Aka suma yatichäwinak yatiñamwa munapxi

JESUSAX aka Uraqinkkäna ukhaxa, arkirinakapax akham sasaw jisktʼapxäna: “¿Kawkïrïnis chimpuxa jumax kuttʼankät ukhaxa, ukhamarak akapach tukuskan uka urutsa?” sasa. Markanak puraw chʼaxwapxani, manqʼat pistʼañasa usunakasa uraq khatatinakasa waliw utjani, ukat jaqinakas wali ñanqhäpxarakiniwa sasaw Jesusax säna. Ukatsti kʼari yatichirinakaw waljanir sallqjapxani, arkirinakajas wali uñisita arknaqata ukhamaw uñjasipxani sasaw sarakïna. Ukxarusti kunatix chiqäki ukarus janiw jaqinakax munxapxaniti sasaw sarakitayna. Ukhamasti, Jesusax alaxpachan Apnaqirjam uttʼayatäxiwa, mä arunxa, Diosan Apnaqäwipax wali jakʼankxiwa, ukwa taqi uka jan wali luräwinakax uñachtʼayistu. Chiqpachansa, ukanakax wali kusiskañ suma yatiyäwinakawa. Jesusasti uka chimpunakat parlkasax akham sarakïnwa: “Diosan reinopat aka suma yatiyäwisti aka urqpachanwa yatiyasini, ukhamat taqi markanakan yatipxañapataki, ukatsti akapchan tukusiñapaw jutani” sasa (Mateo 24:3-14).

Chiqansa, aka jan wali urunakan jakañax janiw walïkiti, ukampis Jesusax alaxpachan Apnaqirjam uttʼatäxiwa, uk yatisax wal kusistanxa. Jesusan arunakapax 1914 marat aksaruw phuqasiñ qalltawayi. Ukhamatwa jaqinakan apnaqäwipax tukusiñ qalltawayi, ukatsti alaxpachanwa Cristox apnaqirit uttʼasiwayi, niyawa aka Uraqxarux waranq maranaka apnaqxani.

Salmo 110:1, 2 ukat Apocalipsis 12:7-12 qillqatanakanxa kunjamas Diosan Apnaqäwipax Jesusar katuyatäni uka tuqinakatwa sumpach amuytʼayistu, uka urunakax kunjamäñapänsa ukanakwa qhanañchi. Uka qillqatanakarjamasti Jesusax alaxpachanwa Diosan kupïxapan quntʼasiñapäna, Diosan Apnaqäwipa katuqañapkama. Ukatxa Alaxpachanwa mä chʼaxwäwix utjañapäna ukansti Supayax atipjatäsinwa aka Uraqir jaquqanitäñapäna, ukatwa aka Uraqinxa kunayman jan waltʼäwinakax utji. Ukhamatwa Cristox uñisirinakap taypin apnaqañapäna. Ukampis taqi jan walinakax wali tʼaqhisiñ urunakanwa tukusiñ qalltani, ukatsti Armagedón satäkis uka urunwa wali tʼaqhisiñ urunakax tukusirakini, ukxarusti Jesucristow waranqa maranaka aka Uraqi apnaqarakini, ukhamasti wali suma jakasiñaw utjani (Mateo 24:21, 33, 34; Apocalipsis 16:14-16).

Ukampis Bibliax akham amuytʼayistu: “Yatiñamarakiwa, qhipa urunakanxa jan wali tiemponakaw jutani. Jaqinakax michʼaw tukupxani, qullqi chuymaraki, jachʼa jachʼaw tukupxani, jilamp parlirinakaraki. Diosat jan wali parlapxani, awkinakaparus janiw istʼxapxaniti, jan yäqasirïnakäpxaniwa, Diosar arkañarus janirakiw jaysxapxaniti. Jan munasiñanïpxaniwa ukhamarak jan khuyapayasiñani, arunak apnaqirinaka, jan wali luräwinakapxa janiw apanukupkaniti, wali qhurunakäpxaniwa, aski luräwinakan uñisirinakaparakïniwa. Aljantasirïpxarakiniwa, jan axsarasaw kuna jan walsa arsupxarakini, jachʼa jachʼa tukuñampi phuqhantatäpxarakiniwa, jupanakan pachpa munañanakapakwa thaqhapxani Diosan munañap thaqañat sipansa. Suma Dios chuymäkaspas ukhamaw tukupxani, ukampis chiqpach Diosar arkañ chʼamapxa apanukupxaniwa. Uka kasta jaqinakampix jan kunans mayachasimti” sasa (2 Timoteo 3:1-5).

