¿Kunsa cientificonakajj jan yatipki?
Cientificonakajj walsa alajjpachatsa aka oraqetsa yatjjatawayapkchejja, janiw wali wakiskiri walja jisktʼanakarojj qhanañchañ puedipkiti.
¿Kunjamatsa alajjpachasa oraqesa vidas qalltawayi uk cientificonakajj yatjjapjjeti? Janiwa. Waljanejja cosmología ukaw kunjamsa alajjpachasa oraqesa qalltawayi uk qhanañchaspa sasaw amuyapjje. Ukampis Universidad de Dartmouth ukan yatichiri Marcelo Gleiser profesorajja (jupajj Diosan utjatapar janiw creykiti, Astronomía toqetwa yaticharaki) akham siwa: “Kunjamsa alajjpachasa oraqes qalltawayi uk janiw qhanañchawayapkiti” sasa.
¿Vidajj kunjamsa qalltawayi uka toqet kamsapjjarakisa? Science News revistajj akham siwa: “Kunjamapunis vidajj aka oraqen qalltawayi uk qhanañchañajj wali chʼamäspawa. Kunanakatï qalltan paskäna uka toqet qhanañchkistaspäna ukanakajja, walja maranak nayraw chhaqtawayjje” sasa. Aka revistasa kuntï Marcelo Gleiser profesorajj siskäna ukasa, kunjamsa alajjpachasa, aka oraqesa, vidas qalltawayi uk cientificonakajj jan qhanañchañ puedipjjatapwa amuytʼayistu.
Inas akham jisktʼassta: “Aka oraqen jakirinakatï maynin lurtʼatächejja, ¿khitin lurtʼatäpachasa? Wali munasiri yatiñäni mä Luriritï utjchejja, ¿kunatsa tʼaqesiñanak jan tukjpacha? ¿Kunatsa walja religionanakajj utji? ¿Kunatsa religionankirinakan jan wali luratanakap ukhamak uñchʼukpacha?” sasa.
Cientificonakajj janiw uka jisktʼanakar qhanañchañ puedipkiti, ukampis qhanañchäwinak jikjjatsnawa. Walja jaqenakajja Biblianwa uka jisktʼanakan qhanañchäwinakap jikjjatawayapjje.
Yaqhep cientificonakajj Bibliat yatjjatañatakejj tiempo apstʼasiwayapjjewa. ¿Kunatsa mä Luririw utji sasin amuyapjje uk yatiñ munasmati? Uk yatiñatakejja Internetan jw.org cheqan Opiniones sobre el origen de la vida toqet parlir videonak thaqtam.