Diosamp sum apasiña

Bibliarjamajj ‘Diosan espiritupamp irpayasir’ jaqejja, mä arunjj Diosamp sum apasiñatak chʼamachasir jaqejja, kunsa Diosajj amuyi uk wali valoranit uñji, ukatsti ewjjtʼanakaparjamaw sarnaqaraki. Diosamp jan irpayasiñ munapki uka jaqenakajj amtanakaparjamakiw sarnaqapjje, ukampis Diosamp irpayasiñ munirinakajj Diosan ewjjtʼanakap wali valoranit uñjapjje (Judas 18, 19; Efesios 5:1).

SUYTʼÄWINÏÑA

BIBLIAJJ KAMSISA: “Tʼaqhesiña horasantejj mayjtʼasïta ukapachajja, jukʼa chʼamanikiwa jikjjatasjjäta” (Proverbios 24:10).

KAMSAÑSA MUNI. Aynachtʼañäni ukhajja, sapürun utjki uka jan walinakar saykatañatakejj janiw chʼamajj utj-jjaniti. Ukampis suytʼäwejj jan ajjsaras nayrar sartaskakiñataki, jan waltʼäwinakajj jan wiñayatakïtap amuyañatakiw yanaptʼistu, jan waltʼäwinakat sumanak apsuñatakis yanaptʼarakistuwa.

KUNSA LURASMA. Jutïr urunakjja kusisitaw suytʼañama. Kunanakatï jutïrin paskani ukanakat llakisiñat sipansa, jan ukajj mä kun lurañatak suma tiempo puriniñap suyañat sipansa, kuntï amtkta uk lurañatak chʼamachasiskakim. Cheqas jan waltʼañajj mä akatjamatwa utjaspa (Eclesiastés 9:11). Awisajja, kuntï suykayätan ukat sipansa jukʼamp sumaw taqe kunas phoqasjjaspa. Yapuchañ toqet parlkasajja, Bibliajj akham siwa: “Alwatajja yapucham, jaypʼusa yapucharakim, janiw jumajj yatktati kunjämäkanitejj nayra, ukhamarak qhepa yapuchatasa, jan ukajj paypach satas mayak jilapjjchini” sasa (Eclesiastés 11:6).

WAKISKIR JISKTʼANAKAN QHANAÑCHÄWIP YATIÑA

BIBLIAJJ KAMSISA: “Amuytʼa kankañay churita [...]. Arunakamajj cheqapawa” (Salmo 119:144, 160).

KAMSAÑSA MUNI. Kuna jisktʼanaktï taqenis jisktʼasktan ukanakaruw Bibliajj qhanañchi, ukanakat yaqhepajj akanakawa:

• ¿Kawkitsa juttanjja?

• ¿Kunatsa utjtanjja?

• ¿Kunas jiwatanakamp pasjje?

• ¿Jakañajj jiwañarukit tukusjjpacha?

Bibliajj uka jisktʼanakaru ukat yaqha jisktʼanakar kunjamsa qhanañchi ukjja, walja millón jaqenakaw yatjjatawayapjje, ukham lurasajj jukʼamp kusisitaw jakasjjapjje.

KUNSA LURASMA. Bibliajj kunsa yatichi uk juma pachpa yatjjatañamatakiw invittʼapjjsma, Biblia sum amuyañatakejj Jehová Diosan Testigonakaparuw yanaptʼa mayisma. Internetan jw.org sat cheqarus mantarakismawa, jan ukajj tantachäwinakajj utjapkitu ukaruw visittʼapjjetasma. Ukar mantañajj gratisakiwa, janirakiw qollqes mayiskiti.

BIBLIAN YAQHEP WIÑAY YATICHÄWINAKAPA

DIOSAR UÑTʼAS JUPAMP IRPAYASIÑA

“Kusisiñanïpjjew Diosat yatjjatañajj kunja wakiskirisa uk amuyasirinakajja” (MATEO 5:3).

BIBLIA QELLQAYIR DIOSAR UÑTʼAÑA

“Diosar jakʼachasipjjam, jupajj jumanakar jakʼachasirakiniwa” (SANTIAGO 4:8).

BIBLIA LIYIÑA UKAT LUPʼIÑA

“Jupan kusisiñapajj [Jehováa] Tatitun arupawa, uka arupatsti arumay uruw lupʼi. [...] Taqe luräwinakapasti waltʼaskakipuniwa” (SALMO 1:2, 3).