4 YATICHÄWI

¿Khitis Jesucristojja?

1. ¿Kunjamsa Jesusan jakäwipajj qalltawayi?

1. Jesusajj alajjpachankaskiwa; 2. Jesús jiskʼa wawajj Joseyampi ukat María taykapampïskiwa; 3. Jesusajj wawanakaruw yatichaski — ¿Kunatsa Jesusar wal jakʼachasipjjerïna? (MATEO 11:29; MARCOS 10:13-16)

Jaqenakat sipansa, janïr aka Oraqen naskipanjja Jesusajj mä ajayjamaw alajjpachan jakäna (Juan 8:23). Jehová Diosan nayrïr luräwipawa ukat taqe kun lurañapatakisa juparakiw Diosar yanaptʼäna. Biblianjja “Awkin mä sap[a] Yoqapa” satawa. Kunattejj Diosajj jupa saparukiw nayraqat luratayna (Juan 1:14). “Aru” sat sutimpirakiw uñtʼasi, kunattejj jupaw awkipat yatiyirïna. Proverbios 8:22, 23 ukat Colosenses 1:15, 16 liytʼäta.

2. ¿Kunatsa Jesusajj aka Oraqer jutäna?

Diosaw wawapar aka Oraqer khithanïna. Ukatakejja, qollan ajayun yanaptʼataw Yoqapan jakawipjja María sat mä virgen tawaqon purakapar uchäna. Ukhamajja, Jesusan awkipajj janiw mä jaqëkänti (Lucas 1:30-35). Ukat Jesusajj akanak lurañatakiw aka Oraqer jutäna: 1) kunatï Diosat cheqäki uk yatichañataki, 2) jan waltʼäwin jikjjatasisas kunjamsa Diosan munañap lursna uk yateqasiñasataki, 3) ukat “jaqenakar qhespiyañataki” jan juchani jakäwip churiri. Mateo 20:28 liytʼäta.

3. ¿Kunatsa mä qhespiyawejj wakisïna?

Mä qhespiyawejja, kuntï maynejj yaqhan jakäwip qhespiyañatak churki ukawa (Éxodo 21:29, 30). Cheqansa jiwañas ukat awkiptañasa janiw Diosan amtapankkänti uk sum yattanjja. Diosaw Adanarojj sum ewjjtʼawayi, jan istʼaskäta ukhajja, “cheqpachan jiwäta” sataynawa. Ukhamajj Adanatï Diosar istʼasapän ukhajja, janiw jiwkaspänti (Génesis 2:16, 17; 5:5). Bibliarjamajja, Adán toqnamaw jiwañajj Oraqer ‘mantani’. Mä arunjja, Adanan pantjasitap laykuw taqe wawanakapajj juchararapjje, ukhamatwa jiwañas utjaraki. Ukatwa taqenis mä qhespiyir muntanjja. Romanos 5:12 ukat 6:23 liytʼäta.

Ukhamajj ¿khitis juchanakasat ukat jiwañat qhespiyistaspa? Jiwjjtan ukhajja, taqenis juchanakas laykuw jiwasktanjja. Ukat mä pantjasir jaqejja, janiw yaqha jaqenakar qhespiyañatakejj jakäwip loqtkaspati. Salmo 49:7-9 liytʼäta.

4. ¿Kunatsa Jesusajj jiwäna?

Jesusajj mä lawan ch’akkatataw jiwäna, jiwatanakat taypit jaktäna ukat jichhajj alajjpachanwa Oraqjjar reyjam apnaqaski

Jiwasanakat sipanjja, Jesusajj jan pantjasiri ukat jan juchani ukhamänwa. Ukhamajj janiw juchanakapat jiwkänti, jan ukasti jaqenakan juchanakap laykuw jiwawayi. Ukham wali munat wawapar khitanisinjja, Jehová Diosajj qhawqsa munasistu uk qhan uñachtʼayi. Ukat Jesusajj ukhamarakiw munasiñap uñachtʼayistu, awkipar istʼasa, jakäwip churasa, ukhamat juchatsa ukat jiwañatsa qhespiñasataki. Juan 3:16 ukat Romanos 5:18, 19 liytʼäta.

¿Kunatsa Jesusajj jiwäna? sat video uñtasma.

5. ¿Jichhürunakan kunsa Jesusajj luraski?

Jesusajj aka Oraqenkäna ukhajja, usutanak qolläna, jiwatanak jaktayäna ukat khitinakatï tʼaqhesipki ukanakarus yanaptʼarakïnwa, ukham lurasinwa Jehová Diosar taqe chuyma istʼapki ukanak laykojj kuns jutïrin lurani uk uñachtʼayäna (Mateo 15:30, 31; Juan 5:28). Ukat jiwjjäna uka qhepatjja, Diosaw mä ajayjam alajjpachan jakañapatak jaktayjjäna (1 Pedro 3:18). Ukatwa Jesusajj Diosat taqe munañaniñ katoqañataki suyäna, ukat Jehová Diosajj aka Oraq apnaqañapatakiw munañanïñjj churäna (Hebreos 10:12, 13). Jichhürunakanjja, Jesusajj alajjpachan apnaqaski, ukat arkirinakapajj uka suma yatiyäwi oraqpachan yatiyasipki. Daniel 7:13, 14 ukat Mateo 24:14 liytʼäta.

Niyaw Jesusajj uka chʼamampejj mä Reyjam taqe kunanakatï jaqenakar tʼaqhesiyki ukanak chhaqtayjjani. Ukat taqe khitinakatï Jesusar iyawsapki ukanakajja, wali kusisitaw mä paraison aka Oraqen jakasipjjani. Salmo 37:9-11 liytʼäta.

Jukʼamp yatjjatañatakejja, ¿Kunsa Bibliax chiqpachapuni yatichi?, sat libron 4 ukat 5 jaljanakap uñjjattʼäta.