utar sarapjjerïna, phuchhanakapajj bautisatäpjjänwa. Tantachäwejj qalltjje ukhakiw jupajj purirïna ukat tukuyjjepan jankʼakiw sarjjarakirïna. Mä urojja mä kullakaw Bibliat yateqañ munasmati sasin jisktʼatayna ukat jupajj iyaw sasaw Bibliat yateqañ qalltatayna, tiempompejja, bautisasjjarakïnwa. Kullakajj akham sasaw qellqatayna: “¡15 maranak Bibliat yatichañatak jan jisktʼatajjatjja walpun amtasta!” sasa.
4. Bibliat yateqañ munirinakar jikjjatañatakejj ¿kuns lursna?
4 Mayninakar yanaptʼañatakejj jankʼakïñamawa. Mä kullakajja, Bibliat yatichapki ukanakaruw compañtʼirïna. Ukat yatichañ tukuyjjapjjerïna ukhajja yatichirir permiso mayisajj khitimpich Bibliat yateqañ munaski sasin yateqerir jisktʼirïna. Maysa toqetjja, Bibliat yateqañ munapki ukat Kunsa yatichi sat librsa katoqasipki ukanakar kutʼkasaw khitich uka libro munaski sasin jisktʼaraksna. Ukatjja, yatiyirinakasa, precursoranakas inas Bibliat yateqañ munirinakar kuttʼañatak jan tiemponïpkchiti, jupanakaruw jisktʼaraksna. ¿Yanaptʼañatakejj janit tiempo apsuskasma?
5. Diosar jan loqtirimpi casaratäpki ukan chachapar jan ukajj warmiparojj Bibliat yateqañ munasmati sasin ¿kunatsa jisktʼañajj wakisispa?
5 Diosar jan loqtirimpi casaratäpki ukan chachapar jan ukajj warmiparuw parltʼarakisma. ¿Uka kasta jilat kullakanakajj tamaman utjiti? Yaqhepanakajja, janiw chachapampi jan ukajj warmipampi Bibliat yatichayasiñ munapkiti, ukampis yaqhampejj yatichayasiñ munapjjaspawa. Ukhamajj jupanakamp janïr parlkasajja, jilataruw jan ukajj kullakaruw kunjamsa ukat kuna ratus parltʼsna uk jisktʼañasa.
6. Bibliat yateqañ munirinakar jikjjatañatakejj ¿kunatsa Diosar yanaptʼa mayiñasa?
6 Jehová Diosaruw yanaptʼa mayiñama. Jehová Diosar yanaptʼa mayiñjja, janiw armasiñamäkiti (Sant. 5:16). Munañaparjamtï mayiñänejja, istʼistaniwa (1 Juan 5:14). Mä jilatan tiempopajj janipuniw utjkänti ukatwa jupajj Bibliat yatichañatak maynirukis jikjjatirista sasin Jehová Diosar yanaptʼa mayïna. Ukampis warmipajja, kunjamsa chachapajj Bibliat yateqañ munirirojj yanaptʼani yamas yateqeritï walja llakinakanïni ukhajja, sasaw wal llakisïna. Ukatwa taqe uka llakinakap Jehová Diosar yatiyäna. Pä seman qhepatjja, Jehová Diosajj jupanakan mayisïwipjja istʼänwa, tamapankir mä precursora kullakaw Bibliat yateqañ munir mä chachar jikjjatatayna ukat jilataruw yanaptʼañapatak jaytatayna. Jilatan warmipajj akham sasaw qellqatayna: “Bibliat janiw yatichirjamäkti sapki ukanakarojj janipun uka toqet Diosar mayiñ armasipjjpati ukat kuntï munapki uk qhan mayipjjpan sasaw ewjjtʼarakta. Maynir yanaptʼañajj kunja kusiskañas ukjja, janiw amuyapkäyätti” sasa. Jumatï chʼamachasiskakïta ukhajja, Bibliat yateqañ munirinakarojj jikjjatätawa ukat waljanirurakiw ‘jakañar irpiri thakhir’ mantapjjañapatakejj yanaptʼäta (Mat. 7:13, 14).