Jilanakapaw Joseyar uñisipxi

¡UÑTAM janiw kuns kamachxaspati, wali llakitaw aka waynaxa! Joseyawa. Egiptor sariri jaqinakaruw jilanakapax aljapxi. Egiptonxa Joseyarux uywatat tukuyapxani. ¿Kunatsa ukham jilanakapax lurapxi? Uñisipxiwa.

Jacob tatapaxa mayninakat sipansa Joseyaruw wal munasïna. Ukatwa mä suma jachʼa isi lursurapïna. Ukat jilanakapaxa Jacobun Joseyar wal munatapa uñjasaxa, Joseyjam uñjatäñwa munapxarakïna ukatwa Joseyarux uñisipxäna. Ukampis janiw ukataki uñisipkänti.

Joseyax pä samk samkasïna. Uka pä samkanxa jilanakapaw jupa nayraqatan altʼasipxäna. Kunapachatï uka samkanakat jilanakapar yatiyän ukhaxa jukʼamp Joseyarux uñisxapxäna.

Mä uruxa, kunapachatï Joseyan jilanakapax awkipan uwijanakap awatisipkän ukhaxa, Jacob tatapax jilanakapar uñjiriw Joseyar khitäna. Jilanakapax Joseyar jutir uñjasaxa, chikatax akham sapxänwa: ‘¡Jiwayapxañäni!’ sasa. Ukampis Rubén jilïr jilapaxa, akham sänwa: ‘¡Jani, jan uk lurapxamti!’ sasa. Janiw Joseyarux jiwayapkänti, antisasa, jan umani mä waña phujuruw jaquntapxäna. Ukat kamachapxanisa Joseyarux uka tuqit parlakipapxäna.

Ukat khämat ismaelitanak jutir uñjapxäna. ‘Ismaelitanakaru aljañäni’ sasaw Judá jilapasti mayni jilatanakaparux säna. Ukat ukhampï lurapxänxa. ¡20 qullqiruw Joseyarux aljapxäna! ¡Jan sinttʼasiri, qala chuymanakäpxänwa!

Jichhaxa, ¿jilanakapax tataparux kamsapxakini? Mä cabrito jiwayapxäna ukat Joseyan suma jachʼa isipwa cabriton wilapar chillsupxäna. Ukat tatapan ukaruw akham sasa uka isxa apapxäna: ‘Aka isi jikxatapxta. Uñtʼastati, aka isix Joseyankit janicha’ sasa.

Jacobux Joseyan isipxa uñtʼasïnwa. ‘Kuna monte animalaxay wawajarux jiskʼa jiskʼa wikhanuqasin manqʼantchi’ sasaw jachäna. Joseyan jilanakapax ukham awkipan amuyañapwa munapxäna. Jacob tatax wali llakitapunïnwa. Walja urunakaw jachäna. Ukampis Joseyax janiw jiwatäkänti. Joseyar kawkirutï apapkäna ukan kunjamakis sarnaqäna uk uñjarakiñäni.