Uraqinkir machaq kusipacha

JACHʼA quqanaka, suma panqaranaka, jachʼa qullunaka ukanakaris akan utjixä. ¿Wali sumapunixay akaxa? Khä tarujar uñtam uka jiskʼa waynitun amparapatwa manqʼaski. Ukat leonanak uñtam ukat chʼuxña pampan sayasipki uka caballonak uñtarakma. ¿Ukham utjäwin qamasiñ munasmati?

Diosax janiw munkiti akapachan jaqix llakita sarnaqki ukham sarnaqañamxa, jan ukasti aka Uraqin mä suma huertan wiñayataki jakasisma uk munixa. Ukhamwa jakasxapxani machaq kusipachan siw Bibliaxa. ‘Diosax jupanakampïniwa. Janiw jukʼampi jiwañax utjxaniti, ni jachañasa, ni usuñasa. Nayrax utjkäna ukanakax tukusxaniwa’.

Jesusaw ukhamaptayani. ¿Kunapachas uk lurpachani uk yattati? Jïsa, kunapachatix aka Uraqit jan walinaka, taqi jan wali jaqinaka pichsxani ukapachaw phuqasini. Amtañäni, Jesusax uraqinkkasaxa taqi usut jaqiruw kʼumaraptayäna, yaqhipanakxa jiwatatsa jaktayarakïnwa. Ukhamatwa uñachtʼayäna Diosan uttʼayat Apnaqirjamax kunanaksa aka Uraqin lurani ukanakxa.

¡Amuytʼasma, wali askipunïniw machaq kusipachankañaxa! Jesusampi, ukat jupan mä qhawqha ajllitanakampiwa alaxpachat apnaqanipxani. Taqi aka uraqinkirinakaruw sum uñjanipxani, wali kusisita sarnaqasipxañapatakiw yanaptʼani. Jiwasax kun lurapxañasasa Diosan machaq kusipachapan wiñay jakasiñasatakixa uk jichhax yatxatarakiñäni.