¿Tʼaqesiñanakajj tukusjjpachäniti?

¿KUNSA BIBLIAJJ YATICHI?

“Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti” (Apocalipsis 21:4, Machaq Mundon Jakirinakataki).

¿KUNJAMSA UK YATIÑAJJ YANAPTʼÄTAM?

Diosajj janiw tʼaqesiykistuti sasaw taqe chuyma confiyäta (Santiago 1:13).

Diosajj tʼaqesitanakas sumwa yati, uk yatiñajj wal chuymachtʼätam (Zacarías 2:8).

Jutir urunakanjja janiw kunas tʼaqesiyjjätamti (Salmo 37:9-11).

¿KUNTÏ BIBLIAJJ YATICHKI UKAJJ CHEQAW SISSNATI?

Jïsa, uk pä toqet uñjañäni:

• Diosajj tʼaqesiñsa jan walinaksa uñisiwa. Markapajj tʼaqesiyat uñjaskäna ukhajja, ¿kunjamsa Jehová Diosajj jikjjatasïna? Markapar “tʼaqesiyapkäna, jan walin uñjasiyapkäna” ukhajja, Diosajj wal chuym ustʼayasïna sasaw Bibliajj qhanañchi (Jueces 2:18).

  Khitinakatï jaqe masipar tʼaqesiyapki ukanakarojj Jehová Diosajj jan walitpunwa uñji. Sañäni, ‘jan juchani jaqe jiwayañarojj’ Diosajj wal uñisi sasaw Bibliajj qhanañchi (Proverbios 6:16, 17).

• Sapa maynitwa Jehová Diosajj llakisi. “Cheqas sapa mayniw kunas tʼaqesiyi uk yatisi”, ukampis Jehová Diosajj taqe ukanak sumwa yatjje (2 Crónicas 6:29, 30).

  Reinop toqew Jehová Diosajj kunatï jaqenakar tʼaqesiyki ukanak chhaqtayjjani (Mateo 6:9, 10). Ukañkamajja, munasiñampiw jupar taqe chuyma thaqerinakarojj chuymachtʼi (Hechos 17:27; 2 Corintios 1:3, 4).