Yatiyatasajj janiw inamayäkiti: “Yapunakajj niyaw poqoratäjje”

1, 2. 1) ¿Kunatsa Jesusan arkirinakapajj arunakap jan sum amuyapkpachäna? 2) ¿Kuna toqetsa Jesusajj parlaskäna?

JESUSAJJ mä cheq uñachtʼayasajja, akham sasaw arkirinakapar säna: “Uñtapjjam, yapunakajj niyaw poqoratäjje” sasa. Ukampis arkirinakapajj uñtapjjäna ukhajja, cebada yapojj janiw poqoratäkänti. Ukat cosecha apthapiñ tiempos janïraw purinkänti. Ukatwa arkirinakapajj kuntï Jesusajj siskäna uk jan sum amuyapkpachänti (Juan 4:35).

² Ukampis Jesusajj janiw cebada apthapiñat parlkänti. Jan ukasti, jaqenak apthapiñatwa parlaskäna, uka toqetwa arkirinakaparojj pä aski yatichäwinak yatichañ munäna. Ukanak sum amuytʼañatakiw jichhajj Jesusan arunakapat sumpach yatjjatañäni.

Jesusan arkirinakapajj yatiyapjjañapänwa ukat kusisitäpjjañaparakïnwa

3. “Yapunakajj niyaw poqoratäjje” sasajja, ¿kuna toqetsa Jesusajj parlaskpachäna, ukat kunsa qhanañcharakïna?

³ Khä 30 mara tukuyaw Jesusajj Samariankir Sicar sat marka jakʼan arkirinakapar uka toqet parläna. Arkirinakapan uka markar sarapjjañapkamaw Jesusajj mä phuju jakʼan qheparasajj mä warmiru cheqa yatichäwinak yatichäna. Uka warmejj uka yatichäwinakan wali askïtap amuyasajja, jankʼakiw kuntï Jesusat yateqkäna uk vecinonakapar yatiyañatak Sicar markar saräna. Jupanakat waljaniw jukʼamp yatiñ munasajj Jesusar uñtʼir jutapjjäna. Ukhaw Jesusajj Samaria markat walja jaqenakar jakʼachasisinkir uñjasajj akham sispachäna: “Uñtapjjam, yapunakajj niyaw poqoratäjje” sasa. Janiw cheqpach yapu apthapiñat parlkänti, jan ukasti, Diosatak yapu apthapiñatwa parlaskäna, ukatwa akham sarakïna: “Khititejj apthapki ukajja [...] wiñay jakañatakiwa” yapu apthapiski sasa (Juan 4:5-30, 36).

4. 1) Cosecha apthapiñ toqetjja, ¿kuna pä yatichäwinaksa Jesusajj yatichäna? 2) ¿Kuna jisktʼanakarus qhanañchaskañäni?

⁴ Diosatak yapu apthapiñ toqetjja, ¿kuna pä yatichäwinaksa Jesusajj yatichäna? Maya, jankʼakiw yatiyasiñapäna. “Yapunakajj niyaw poqoratäjje” sasajja, cosecha apthapipjjañapatakiw arkirinakapar chʼamañchtʼaskäna. Ukat jankʼak apthapiñajj kunja wakiskirisa uk akham sasaw qhanañcharakïna: “Khititejj apthapki ukajja pagopjja katoqewa” sasa. Cosecha apthapiñajj qalltjjänwa, ukhamajj janiw ina chʼusar tiempo aptʼasipjjañapäkänti. Paya, cosecha apthapirinakajj kusisipjjañapänwa. ‘Yapuchirinakasa ukat cosecha apthapirinakas kusisipjjaniwa’ sasaw Jesusajj säna (Juan 4:35b, 36). ‘Samaria markankirinakat waljanir jupar iyawsapjjatap’ uñjasajja, Jesusajj kusisïnwa, ukhamarakiw arkirinakapajj luräwinakap sum phoqasajj kusisipjjañapäna (Juan 4:39-42). Jesusajj cosecha apthapiñat parlkäna ukajj jiwasatak wali askirakiwa. Kunjamsa jichhürunakan walja jaqenakar apthapisiski ukwa sum uñachtʼayistu. Ukampis ¿kunapachas cosecha apthapiñajj qalltäna? ¿Khitinakas cosecha apthapipjje? ¿Kuna askinakas cosecha apthapisitapat utjawayi?

