Haranaruw Jacobux sari

¿JACOBUX khitinakampis parlaski uk yattati? Walja urunak sarasaxa, phuju jakʼanwa uwij awatirinakampi jikisi. Jacobux akham sasaw jisktʼäna: ‘¿Kawkinkirïpxtasa?’ sasa.

‘Harán markatäpxtwa,’ sapxänwa.

‘¿Labán tatar uñtʼapxtati?’ sasaw Jacobux jisktʼi.

‘Uñtʼapxtwa’. ‘Uñjma, khärakis Raquel phuchapax uwijanak antʼata jutaskixä’ sasaw sapxi. ¿Raquelaw jakʼachasiniski uk uñjtati?

Kunapachatï Jacobux Labán sat tiopan uwijanakap antʼata Raquelar uñji ukhaxa, jankʼakiw phujut qal atiqi uwijanakax umtʼapxañapataki. Ukatxa Raquelaruw Jacobux jampʼattʼi ukat khitis jupax uksa yatiyarakiwa. Raquelax kusisiñat chuyma chʼallxtayasïna, ukat utar kuttʼasaxa, Labán tataparuw uka tuqit yatiyäna.

Labán tatax kusisitaw Jacoburux qurpachäna. Ukat Jacobux Raquel phuchamampiw casarasiñ munta sänwa, uk yatisaxa Labanax wal kusisirakïna. Ukampis paqallqu mara Raquel layku irnaqarapita sasaw mayïna. Iyaw sasaw paqallq mara irnaqäna, kunattix Raquelar wal munasïna. Kunapachatï casarasiñ urux purinxän ukhaxa, ¿kamachataynasa uk yattati?

Labán tataxa Lea sat jilïr phuchaparuw Raquel lanti churatayna. Ukatxa, paqallqu marampiw Jacobux irnaqañapäna, ukat Labán tatax Raquelarux jupampi casarayxarakïnwa. Khä urunakanxa chachanakax awisax pay jan ukax walja warminakanïpxänwa, janiw Diosax uka tuqit kamskänsa. Ukampis jichhaxa, kunjamtï Bibliax qhan siskixa, chachax mä warminikïñapawa.