Suma yuqampi jan wali yuqampi

UÑTAM Cainampi Abelampiru. Waynäxapxiwa. Cainax yapu yapuchiriwa. Jupax muxsa achunaka, kunaymani achunaka achuyiriwa.

Abel sat sullkapasti uwij awatiriwa. Uwij qallunak wal munasirïna. Uka uwij qallunakapax jilarxasinxa waljäxänwa, uk Abelax uñjäna.

Mä uruxa, Cainampi Abelampix Diosaruw ofrenda churapxäna. Cainax yapupatwa achunak apäna. Abelasti suma likʼi uwijapwa aparakïna. Abelampi ofrendapampiw Jehová Diosar kusisiyäna, ukampis Cainampi ofrendapampix janiw kusisiykänti. ¿Kunatsa, uk yattati?

Abelan ofrendapax sumänwa Cainankirit sipansa, ukampisa janiw uka tuqitaki Abelan ofrendapax sumäkänti. Jan ukasti Abelax suma jaqïnwa. Jehová Diosarusa jilaparusa munasïnwa. Ukampisa Cainax qhurünwa; janiw sullkapar munaskänti.

Ukatpï Jehová Diosaxa, janiw ukhamañamäkiti sänxa. Ukampis Cainax janiw istʼkänti. Abelar Diosan munasitap uñjasaxa wali phiñasitaw Cainax sarnaqäna. Akham sänwa Abelaruxa: ‘Pampar saraskañäni’ sasa. Pampankkasinxa, sullkaparuw wal nuwjäna. Jiwayañkamaw nuwjäna. Jan wali jaqipunïnwa, ¿kamsasmas jumaxa?

Abelax jiwatäxchisa, Diosax jupat amtasiskiwa. Abelax suma jaqïnwa, ukham jaqinakarux Jehová Diosax janiw armkiti. Ukatwa jutïrpachan Abelar jaktayxani. Ukatxa Abelax janiw jiwxaniti. Wiñayaw aka Uraqin jakasxani. ¿Janit jupjama jaqinakar uñtʼañ munksna?

Cainjam jaqinakarux Diosax janiw munaskiti. Ukatwa, Cainax sullkapar jiwaykatayna ukhaxa, Diosax familiapat jayar alisnuküna. Cainax jayar jakasiriw sarxäna, mä kullakap irpasïna, jupaw warmipäxäna.

Qhipatxa Cainampi warmipampixa wawanakanïxapxänwa. Ukat Adanampi Evampin yaqha wawanakapaxa wawanakanïxapxarakïnwa. Ukhamatwa aka Uraqinxa jaqinakax mirantxapxäna. Mä qhawqhanir uñtʼañäni.