Reyisaw cosecha apthapisiñapatak pʼeqtʼaski

5. 1) ¿Khitis Oraqpachan cosecha apthapisiñapatak pʼeqtʼaski? 2) ¿Kunjamsa Juanan visionapajj jankʼak yatiyasiñap uñachtʼayi?

⁵ Jesusaruw cosecha, mä arunjja, walja jaqenak apthapiñ pʼeqtʼañapatak ajlliwaytjja sasaw Jehová Diosajj apóstol Juanar mä visionan qhanañchäna (Apocalipsis 14:14-16 liytʼañataki). Juanajj Jesusaruw pʼeqepar qori coronampi asjjatata ukat mä yawiñas aytʼat uñjäna. “Pʼeqeparojj qori coronampi asjjatatänwa” siski uka arunakajja, Jesusajj Reyjam apnaqjjatapwa uñachtʼayistu. Ukat “mä yawiñ hoz aytʼatarakïnwa” siski ukajja, cosecha apthapirïtapwa uñachtʼayarakistu. Jehová Diosajj akham sasaw mä ángel toqejj säna: “Horasäjjew apthapiñajja, yapusti qʼelluratäjjarakiwa” sasa. Uka arunakampejja, cosecha jankʼaki apthapisiñapajj kunja wakiskirisa ukwa Diosajj qhanañchañ munäna. Cheqansa, “horasäjjew apthapiña[takejja]”, ukhamajj jankʼakiw uk lurañasa. Jehová Diosajj akham sasaw Jesusar sarakïna: “Uka yawiñ hosimampi yawthapjjam” sasa. Diosar istʼasaw Jesusajj aka Oraqet cosecha qʼal apthapiñ qalltäna, mä arunjja, arkirinakaparuw Oraqpachat apthapïna. Cheqas kuntï Juanajj mä visionan uñjkäna ukaw ‘yapunakan niya poqoratäjjatap’ sum uñachtʼayistu. Ukampis kunapachas Oraqpachan yapu apthapiñajj qalltäna uk yatiñatakiw apóstol Juanan visionapajj yanaptʼarakistaspa. Ukwa jichhajj uñjañäni.

6. 1) ¿Kunapachas cosecha apthapiñ tiempojj qalltäna? 2) ¿Kunapachas trigo apthapiñajj qalltäna? Uk qhanañchtʼam.

⁶ Yapu apthapiri Jesusajja mä corona asjjatatawa sasaw Apocalipsis 14:14 qellqatajj qhanañchi, ¿kunsa ukajj uñachtʼayistu? Jesusajj 1914 maranwa Reyjam uttʼayatäjjäna (Dan. 7:13, 14). Ukat mä qawqha tiempotwa Diosajj Jesusar akham säna: “Yawthapjjam cosechjja” sasa (Apo. 14:15). Kunanakatï uka visionan paskäna ukajja, Jesusajj trigo apthapiñ uñachtʼäwit parlkäna niya uka kikpawa. Jesusajj akham sänwa: “Yawthapiña horasasti akapach tukuskan uka uruwa” sasa. Ukhamajja, cosecha apthapiñ tiemposa ukat akapach tukuskani uka tiemposa, 1914 maranwa qalltäna. Ukampis cosecha apthapiñ ‘tiemponwa’ trigojj apthapisiñapäna (Mat. 13:30, 39). Kunjamtï jichhajj yatjjtanjja, Reyjam uttʼayatäkäna uka qhepatwa Jesusajj cosecha jan ukajj trigo apthapiñ qalltaskäna. Nayraqatjja, 1914 marata 1919 marajj qalltkäna ukhakamaw Jesusajj alajjpachar sarañatak ajllit arkirinakapar qʼomachäna (Mal. 3:1-3; 1 Ped. 4:17). Uka maranwa, mä arunjja, 1919 maranwa Jesusajj ‘cosecha apthapiñ’ qalltäna. Ukat Diosan arunakap jankʼak yatiyasiñapajj kunja wakiskirisa, ukwa ukhak uttʼayata Amuyasiri Cheqapa Uywata toqejj jilat kullakanakar qhanañcharakïna. Kunas uka qhepat paspachäna uk yatjjataskakiñäni.

7. 1) Jankʼak yatiyasiñapajj kunja wakiskirisa ukjja, ¿kunjamatsa jilat kullakanakajj amuyapjjäna? 2) ¿Kun lurapjjañapatakis jilat kullakanakar chʼamañchtʼasïna?

