Chʼama tukuñan qalltapa

EDÉN huertat alisnukutäxasinxa, Adanampi Evampix walja jan waltʼäwinakanïpxänwa janiw sum jakasxapxänti. Manqʼañatakisa wal irnaqapxañapäna. Suma quqanakat sipansa chʼaphinakampi jan wali quranakampikiw jilantxäna. Diosaru jan istʼasinwa ukhaman uñjasipxäna, ukat janiw Diosan munasitanakapäxapxänti.

Ukatxa, Adanampi Evampixa jiwañ qalltxapxäna. Amtañäni: Diosax janiw aka mä quqat manqʼapxätat sarakïnsä. Jïsa, uka achu manqʼantapkäna ukürpachaw jiwañ qalltxapxäna. ¡Diosar jan istʼasaxa jan walpun lurapxatayna!

Edén huertat alisnukutäxapxäna uka qhipatwa Adanampi Evampixa wawanïsipkäna. Ukhamasti wawanakapaxa chuymankiptasin jiwapxañaparakïnwa.

Jehová Diosarutï Adanampi Evampix istʼapxasapänxa, kusisitaw jupanakas wawanakapas jakasipxasapäna. Wiñayatakiw aka Uraqin kusisita qamasipxasapäna. Janiw khitis chuymaniptañapäkänti, usuntañapäkänsa ni jiwañapäkarakïnsa.

Kusisit jakasiñaswa Diosax muni, jutïrin ukham kusisitaw jaqix jakasxani siw Diosaxa. Janiw Uraqiki ukham sumäkaniti, jan ukasti jaqinakasa jan usuntasa kʼumarakiw sarnaqasipxani. Taqinisa maynit maynikamaw munasipxani ukat Diosarus munasipxarakiniwa.

Evaxa janiw Diosampix sum apasxänti. Ukatwa jupatakix ususiñasa chʼamäxänxa. Wal tʼaqhisïna. Jïsa, Jehová Diosar jan istʼasaw ukham tʼaqhisiñaru purtʼasiwayi, ¿janich ukhamäki?

Adanampi Evampixa walja wawanakanipxänwa. Nayrïr wawapaxa Caín satänwa. Cainan sullkapasti Abel satarakïnwa. ¿Kuns jupanakax lurapxatayna uk yattati?