AKAPACHAJJ JUKʼAMP JAN WALINWA UÑJASI

1 | Jan usuntañatak cuidasim

¿KUNATSA UKAJJ WAKISI?

Terremotonaka jan ukajj yaqha ukhamanak utjki ukajj kunayman toqetwa maynir jan waltʼayaspa.

Jan walinakajj paski ukhajja, jaqenakajj wali estresataw sarnaqapjje, jaya tiempo ukham sarnaqasajja sapa kutiw usuntapjje.
Jan waltʼäwinakajja, hospitalanakarus jan walinwa uñjasiyaspa, walja usutanak utjipanjja janiw sum cuidañ puedjjapjjaspati, qollanakas pistʼjjaspawa.
Jan waltʼäwinak utjipanjja, maynejj qollqet pistʼataw sarnaqaspa, ukhamïpansti manqʼañanaka, qollanaka alasiñatakis janiw qollqejj alcansjjaspati.

¿Yatiyätati?

Jan wali usunakasa, estresatäñasa, jan wali amtanakaruw puriyiristam. Ukhamïpansti jan sum cuidasisajj jukʼampikiw usuntjjasma.
Jumatï mä kunat usutäsajj jan qollayaskäta ukhajja, jukʼampiw usuntasma, jiwañar kunaw purtʼasisma.
Jumatï jan usuntatäkäta ukhajja, jan waltʼäwinakajj utjkani ukhas suma amtanakaruw purïta.
Inas pobrekïsta jan ukajj wali qollqenïsta, ukhamäkchisa jan usuntañatakejj jarkʼaqasismawa.

¿Kunsa lurasma?

Wakiski ukhajja, amuytʼasiri mä jaqejj kunanakatï jan waltʼaykaspa ukanakat jarkʼaqasiñatakejj jankʼakiw kuns luri. Usunakat jarkʼaqasiñatakejj ukhamarakwa lursna. Sañäni, jan sinti usuntañatakejja, utasasa, cuerposasa qʼomäñapawa. Jan usuntañatakis cuidasiñaw jukʼamp wakisi.

“Doctoran ukar sarasina, qollanak alasina qollqe gastañat sipansa, cuerponakajasa, utajasa qʼomäñapatakiw chʼamachasipjjta” (Andreas).a

a Aka revistan yaqhep sutinakajj cambiasiwayiwa.

KUNAS YANAPTʼISTASPA wakiskir ewjjtʼanaka

Akapachajj jukʼamp jan walin uñjasitap layku jan usuntañatak yanaptʼanaka

QʼOMAW SARNAQAÑAMA

Qʼomaw sarnaqañama

Bibliajj akham siwa: “Amuytʼasir jaqejja mä jan waltʼäwi uñjasajj imantasjjewa” sasa (Proverbios 22:3). Kunanakatï usuntaykiristam ukanakatjja, janïräkipanwa jarkʼaqasiñama.

Sapa kutiw amparanakam jabonampi jareqasiñama, manqʼañanak apnaqañatakisa, jan ukajj bañor mantasasa ampar jareqasiñamapuniwa.
Utamjja, sapa kutiw qʼomachañama desinfectañama. Yamas kawkja cheqanakatï sapa kuti llamktʼaski ukanakjja, desinfectañamawa.
Wakischi ukhajja, contagieri usuninakarojj janiw sinti jakʼachasiñamäkiti.

CHʼAMAÑCHKIR MANQʼANAKWA MANQʼAÑAMA

Chʼamañchkir manqanakwa manqʼañama

Bibliajj akham siwa: “Janiw khitis pachpa cuerpoparojj kunäkipans uñiskiti, antisas manqʼayiwa, wali munasiñampiw uñjaraki” sasa (Efesios 5:29). Kunanakatï cuerposar jan waltʼaykaspa ukanakat cuidasisaw cuerposar munasitas uñachtʼaytanjja.

Walja umwa umañama.
Taqe kasta frutanaka, verduranakwa manqʼañama.
Grasatsa, jayutsa, azucaratsa cuidasiñamawa.
Janiw cigarro fumañamäkiti, alcoholatsa droganakatsa cuidasiñamawa.

“Jan usuntañatakejja, kunatï chʼamañchapkitaspa uka manqʼanakwa manqʼasipjjta, jan ukham lurapkirista ukhajja, jukʼa qollqe imasipkta ukjja doctorar sarasaw tukjasipjjerista. Antisas chʼamañchkir manqʼañanak manqtʼasiñatakiw gastapjjta” (Carlos).

EJERCICIONAKWA LURAÑAMA SUMWA IKTʼAÑAMARAKI

Ejercicionakwa lurañama

Bibliajj akham siwa: “Wali chʼam tukusin wal trabajiñat sipansa mä jukʼa samartʼañaw jukʼamp sumajja, kuna laykutejj wali chʼam tukusin wal trabajiñajja thayar katthapiñampi sasiwa” sasa (Eclesiastés 4:6). Trabajiñasawa, ukampis sumwa iktʼañasaraki.

Kunsa lurañamapuniwa. Sapüruw sarnaqañama. Mä kun lurañajja, edadanëjjsta jan ukajj mä kunat usutästa, jan qollkay usunïsta ukhasa, jan sint usuntañatakiw yanaptʼiristam.
Sumwa iktʼañama

Sumwa iktʼañama, jumatï jan sum ikjjasma ukhajja, jukʼampiw estresasisma, janiw sum piensañ puedjjasmati. Tiempompisti usuntjjasmawa.
Kuna horarus ikjjäta ukwa amtañama, ukatsti ukarjam phoqañatakiw chʼamachasiñama. Sapüruw mä pachpa horaru ikiñataki sartañataki chʼamachasiñamaraki.
Ikintjjasajja, janiw telivisionsa, celularsa ukat yaqha ukhamanksa uñchʼukjjañamäjjeti.
Janïr ikintkasajja, janiw sinti manqʼañamäkiti, janirakiw machjayir umañanaksa, cafeysa ukat yaqha ukhamanaksa umañamäkiti.

“Sum iktʼañajja, cuerpojar wal yanaptʼatapwa amuyta. Jan sum ikjjta ukhajja, awisajj pʼeqe usuta, cuerponakas wali usutaw sartta. Ukampis sum iktʼasta ukhajja, taqe kunatakis chʼamajajj utjkaspa ukhamawa. Janirakiw sapa kuti usuntkti” (Justino).