⁷ Yatiyañataki julio 1920 maran mistkäna uka revistajj akham sänwa: “Iglesiankirinaka, [mä arunjja, cristian tamankirinakaw] Diosan reinopat jaqenakar yatiyapjjañapa, ukwa Bibliat yatjjatasin amuyawaytanjja” sasa. Suma yatiyäwinaka Oraqpachan yatiyasiñapajj kunja wakiskirisa, ukwa jilat kullakanakajj Isaías libron utjki uka profeciat yatjjatasajj sum amuyapjjäna (Isa. 49:6; 52:7; 61:1-3). Kunjamsa ukarjam phoqapjjani uk janiw yatipkänti, ukampis ‘Jehová Diosaw yanaptʼaskistani’ sasaw jupanakajj jan pächasis sapjjäna (Isaías 59:1 liytʼañataki). Jankʼak yatiyasiñapajj kunja wakiskirisa uk amuyasajja, taqe jilat kullakanakaruw jukʼamp yatiyapjjañapatak chʼamañchtʼasïna. Jilat kullakanakajj ¿kunsa lurapjjpachäna?

8. Khä 1921 maranjja, ¿kuna pä aski yatichäwinaksa jilat kullakanakajj yatiyañ toqet amuyapjjäna?

⁸ Khä 1921 maran diciembre phajjsin mistkäna uka Yatiyañataki revistajj akham sasaw yatiyäna: “Aka marajj wali askipunïnwa. Yaqha maranakat sipansa, walja jaqenakaw [...] cheqa yatichäwinak istʼawayapjje” sasa. Ukat akham saskakïnwa: “Jukʼamp yatiyañaw utjaski [...]. Ukhamajj kusisit chuymampi uk lurasipkakiñäni” sasa. Yapuchirinakajj jankʼakiw irnaqtʼapjjani ukat kusisitaw jikjjatasipjjarakini sasaw Jesusajj apostolonakapar säna, uka arunakjja sumwa jilat kullakanakajj uka tiempon amuyjjapjjäna.

9. 1) Yatiyañataki 1955 maran mistkäna uka revistajj cosecha apthapiñatjja, ¿kamsänsa, ukat kunatsa? 2) Aka 50 qhepa maranakanjja, ¿kunjamsa Diosan markapajj jiljjattawayi? (“Kunjamsa Diosan markapajj jiljjattawayi” siski uka recuadro uñjjattʼäta.)

⁹ ‘Walja jaqenakjam uñtʼatäpki uka yaqha uwijanakaw cheqa yatichäwinak istʼapjjani’ sasin 1930 maranakan amuyasajja, jukʼamp yatiyañatakiw jilat kullakanakajj chʼamachasipjjäna (Isa. 55:5; Juan 10:16; Apo. 7:9). ¿Kuna askinakas ukham yatiyasitapat utjawayi? 1934 maranjja, 41.000 jilat kullakanakaw Diosan Reinopat yatiyapjjäna. 1953 maratakejja, 500.000 yatiyirinakaw utj-jjäna. Yatiyañataki mayo 15, 1955 maran mistkäna uka revistajj akham sänwa: “Jehová Diosan qollan ajayupa ukat Arupaw ukham walja jaqenakar apthapisiñapatak yanaptʼawayi” sasa (Zac. 4:6).a

Cosecha apthapiñat parlir uñachtʼäwinaka

10, 11. ¿Kunsa Jesusajj mostaza jathat parlasajj qhanañchañ munäna?

¹⁰ Reino toqet parlir uñachtʼäwinakapanjja, cosecha apthapisitapat kuna askinakas utjañapäna ukwa Jesusajj sum qhanañchäna. Jichhajj mostaza jathata ukat levadurat parlir uñachtʼäwinakatwa yatjjatañäni. Kunjamsa uka uñachtʼäwinakajj aka qhepa urunakan phoqasiski ukwa aka yatichäwin sum amuytʼañäni.

¹¹ Mostaza jathat uñachtʼäwi. Jesusajj akham sänwa: ‘Mä jaqew yapupar mostaza jathampi satanti. Uka jathajj mä jachʼa qoqaruw tuku. Jachʼa qoqätap laykusti jamachʼinakas ukanwa tapachasipjjaraki’ sasa (Mateo 13:31, 32 liytʼañataki). ¿Kunsa Jesusajj uka uñachtʼäwimp qhanañchañ munäna? 1) Uka qoqan jiltatapajj wali muspharkañänwa. Jathapajj “taqe jathanakat sipansa jukʼamp jiskʼakiwa” ukampis ‘jachʼa ramanakani’ qoqaruw tuküna (Mar. 4:31, 32). 2) Uka qoqajj jiltañapapunïnwa. Satantatatsti, “taqe alinakat sipan jachʼaw jili” sasaw Jesusajj säna, janiw ‘inas jilschini’ sasin siskänti, jan ukasti, ‘jilsuniwa’ sasaw jupajj säna. Janiw khitis jilsuñap jarkʼkasapänti. 3) Uka qoqanjja, jamachʼinakaw utjasipjjäna. Ukanwa ‘jamachʼinakajj chʼiwipar tapachasipjje’ sasaw Jesusajj säna. ¿Kunjamsa taqe ukanakajj jichhürunakan phoqasiski?

