Diosaw taqi kun lurañ qallti

TAQI sumanakax Diosan luratawa. Jupaw Intsa urun qhantʼaniñapataki, ukat Phaxssa warawaranaksa arum mä jukʼa qhantʼaniñapataki luratayna, juparakiw aka Uraqsa jakasiñasataki luratayna.

Ukampisa, janiw Diosax Intsa, Phaxssa, warawaranaksa, aka Uraqsa, nayraqat lurkänti. ¿Kunsa nayraqat lurpachäna uk yattati? Jupjam ajayunak luratayna. Janipï jiwasax jupanakarux uñjksnatixa kunjamtï Diosarux jan uñjktanti ukhama. Biblianxa angelanak satäpxiwa. Alaxpachan jupamp chika utjasipxañapatakiw Diosax luratayna.

Diosan lurat nayrïr angelaxa wali munatänwa. Nayrïr Wawapänwa, ukat Tatapampiw irnaqäna. Diosarux taqi kun lurañ yanaptʼäna. Inti, Phaxsi, warawaranaka ukat Uraqi lurañ yanapäna.

¿Qalltanxa kunjamäpachäns aka Uraqixa? Janiw khitis aka Uraqinxa jakkasapänti. Umakamakïnwa. Ukampisa jaqinakan utjasiñapwa Diosax munäna. Ukatwa, jiwasanakatak sum wakichañ qalltäna. ¿Kunjamsa?

Nayraqatxa, qhanaw munasïna. Ukatwa Diosax Intimpi aka Uraqxaru qhantʼayanitayna. Ukhamata arumas urusa utjañapataki. Ukatxa, uma taypit waña uraqi uñstayanirakïna.

Qalltanxa uka waña uraqinxa janiw kunas utjkänti, aka dibujonjama. Janiw panqaranakasa, quqanakasa ni animalanakasa utjkänti. Janiw qutanakansa chawllas utjkänti. Animalanakasa jaqinakasa aka Uraqin sum jakasipxañapatakixa, Diosaxa walja lurañanakanïnwa.