Ukham urunakax nayra maranakansa utjapunirïnwa sasaw yaqhipanakax sapxi, ukampisa jichhürunakan uñjktan uka jan walinakax janipuniw kunapachas uñjasirïkänti. Sarnaqäwinakat yatxattʼiri ukat qillqiri jaqinakasa 1914 uka maranakat aksaruxa jaqinakan jakäwipaxa wali mayjapunïxiwa sasaw sapxaraki (7 jana uñxattʼäta). Chiqpachansa, janipuniw kunapachas ukham jan waltʼäwinakasa chʼaxwäwinakasa aka Uraqin utjirïkänti. Ukham jan waltʼäwinakaw chimpu urunakätap uñachtʼayani sasin qhanañchkasaxa Jesusax aka tuqinakat amuytʼayarakïna: Diosan Apnaqäwipata ukhamaraki Criston kuttʼanïwipat uraqpachan yatiyasini siski ukax qhanpachaw uñjasi, janipuniw nayrax ukham lurasirïkänti. Ukatxa Jehová Diosan Qhanañchirinakapax Diosan arunakap yatiyasaxa wali arknaqataw uñjasipxi, nayrax janiw ukax istʼasirïkänti. Patak patakanakaw campos de concentración Nazi siski ukan jiwarayat uñjasipxäna. Jichhürunakkamaw yaqhip markanakan Diosan arunakapat yatiyañax jarkʼatäski, uka markanakanxa Jehová Diosan Qhanañchirinakapax carcelanakar jistʼantata, nuwjata ukat yaqhipanakax jiwayata ukhamaw uñjasipxi. Taqi ukanakaw chimpu urunakat uñachtʼayistu, kunjamtï Jesusax arsuwaykäna ukhama.

Kunjamtï Apocalipsis 11:18 qillqatan siskixa: Jehová Diosan Qhanañchirinakap contraw ‘aka uraqinkirinakaxa qhuruchasipxani’ siwa, ukatwa Diosax uka jan wali jaqinakar ‘mutuyani’, mä arunxa, tukjaniwa. Uka pachpa qillqatanwa Jehová Diosat akham qhanañcharaki: “Aka uraqi [tukjirinakarusa, MT], jumax tʼunjarakïtawa” sasa. Janipuniw kunapachas aka Uraqix ukham ñanqhachatax uñjasirïkänti, jichhax suma jakañax janiw utjxiti. Jaqinakax aka Uraqi qʼañuchasipkakini ukhaxa, janiw jakañjamäxaniti sasaw ciencia tuqit yatxatat jaqinakax sapxaraki. Ukampis Jehová Diosax ‘jaqinïñapatakiw’ aka Uraqi luratayna. Ukhamasti, janïr aka Uraqix jan wali jaqinakan tʼunjatäkipanwa uka jan wali jaqinakar chhaqtayani (Isaías 45:18).

DIOSAN APNAQÄWIPAX WALJA ASKINAKWA AKA URAQIR APANINI

Bibliat yatkasinsa, jaqinakax alaxpacharuw sarañäni sapxiwa, janiw Diosan Apnaqäwipan apnaqatax aka Uraqin jakañax utjkaspati sasaw sapxi. Ukampis mä qhawqhaniw alaxpachar sarapxani sasaw Bibliax yatichi, ukatxa aka Uraqinxa jan jaktʼkaña walja jaqinakaw wiñay wiñaya jakasipxani sarakiwa (Salmo 37:11, 29; Apocalipsis 7:9; 14:1-5). Cristor katuyata Diosan Apnaqäwipaw aka Uraqir phuqantani ukat apnaqani sasaw Daniel profetax qillqatayna.

