Jordán jawir makatasipki

¡UÑTMA! ¡Israelitanakax Jordán jawir makatasipki! Ukampis ¿umasti? Ukha nayrakiw aka jawiranxa umax phuq saraskäna, ukhamarak ukapachax jallux wal purintirïna. ¡Janirakis umax utjkitixä! ¡Wila Lamar Qut makatapkäna ukhamarakis waña uraqnam makatasipkixä! ¿Kawkinkis umaxa? Yatxatañäni.

Jordán jawira makatañ horas purinxäna ukhaxa, Jehová Diosax akham sasaw Josué tatampi israelitanakar sayäna: ‘Diosampi arustʼäwir mantat arkas kalltʼatawa sacerdotenakax jiwasanak nayra sarani. Ukat kunapachatï Jordán jawirar taktʼapkani ukhaxa, umax wañtʼaniwa’ sasa.

Ukhamasti arkas aptʼataw sacerdotenakax jaqinak nayra sarapxäna. Ukat kunapachatï jawirar puripkäna ukhaxa, sacerdotenakax umaruw mantapxäna. Jawir umax waljapuniw saraskäna. ¡Ukampis um taktʼapkäna ukhaxa, umax wañtʼxänwa! ¡Mä milagrünwa! Jalaniskir um Jehová Diosaw alayat saytʼayäna. ¡Jawirax wañäxänwa!

Arka aptʼat sacerdotenakaxa jawir taypiruw saytʼapxäna. ¿Akan uñjtati? ¡Taypinkasipkän ukäñkamasti waña uraqnamwa israelitanakax Jordán jawirxa makatapxäna!

Taqini makatxapxäna ukhaxa, Jehová Diosax Josué tatampiw 12 chʼaman israelitanakaruxa akham sayäna: ‘Sacerdotenakax sayasipki ukjat 12 qalanaka aptanipxam kawkjarutï jichha arumax samarapkañäni ukjar uchañataki. ¿Kunatak uchatasa aka qalanakaxa? sasa wawanakasax jisktʼapxistani ukhaxa, wawanakamar akham sapxätawa: Kunapachatix Diosampi arustʼawir mantat arkapax Jordán jawirankkäna ukhaxa umax wañtʼänwa sasa. ¡Aka qalanakax Diosan milagropwa amtayani!’ sasa. Josué tatasti 12 jiskʼa qalanakampwa sacerdotenakax sayasipkäna ukawjat irtawayarakïna.

Ukatxa arka aptʼat sacerdotenakaruw Josué tatax akham säna: ‘Jordán jawirat mistxañäni’ sasa. Mistxapxäna ukhaxa, wasitampiw umax jalxarakïna.