Rut warmimpi Noemí warmimpi

BIBLIANXA Rut sata mä librow utji. Taripirinakax Israelan utjkäna uka tiempon mä familiat parli. Rut tawaquxa Moab markankirïnwa; janiw Diosan markapankirïkänti. Ukampis Rutaxa Jehová Diosat yatiqasaxa wal Diosar munasïna. Noemí warmiw Jehová Diosar uñtʼayäna, Noemixa chuymanïxänwa.

Noemix israelitänwa. Chachapampi pä yuqapampiwa, Israelan manqʼat pistʼañax utjäna ukhaxa Moab markaru sarxapxäna. Mä uruxa, chachapaw jiwxäna. Ukatxa yuqanakapax Moab markankir tawaqunakampiw casarasipxäna, Rut, Orfa satäpxänwa. Tunka mara pasatasti paypach yuqanakapaw jiwxapxäna. ¡Wali llakiskañänwa! ¿Kamachakpachänsa Noemixa?

Noemixa markapar kuttʼxañwa amtäna. Rutampi Orfampixa janiwa Noemita saraqañ munapkänti, ukat jupamp chikaw mistunxapxäna. Ukat jay jutkasaxa Noemix akham sänwa: ‘Kawkittï jutapktaxa ukar kuttʼxapxam taykanakaman ukaru’ sasa.

Noemix jampʼattʼasaw sarxapxam sänxa. Ukat jupanakax wal jachaqtʼasipxäna, Noemir munasitanakap layku. Ukat akham sapxänwa: ‘¡Janiwa! Nanakax jumamp chikaw markamar sarapxä’ sasa. Ukat Noemix akham saskakïnwa: ‘Munat wawanaka, kuttʼxapxañamawa. Khänwa sum jakasipxäta’ sasa. Ukhamasti Orfaxa kuttʼawayxänwa. Ukampis Rutax janiw kuttʼkänti.

Noemisti Rutarux akham saskakïnwa: ‘Orfax sarxiwa. Jupamp chik kuttʼxma’ sasa. Ukat Rutasti: ‘¡Jan jumat jithiqtayistati! Jumamp chik saraskañäni. Kawkjarutï sarkäta ukaruw saräxa, kawkintï jakkäta ukan jakarakïxa. Markamas markajäniw ukat Diosamas Diosajarakïniwa. Kawkjantï jiwätaxa ukanwa jiwarakïxa, ukanwa imantxapxitanixa’ sasa. Ukham sataxa, Noemix janiw jukʼampi kuttʼayañaru tirxänti.

Ukat panippachaw Israel markar purxapxäna. Ukan utjasxapxäna. Rutasti jankʼakiw yapunakan irnaqir saräna, cebada yawiñ horasänwa. Booz sat mä chachaw yapujat cebada thaqhasiskam säna. ¿Khitïnsa Booz tatan mamapaxa, uk yattati? Jericó markankir Rahab warmïnwa.

Rutaruw mä urux Booz tatax akham säna: ‘Nayax yattwa kunanaktï Noemí layku lurktax ukanaka. Awkimsa taykamsa, ukhamarak uraqimsa aka jan uñtʼat markan nanakamp jakañatakiw apanukuntaxa. ¡Jehová Diosaw bendecïtamxa!’ sasa.

Rutasti ukxaruxa sarakïnwa: ‘Tata, jumax wali suma jaqipunïtawa, munasiñ arumpiw parlistaxa’ sasa. Booz tataxa wal munasïna Rutaruxa, ukat mä qhawqhatxa casarasxapxänwa. ¡Noemix wal kusisïna! Ukat kunapachatï Booz tatampi Rutampixa mä wawanipkäna ukhaxa jukʼamp Noemixa kusisïna, uka wawaxa Obed satänwa. Obetax Davitan achachilapänwa; Davitatxa jutïrinakanwa jukʼamp yatiqaskañäni.