Jan walinakan kunjamsa familiamar sum uñjasma ukatak ewjjtʼanaka
CHACHA WARMJAMAJJ JUKʼAMP SUM APASIPJJAM
Chacha warmjamajj jukʼamp sum apasipjjam
Bibliajj akham siwa: “Mayni sapat sipansa paniniw jukʼamp sumajja […]. Jupanakat maynitï tinkuni ukhajja, mayniw saytʼasiñapatakejj yanaptʼaspa” sasa (Eclesiastés 4:9, 10). Casarat chacha warminakajja, janiw pä equipon anatirinakjamäpjjañapäkiti, jan ukasti mä pachpa equipon anatirïpkaspas ukhamäpjjañapawa.
Estresatäkasajj jan toqesipjjamti. Paciencianïpjjäta aguantasipjjäta ukhajja nayraruw sartapjjäta.
Kuna jan walinakansa uñjasipta uka toqetjja, semanan may kutikis parltʼasipjjañamawa. Jan jumanak purajj jan waltʼayasipjjamti, jan ukasti kunatï jan waltʼayapktam uk askichapjjam.
Panpachanirojj kunatï gustapktam uk lurañatakejj tiempo apstʼasipjjam.
Chacha warmjamajj kuna sumanaksa lurawayapjjta uk amtasipjjam. Casarasipkta uka fotonaka jan ukajj yaqha horasan apstʼasipkta ukanak uñjjattʼapjjam.
“Chacha warminakajja janiw taqe kunans mä amtanïpkapuniti, ukampejj janis mayachtʼatäpkaspa ukham janiw sañ munkiti. Panpachaniw mä suma amtar puripjjaspa taqe kunas sum mistuñapatakiw chʼamachasipjjarakispa” (David).
AMIGONAKAMAT JAN JITHEQTAMTI
Amigonakamat jan jitheqtamti
Amigonakaman chʼamañchtʼatäñ suyañat sipansa jumaw jupanakar chʼamañchtʼañama. Mayninakar yanaptʼasajja, juma pachpaw chʼamañchtʼasïta.
Amigonakamajj kunjamäsipkisa uk yatiñatakejja sapüruw jupanakamp parltʼasiñama.
Jumjam jan walin uñjaskäna uka amigomaruw kunjamsa uka jan waltʼäwir atipjawayi uk jisktʼasma.
“Problemanakajja jachʼa thayampi jallumpi sasiwa. Amigonakajj mä qhanjamaw uka jan walinakar saykatañatak yanaptʼistu. Awisajj yatktan uk amtayatäñakwa muntanjja. Amigonakamajj munasipjjtamwa jumajj qhawqsa jupanakar munasta uksa yatipjjarakiwa” (Nicole).
WAWANAKAMAROJJ YANAPTʼAÑAMAWA
Wawanakamarojj yanaptʼañamawa
Bibliajj akham siwa: “Sapa maynis istʼañatakejj jankʼakïñapawa, janiw jan amuytʼasisajj parlañapäkiti” sasa (Santiago 1:19). Kunas llakisiyi kunas ajjsarayi ukanak inas wawanakamajj jan parlañ munapkchïtamti. Ukampis pacienciampi sum istʼapjjäta ukhajja, jumanakar cuenttʼañ janiw ajjsarjjapjjaniti.
Wawanakaman jan ajjsaras jumar cuenttʼañapatakiw yanaptʼañama. Thakin sarkasa jan ukajj autot sarkasaw parlañ munapjjaspa, jumanakatï parlañapatak obligapjjasmajja, janiw parlañ munapkaspati.
Sustjasiñjam jan wali noticianakjja janiw wawanakamarojj istʼayapjjañamäkiti.
Jan walin jan uñjasipjjañapatakejj kuns luraskta uk familiamar yatiyam.
Jan walinakajj utjaspa ukhajj kunsa lurapjjäta uk amtapjjam, wawanakamampejj uk ensayapjjarakim.
“Wawanakamamp parlkasajj jupanakar arstʼayapjjam. Inas jupanakajj sustjata, jan kun lurirjama colerata ukhamäsipkchi, inas ukanak jan jumanakar yatiyapkstamti. Nayajj ukhamarakiw jikjjatasta sasaw sañama. Kunas ukham jan jikjjatasjjañatakejj yanaptʼawaytam uk cuentʼarakim” (Bertha).