12. Jesusajj mostaza jathat parlkäna uka uñachtʼäwejja, ¿kunjamsa jichhürunakan phoqasiski? (“Qawqhanirus Bibliat yatichasiwayi” siski uka recuadro uñjjattʼäta.)

¹² 1) Jiltatapajj wali muspharkañawa: Diosan Reinopan yatiyäwipajj kunjamsa taqe cheqar puriñapäna ukat cristiano tamajj kunjamsa jiltañapäna ukwa Jesusajj uka uñachtʼäwimp arkirinakapar amuytʼayañ munäna. 1919 maratwa Diosar taqe chuyma yupaychirinakajj qʼomachtʼat cristian tamarojj mantawayapjje. Qalltanjja jukʼanikïpjjänwa, jichhajj waljanëjjapjjewa. Cheqansa, 1900 maranakat jichhürunakkamajja, wali muspharkañapuniw Diosan markapajj jiljjattawayi (Isa. 60:22). 2) Jiltañapapunïnwa: Cristiano taman jiltañapatakejj janiw khitis jarktʼawaykiti. Diosan enemigonakapajj mostaza jiskʼa jathar uñtata Diosan markaparuw arknaqawayapjje, ukampis jilat kullakanakajj uka yantʼanakarojj atipjawayapjjewa ukat jukʼampiw jiljjattawayapjje (Isa. 54:17). 3) Qoqanwa utjasipjjañapäna: ‘Chʼiwipar tapachasipki uka jamachʼinakajja’, niya 240 markanakan millón millón jaqenakajj Diosan Reinopat yateqawayapki ukanakamp sasiwa, jupanakaw cristiano tamar mantawayapjje (Eze. 17:23). Ukanwa jupanakajj ajay toqet manqʼsa samarañsa jikjjatapjje, jan walinakatsa jarkʼaqatäpjjarakiwa (Isa. 32:1, 2; 54:13).

13. ¿Kunsa Jesusajj levadurat parlasajj qhanañchañ munäna?

¹³ Levadura toqet uñachtʼäwi. ‘Jukʼa levadurampikiw mä warmejj kimsa medida jakʼu wal poqtayi’ sasaw Jesusajj säna (Mateo 13:33 liytʼañataki). ¿Kunsa jupajj uka uñachtʼäwimp qhanañchañ munäna? Uk pä toqet amuytʼañäni. 1) Levadurampi jakʼur uchasaw ‘poqtayäna’ sasaw Jesusajj amuytʼayäna, mä arunjja, masajj janiw nayrjamäjjänti. 2) Maspachaw poqtäna, mä arunjja, jiltäna. ‘Levadurajj kimsa medida jakʼuruw poqtayäna.’ ¿Kunjamsa uka arunakajj jichhürunakan phoqasiski?

14. Jesusajj levadurat parlkäna uka uñachtʼäwejja, ¿kunjamsa jichhürunakan phoqasiski?

¹⁴ 1) Masajj janiw nayrjamäjjänti: Levadurajj Reinon cheqa yatichäwinakapamp sasiwa ukat jakʼu masajj jaqenakamp sasirakiwa. Kunjamtï levadurajj masar mayjtʼaykejja, ukhamarakiw Reinon cheqa yatichäwipajj jaqen chuymap mayjtʼayi, mä arunjja, nayra luräwinakap jaytapjjañapatakiw jaqenakar yanaptʼi (Rom. 12:2). 2) Jiltayänwa: Masan poqtatapajja, kunjamsa Diosan Reinopat yatiyäwipajj taqe cheqar puriñapäna ukamp sasiwa. Mä jukʼa levadurakiw maspachar poqtayäna. Ukhamarakiw Diosan Reinopat cheqa yatichäwinakajj ‘Oraqpachan wal yatiyasiski’ (Hech. 1:8). Kawkïr markanakantï Diosan Reinopat yatiyañajj jarkʼatäki uka markanakansa yatiyasiñaparakïnwa, ukwa uka uñachtʼäwejj amuytʼayarakistu. Wali amuyumpiw uka markanakan yatiyasiski.

