Kunatï utjkistu ukanakamp kusisitäñatak ewjjtʼanaka
Solteronakasa, casadonakasa, wayn tawaqonakasa, jilïrinakasa taqeniw kusisita jakasiñ muntanjja. Diosajj ukham jakasiñaswa munaraki, ukatwa wali suma ewjjtʼanak churistu.
Wali trabajtʼirïñamawa
‘Wal trabajim, pachpa amparamampi sum lurasa, ukhamat jan utjirinïki ukar mä kunsa churañataki’ (EFESIOS 4:28).
Diosajja trabajtʼirïñaswa muni. ¿Kunatsa? Wali trabajtʼiri jaqejja, jupa pachpatakisa familiapatakis janiw kuns faltaykiti, ukatwa kusisit jakasi. Jan utjirinïpki ukanakarus yanaptʼarakispawa. Wali trabajtʼiri jaqenakarojja patronapajj valoranitwa uñji, janiw trabajopsa facilak aptʼasipkaspati. ‘Wali chʼam tukus trabajipjjatapat kusistʼapjjañapasa wali sumarakiwa, ukasti Diosan mä regalopawa’ sasaw Bibliajj qhanañchi (Eclesiastés 3:13).
Honrado jaqëñamawa
“Qʼoma conciencianïpjjatajat janiw pächasipkti, taqe kunansa honrado chuymampiw sarnaqañ munapjjarakta” (HEBREOS 13:18).
Jiwasatï honradöñänejj kusisitaw jakasiñäni, chuymasansa sumakiw jikjjatasiñäni, sumwa arumanakas iktʼasirakiñäni. Ukhamarusa mayninakajj respetapjjestaniwa confiyapjjarakistaniwa. Jan honradöpki uka jaqenakajja, janiw ukham jakasipkiti. Conciencianakapajj sapa kutiw jan wal lurapjjatapat amtayaspa, ‘katjayaskächa’ sasaw uruy arumas llakisipjjarakispa.
Jan qollqe añcha munamti
“Jakañ vidanjja jan qollqe añcha munirïpjjamti, kunanakatï utjapktam ukanakampejj kusisitakïpjjam” (HEBREOS 13:5).
Qollqejj manqʼa, isi ukat yaqhanak alañatak munaskchisa, ‘qollq añch munañajj’ jan walinakanwa uñjasiyistaspa. Mä jaqejj walja qollqe jikjjatañatakejj tiempopa chʼamapwa aptʼasispa. Ukham walja qollqe jikjjatañatak chʼamachasisajja matrimoniopsa jan walinwa uñjasiyaspa, wawanakapatakisa janiw tiemponëjjaspati, jupas usuntarakispawa (1 Timoteo 6:9, 10). Qollq añch munir jaqejja, jan walinak lurañatakiw yantʼat uñjasirakispa. Yatiñani mä chachajj akham sänwa: ‘Confiykañ jaqejja walja bendicionanakwa katoqani, ukampis khititï ratuki qamiriptañ munki ukajja kunjamatsa juchar purtʼasikipuniniwa’ sasa (Proverbios 28:20).
Suma yatichatäñwa ajlliñama
‘Yatiñanïñsa amuytʼasirïñsa jarkʼaqam’ (PROVERBIOS 3:21).
Suma yatichatäñajja, confiykañ jaqëñataki suma awk taykäñatakiw yanaptʼistaspa. Ukampis janiw suma yatichatäsakejj kunanaktï necesitktan ukanak jikjjatkañäniti, ni kusisitas jakaskañäniti. Vidasan kusisit jakasiñatakejja, Diosamp yatichatäñasaw wakisi. ‘Taqe kuntï Diosar istʼir jaqejj lurkani ukajj sumaruw sarani’ sasaw Bibliajj qhanañchi (Salmo 1:1-3).