Mä waynituw ikjatayna

¡AY! ¿Akan kamachaskisa? ¿Uraqin jaqusiski uka waynitux walti usuchjaspachä? ¡Uñtma, utat mistuniski ukax Pablowa! ¿Timoteor uñjaraktati? ¿Ventanatti uka waynitux jalaqtanpacha?

Jïsa, ventanat jalaqtanitayna. Troas markanwa Pablox Jesusan arkirinakapar yatichaskäna. Jupax qhipüruw jachʼa botet sarxañapäna ukat jaya tiempow chhaqañapäna. Ukatwa chika arumkam yatichaskäna.

Aka waynitux Eutico satawa, jupasti ventanan quntʼatäskänwa, ukaruw ikjatayna. ¡Kimsa altusan utatwa jalaqtanitayna! Ukatwa jaqinakax wali llakitäpxäna. Uka waynitur jaqinakax waytapxäna ukhaxa, jiwatäpachaw sapxänwa. ¡Chiqasa, jiwatänwa!

Pablox uka waynitun jiwatap uñjasax qhumthapïnwa. Ukatxa akham sänwa: ‘Jan llakisipxamti. ¡Jupax walïskiwa!’ sasa. ¡Jïsa ukhamänwa! ¡Mä milagrünwa! ¡Pablox jaktayänwa! Ukat taqiniw wal kusisipxäna.

Taqiniw wasitampi makatxapxäna, ukatxa manqʼarapxänwa. Qhanjtaniñapkamaw Pablox yatichaskakïna. ¡Ukampis Euticox janiw wasitampi ikjxpachänti! Ukhamasti Pablompi Timoteompi ukat jupanakampi chik saririnakampiw jachʼa boter sarxatawayxapxäna. ¿Kawkirus sarapxpachäna uk yattati?

Pablox kimsïr saräwipwa tukuyaskäna. Uka saräwinxa kimsa maraw Éfeso markanxa sarnaqatayna. Ukhamasti payïr saräwit sipansa kimsïr saräwixa jaypachänwa.

Troas markat mistxasaxa, jachʼa botex Mileto markaruw saytʼäna. Éfeso markax janiw Mileto markat jayäkänti, ukatwa Pablox Éfeso taman jilïrinakap jawsayäna ukhamat janïr sarxasaxa chʼamañchtʼawayañataki. Ukatxa, jachʼa botex sarxäna ukhaxa, ¡wali llaktʼataw uñjasipxäna Pablon sarxatapatxa!

Cesarea markaruw jachʼa botex purxäna. Uka markan Felipen utapan Pablox qhiparaskän ukhaxa, Ágabo profetax akham sänwa, Jerusalenar sarätaxa katuntapxätamwa sasa. Ágabo profetax siskäna ukhamapuniw phuqasïna. Pä mara Cesarea carcelan Pablor katuntasaxa, Roma markaruw apxaruyapxäna César apnaqirix kunjamarus jupak uñjxañapataki. Roma markar apasipkän ukhax kunas pasatayna uk uñjarakiñäni.