15. Isaías 60:5, 22 qellqatan jikjjataski uka arunakajja, ¿kunjamsa phoqasiwayi? (“Jehová Diosaw yanaptʼawayi” siski uka recuadro 105 janan uñjjattʼäta ukat “¿Kunjamsa ‘mä qawqha jaqenakajj mä jachʼa markar tukuwayapjje’?” siski uka recuadro 108 ukat 109 jananakan uñjjattʼarakïta.)

¹⁵ Jesusan uka uñachtʼäwinak arsuñapatak 800 maranak faltkipanwa Jehová Diosajj kunjamsa jaqenakar apthapisini, ukat ukajj kunja kusiskañanaksa apanini uk Isaías profeta toqejj yatiyäna.b Walja jaqenakaw markajar ‘jayatpach jutapjjani’ sasaw Jehová Diosajj säna. Ukat ‘Jerusalenata’, mä arunjja, Oraqen jakasipki uka ajllit cristianonakat parlasajj akham sarakïnwa: “Jumasti, ukanak uñjasajj walpun kusisïta, chuymamasti kusisiñansa phoqtʼatarakïniwa; qota toqenkir markanakan qamir kankañanakapwa apanirapipjjätam, markanakan qamir kankañapwa katuyapjjarakïtam” sasa (Isa. 60:1, 4, 5, 9). ¡Uka arunakarjamaw phoqasiwayi! Jichhürunakanjja, kunjamsa Diosan Reinopat yatiyirinakajj mä jukʼat waljanir tukuwayapjje, uk uñjasaw Diosar walja maranak servir cristianonakajj wal kusisipjje.

¿Kunatsa Jehová Diosan servirinakapajj kusisitäpjjañapäna?

16, 17. ¿Kunatsa ‘yapuchirimpi yapu apthapirimpejj kusisipjje’? (“Pä tratadonakaw Amazonas sat cheqankir pä chachan chuymapar purtʼäna” siski uka recuadro uñjjattʼäta.)

¹⁶ Kunsa Jesusajj apostolonakapar säna uk amtañäni. Jupajj akham sänwa: “Khititejj apthapki ukajja [...], wiñay jakañatakiwa [apthapiski], ukhamat yapuchirimpi yapu apthapirimpi kusisipjjañapataki” sasa (Juan 4:36). Oraqpachan cosecha apthapisajja, kunatsa taqenisa, mä arunjja, yapuchirinakasa ukat yapu apthapirinakas kusisipjje ukwa jichhajj kimsa toqet uñjañäni.

¹⁷ Maya: kunjamsa Jehová Diosajj yatiyasiñapatak yanaptʼaski uk uñjañaw kusisiyistu. Cheqansa, Diosan Reinopat suma yatiyäwinak yatiyañajj jathanak satañampi sasiwa (Mat. 13:18, 19). Cristianor tukuñapatak maynir yanaptʼañasti, achu apthapiñamp sasirakiwa. Ukat kunjamsa Jehová Diosamp yanaptʼatajj maynejj Jupar jakʼachasi uk uñjasaw taqenis kusistanjja (Mar. 4:27, 28). Ukampis ak amtañasawa, phawantktan uka jathanakat yaqhepajj janiw jankʼak jiltapkiti, yaqha jilataw jan ukajj kullakaw uka achu apthapispa. Gran Bretaña markankiri Joan sat kullakajj 60 maranak bautisatäjjewa. Jupajj akham siwa: “‘Jumaw nayrajj Diosan arunakapat yatiyawayistajja’ sasaw yaqhepajj sapjjetu. Yaqha jilat kullakanakaw jupanakarojj Bibliat yatichasajj Jehová Diosan serviripar tukupjjañapatak yanaptʼapjjatayna. Nayajj yatiyawaykta uka jilat kullakanakajj kunjamsa nayrar sartawayapjje uk yatisajj wali kusisitätwa” sasa. ¿Jumajj ukhaman uñjasirakirïtati? (1 Corintios 3:6, 7 liytʼañataki.)

18. 1 Corintios 3:8 qellqatarjamajja, ¿kunatsa kusisitässna?

