Nakhaskir chʼaphi

MOISESAXA Horeb qulluruw pasto layku uwijanak anakitayna. Ukanwa nakhaskir mä chʼaphi uñjäna, ¡ukampis janiw nakhantkänti!

‘¡Kunarakïpach wali mayjarakisä! uñjanipunï’ sasaw Moisesax saräna. Kunapachatï jakʼachasïna ukhaxa, chʼaphi taypitwa akham siri istʼäna: ‘Jan jakʼachasinimti. Wiskhu kayumat apsusma, kawkjanktatix uka uraqix qullänawa’ sasa. Diosaw angelapnam parlaskäna, ukatwa Moisesax ajanup imantasïna.

Ukat Diosax akham sänwa: ‘Nayax markaj uñjta, Egipton tʼaqhisiskiri. Jupanakar qhispiyäwa, ukat jumaruw khitäma jupanakar irpsuniñamataki’ sasa. Jehová Diosaxa markaparux Canaán suma uraqir irpañwa munäna.

Ukampis Moisesax sänwa: ‘Janiw nayax khitïktsa. ¿Kunjamarak saririststi? Saräxa “khitis khitantam” sapxchitanixaya, ¿kamsäsa?’ sasa.

‘Akham sätawa,’ sänwa Diosaxa, ‘Abraham, Isaac, Jacob uka nayra awkinakaman Jehová Diosapawa nayarux khitanitu’ sasa. Ukat Diosax saskakïnwa: ‘Ukaw nayan wiñayatak sutijaxa’ sasa.

‘Ukampisa ¿“Jehová Diosaw khitanitu” satpachas jan katuqapkitanisti, kamachäsa?’ sasaw Moisesax sarakïna.

‘¿Kunas amparamankixa?’ sasaw Diosax jisktʼäna.

Moisesax ‘mä thujruw’ sänwa.

‘Uraqir jaqnuqam’ sänwa Diosaxa. Kunapachatï Moisesax thujrup jaqnuqäna ukhaxa, mä asiruruw tuküna. Ukxaruxa, Jehová Diosax yaqha milagrwa uñachtʼayäna. Akham sänwa: ‘Ampar isimar luqantasim’ sasa. Moisesax iyaw sasaw luräna, ukat kunapachatï ampar aysusxäna ukhaxa, ¡amparapax khunur uñtasitänwa, janqʼu! Lepra usunïkaspas ukhamänwa. Ukatxa, Jehová Diosax yaqha milagrompi lurañapatakiw chʼam churäna. Qhiparux akham sänwa: ‘Aka milagronak uñjasaw israelitanakax Jehová Diosan khitapäskapuniw sapxani’ sasa.

Ukatsti, Moisesaxa utaruw kuttʼxäna, ukat Jetroruw akham säna: ‘Mirä amp suma, Egipto markaruw sarañ munta familiaranakajaru tumpiri’ sasa. Ukhamax sarmaya, waliki, sasaw Jetrox säna, ukat Egiptoruw kuttʼäna.