¡Sum katoqtʼapjjañäni!
1. ¿Kunapachas Diosar wal jachʼañchsna, ukat kunatsa?
1 Jesusan jiwäwip amtir jutapkani ukanakaruw wali sum katoqtʼsna. Ak amuytʼañäni: jichha maratakejja, tunka millón jaqenakat jukʼamp jutapjjaspa uk suytanjja, ukhamat kuntï Jehová Diosasa ukat Jesusasa jiwasar munasipjjatap layku lurawayapjje uk istʼir jutapjjañapataki. Qhawqsa munasipjjestu ukjja, Jesusan loqtasïwipanwa qhan uñachtʼayasi (Juan 3:16; 15:13). Ukat Jesusan loqtasitapatjja, kuna bendicionanaksa katoqapjjaspa uksa yateqapjjarakiniwa (Isa. 65:21-23). Ukampis uka tantachäwinjja, janiw arstʼirikejj Jehová Diosar jachʼañchkaniti, jan ukasti taqeniw visittʼirinakar sum katoqtʼasa Diosar jachʼañchsna (Rom. 15:7).
2. Visittʼirinakarojja, ¿kunjamatsa wali munasiñampi katoqtʼsna?
2 Janïr tantachäwejj qalltkipan qonuñanakasan amuki suyañat sipansa, visittʼirinakar aruntañataki ukat khitïtans uk yatiyañatak chʼamachasiñäni. Cheqas kunanakas utjani uk jan yatipjjatapatjja, visittʼirinakajj ajjsarayasipjjaspawa. Ukhamajj kusisit chuymampi ukat munasiñampi jupanakar aruntsna ukhajj walipunïspawa, ukhamatwa jupanakajj sum jikjjatasipjjani. Ukat invitación katoqasak jutawayapjje janicha uk yatiñatakejja, akham jisktʼsna: “¿Jichhapunit tantachäwir jutta? Jan ukajj ¿aka tamankirit maynir uñtʼtacha?” sasa. Ukat jiwasamp chika qontʼasiñapataki, Bibliat liytʼañapataki ukat qʼochuñ librot qʼochuñapatakiw jawstʼaraksna. Tantachasiñ Utantï tantachasipjjañänejja, visittʼirinakar uka Uta uñtʼayañatakiw chʼamachassna. Ukat arstʼäw tukuyatarojja, jisktʼanakap qhanañchañatakiw chʼamachasiraksna. Yaqha taman jankʼak mantaniñap wakischinejja, akham saraksnawa: “Jumatakejj aka wakichäwejj kunjamakïnsa uk yatiñatakejja, ¿kunjamatsa mayamp jikissna?” sasa. Ukhamat jupampi yaqha uru jikisiñatak amtsna. Ukat Diosan tamapat jitheqtawayapki ukanakatï tantachäwir sarapjjani ukhajja, irpir chuymaninakaw jupanakar chʼamañchtʼapjjani.
3. Jesusan jiwäwip amtañatak visittʼirinakar wali sum katoqtʼañajja, ¿kunatsa wali wakiskirejja?
3 Cheqas Jehová Diosan markapankirinakajja, wali kusisita, jan chʼajjwasa, mä wawakiw sarnaqasipjje, ukwa visittʼirinakajj uñjapjjani, inas ukhaki uk uñjapjjchini (Sal. 29:11; Isa. 11:6-9; 65:13, 14). Ukhamajj ¿uka tantachäwin tamasar visittʼir jutapjjani ukanakajj kunjamakis jikjjatasipjjpachäni? Ukajj jiwasatäjjaniwa. Ukhamajj jupanakar sum katoqtʼañatakiw chʼamachasiñasa.