Uka qillqatanxa Diosan Apnaqäwipax mä jachʼa qullut khuchuqata mä jachʼa qalar uñtasitawa saraqani sasaw qhanañchi, uka qullusti Diosan jachʼakankañap sañ muni. Uka qalaxa mä “Jachʼa jaqin kayuparuw puri”, “ukhamat uka jachʼa jaqirux qʼala tʼunji”, uka jachʼa jaqisti aka Uraqpachankiri apnaqirinaka sañ muni, ukat ukham tʼunjasinsti uka qalax aka Uraqpacharuw phuqhantaraki. Daniel profetaxa akham saskakiwa: “Uka reyinakan apnaqañapkamasti, alaxpachankiri Diosax mä yaqha reino saytʼayarakini, uka reinosti janipuniw tukjatäkaniti ni apnaqatäkarakinisa yaqha markanakampixa. Jan ukasti jupaw taqi yaqha reinonakarux tukjani, wiñayan wiñayapaw uka reinox utjarakini” sasa (Daniel 2:34, 35, 44).

Ukhamasti, kunjamas uka Apnaqäwin Apnaqatax mä suma paraison wiñayataki jakasiñax utjani ukanakatwa Jehová Diosan Qhanañchirinakapax yatiyañ munapxtamxa. Jichhürunakan jakaskir walja millón millón jaqinakampi ukat millón millón jiwatat jaktanitanakampiw uka suma Uraqin wiñay jakasipxani. Ukhamasti Jesusax waranqa maranak apnaqkani ukapachaw Jehová Diosan munañapax aka Uraqitakis jaqinakatakis phuqasini. Uka paraisonxa wali kʼuchikiw jakasipxani. Kunjamatï Adanax Edén huerta sum uñjañapäkanxa ukhamarakiw mä suma luräwi katuqapxani, animalanaksa, kuna chʼuxñanaksa jupanakaw sum uñjapxani. Jaqinakax ‘kuntï amparanakapampi lurasipkani ukanakwa manqʼasipxani’ (Isaías 65:22; Génesis 2:15).

Jesusax akham sasaw Diosar mayisiñ yatichäna: “Munañamampisti apnaqapxita. Munañamasti luratäpan akapachanxa, kunjämtï alaxpachana luratäki ukhama” sasa (Mateo 6:10). Ukaxa phuqasiniwa, ukampis walja chiqanakanwa Biblianxa ukham yatichi. Mä chiqax akham siwa: “Mä jachʼa aru istʼarakta alaxpachat artʼasiniri: ‘!Akaxay, Diosax jichhax jaqinak taypinwa jaki!’ Jupanakampiw jakani, jupanakasti markapäniwa. Dios kikparakiw jupanakampïni, jupanakan Diosaparakïniwa. Diosax taqi jachanakapwa nayranakapatxa picharani, janirakiw jiwañas, jachañas utjkaniti warariñasa ni usuyasiñasa. Taqi kunanakatï nayrax utjkän ukanakax tukusxiwa’ sasa. Ukatsti tronon quntʼatäkäns ukax siwa: ‘Uñjam, nayax taqi kunwa machaqat lurta’ Sarakiwa: ‘Qillqam, aka arunakasti chiqapawa, katuyaskañarakiwa’” sasa (Apocalipsis 21:3-5).

[15 janan qhanañchäwipa]

“Qhipa urunakanxa jan wali tiemponakaw jutani”,

UKAMPIS “akapachan tukusiñapaw jutani”

[18 janan fotopa]

Países Bajos

[18 janan fotopa]

Nigeria