¹⁸ Paya: Pablon arunakap amtasaw kusisitätanjja. Jupajj akham sänwa: ‘Sapa mayniw luräwiparjam katoqani’ sasa (1 Cor. 3:8, MT). Cheqas janiw qawqha jaqenakarutï Diosan markapar mantapjjañapatak yanaptʼktan ukarjam ‘katoqktanti’, jan ukasti, Diosan arunakap yatiyañatakejj qawqsa chʼamachastan ukarjamaw katoqtanjja. Uk yatisajja, cheqa yatichäwinak jan istʼañ munapki uka cheqanakan jakasir jilat kullakanakajj wali chuymachtʼataw jikjjatasipjje. Kusisit chuymampi suma yatiyäwinak satantiri, jan ukajj yatiyiri jilat kullakanakarojja, wali askitwa Jehová Diosajj uñji, ‘walja achunaksa’ achupkaspa ukhamäpjjewa. Ukatwa servirinakapajj wal kusisipjje (Juan 15:8; Mat. 13:23).

19. 1) Mateo 24:14 qellqatan jikjjataski uka profeciajja, ¿kunjamsa kusisitäñasatak yanaptʼistu? 2) Jesusan arkiripar tukuñapataki janis maynir yanaptʼkstanjja, ¿kunsa amtañasa?

¹⁹ Kimsa: mä profecian phoqasiñapataki yanaptʼasaw wali kusisit jikjjatastanjja. Amtañäni, apostolonakapajja akham sasaw Jesusar jisktʼapjjäna: “¿Kawkïrïnis chimpojja jumajj kuttʼankät ukkajja, ukhamarak akapach tukuskan uka urutsa?” sasa. Aka Oraqpachanwa Diosan Reinopat yatiyasini sasaw Jesusajj säna. ¿Jupan arkirinakapar tukuyañatti Jesusajj parlaskpachäna? Janiwa. Jupajj akham sänwa: “Diosan reinopat aka suma yatiyäwisti aka oraqpachanwa yatiyatäni, ukhamat taqe markanakan yatipjjañapataki” sasa (Mat. 24:3, 14). Uka arunakarjamajja, Diosan Reinopatwa yatiyasiñapäna, mä arunjja, jathanakaw satantasiñapäna. Ukhamajj Diosan Reinopat yatiyasajj ak amtañasawa: inas Jesusan arkiripar tukuñapatak maynir jan yanaptʼkchiñäniti, ukampis yatiyatasajj Diosaruw jachʼañchani.c Ukhamasti, kuntï yatiyktan uk jaqenakajj istʼappas janisa, Jesusan arunakap phoqasiñapatakiw yatiyasajj yanaptʼasktanjja ukat ‘Diosan yanapirinakapjamaw’ irnaqtʼaskaraktanjja (1 Cor. 3:9, MT). ¡Taqe ukanakatwa wal kusistanjja!

“Inti jalsu toqeta, inti jalant toqkama”

20, 21. 1) Salmo 113:3 qellqatan jikjjataski uka arunakajja, ¿kunjamsa phoqasiski? 2) Cosecha apthapiñ toqetjja, ¿kun lurañsa jumajj amtta, ukat kunatsa?

²⁰ Nayrïr patak maranakanjja, cosecha jankʼaki apthapisiñapajj kunja wakiskirisa uk amuytʼañwa Jesusajj apostolonakapar yanaptʼäna. 1919 marat aksarojja, uk amuyapjjañapatakiw Jesusajj arkirinakapar yanaptʼaskaraki, ukatwa Diosan servirinakapajj jukʼamp yatiyañatak chʼamachasiwayapjje. ¡Janiw khitisa cosecha apthapisiñapatak jarktʼkaspati! Kunjamtï Salmo 113:3 qellqatajj siskejja, “Inti jalsu toqeta, Inti jalant toqka[maw]” jichhürunakan yatiyasiski. Jïsa, Inti jalsu toqeta, Inti jalant toqkamaw yapuchirinakasa ukat apthapirinakasa, mayachtʼata wali kusisit irnaqtʼasipki. Ukat alwat jaypʼukama, mä arunjja, uru jornälaw jan inaktʼas wal irnaqtʼasipkaraki.

²¹ Patak jila maranak nayrajja, Jehová Diosan servirinakapajj jukʼanikïpjjänwa, jichhajj ‘mä jachʼa markaruw tukuwayapjje’, uk uñjasajj wali kusisitaw jikjjatastanjja (Isa. 60:5, 22). Ukham kusisit jikjjatasitas layku ukat Jehová Diosaru, mä arunjja, “Yapunir” wal munasitas laykuw cosecha taqpach apthapisiñapatak yanaptʼañ muntanjja (Luc. 10:2).