Cristiano congregacionajj suma organiztʼatawa

“DIOSAJJ sumankañ utjayir Diosawa, taqe kunsa suma organiztʼat lurir Diosarakiwa”. Uka arunakan cheqätapjja, Corinto markankir cristianonakar nayrïr cartapanwa apóstol Pablojj qhanstayäna. Ukatjja ‘wali suma, yäparuw’ tantachäwinakajj apasiñapa sasaw sarakïna (1 Cor. 14:33, 40).

² Carta qalltapanjja, jilat kullakanakajj may may amuyunïpjjatapatwa Pablojj parläna, ukatwa jupanakar akham ewjjtʼäna: “Taqenis mä amtanik parltʼasipjjam, jan jumanak taypin tʼaqa tʼaq sarnaqañajj utjpanti, antisas mä wawak sarnaqasipjjam, amuyunsa ukhamarak lupʼiñansa” sasa (1 Cor. 1:10, 11). Ukjjarojja kunanakas congregacionar tʼaqanoqtayaskäna uka toqetwa parläna. Ukatjja mayachtʼatäñasa maynit maynikam yanaptʼasiñas kunja wakiskirisa uka toqetwa parlarakïna, ‘congregacionajj mä jaqen cuerpopampi sasiwa’ sarakïnwa. Kunjjay maynejj congregación taypin lurchi, taqeniw munasiñampi uñjasipjjañama, mayninakats llakisipjjañamarakiwa sasaw Pablojj sarakïna (1 Cor. 12:12-26). Diosan markapatï jan organiztʼatäkaspa ukhajja, janiw mayachtʼatäkaspati.

³ ¿Cristiano congregacionajj kunjam organizacionäñapänsa? ¿Khitis organiztʼañapäna? ¿Kunjam organiztʼatäñapänsa? ¿Khitis uka organizacionar pʼeqtʼañapäna? Bibliaw uka jisktʼanakar qhanañchi (1 Cor. 4:6).

DIOSAW ORGANIZACIONAP UTTʼAYI

⁴ Khä 33 maran Pentecostés urunwa cristiano congregacionajj uttʼayasïna, ukhat jichhakamajj niya pä waranqa maranakaw pasawayjje. Uka organizacionarojj Dios (theós) pachpaw apnaqäna (krátos).a Bibliarjamajja Diosaw cristiano congregación uttʼayäna, uka taypinjja alajjpachar sarañatak ajllit cristianonakakiw utjäna (Hech. 2:1-47). Uka organizacionarojja, Bibliajj Diosan utapa jan ukajj familiapa siwa (1 Cor. 3:9; Efes. 2:19). Jichha tiemponjja, kunjamatï nayrïr patak maranakan Diosan markapajj organiztʼatäkäna ukham organiztʼatarakiwa.

⁵ Kunjamtï Joel 2:28, 29 texton mä profeciajj qellqaskänjja, espíritu santomp ajllit 120 discipulonakakiw qalltan cristiano congregación taypinkapjjäna (Hech. 2:16-18). Pentecostés urunjja, mä 3.000 jaqenakaw Jesusat kunatï cheqäki uk yateqasajj bautizasipjjäna, ukhamatwa cristiano congregación taypinkjjapjjäna. Uka horasat qalltasajj “jupanakajj wali amuyumpiw apostolonakan yatichäwinakap istʼasipkäna”. Jehová Diosajj congregacionar bendisïnwa, ukatwa jiltaskakïna (Hech. 2:41, 42, 47).

⁶ Jerusalén markanjja congregacionajj walipuniw jiljjattäna, ukatwa jachʼa jilïr sacerdotejj “markpacharuw yatichäwinakamamp phoqantapjjtajja” sasin discipulonakar säna. Yaqhep sacerdotenakas congregación taypinkjjapjjarakïnwa (Hech. 5:27, 28; 6:7).

⁷ Jesusajj aka oraqenkkäna ukhajja, discipulonakaparojj akham sänwa: “Jerusalén markanwa nayat qhanañchapjjarakïta, taqe Judeana, Samariana ukhamarak taqe aka oraqpachana” sasa (Hech. 1:8). Uka arunakajj phoqasïnwa. Estebanar jiwayapkäna uka qhepatjja, Jerusalenan cristianonakaruw wal arknaqañajj qalltasïna, ukatwa jupanakajj Judea ukhamarak Samaria uksa toqenakar sarjjapjjäna. Ukampis kawkjanakarutï sarapkäna uka cheqanakan predicasipkakïnwa, ukhamatwa walja jaqenakajj creyentëjjapjjäna, Samariankir yaqhep jaqenakas creyentëjjapjjarakïnwa (Hech. 8:1-13). Qhepatjja discipulonakajj jan judiöpkäna ukanakaruw predicapjjäna (Hech. 10:1-48). Ukham predicasitapatwa waljanejj cristianöjjapjjäna, walja congregacionanakaw yaqha markanakan uttʼayasirakïna (Hech. 11:19-21; 14:21-23).

⁸ ¿Uka machaq congregacionanakan organiztʼatäpjjañapatakisa, suma apnaqatäpjjañapatakis kunsa Jehová Diosajj lurpachäna? Jilat kullakanakar uñjapjjañapatakejj pʼeqtʼirinakwa espíritu santop toqejj uttʼayäna. Amuytʼañataki, misionerjam nayrïr viajepanjja Pablompi Bernabeampejj ancianonakwa congregacionanakan uttʼayapjjäna (Hech. 14:23). Qhepatjja Pablojj Éfeso markankir ancianonakampiw tantachasïna, jupanakarojj aka arunakwa amtayäna: “Jumanak pachpas wal amuyasipjjam, taqpach congregacionarus sum uñjapjjarakim. Espíritu santow jumanakarojj ancianot uttʼayapjjtamjja, ukhamat Diosan congregacionapar awatipjjañamataki, jupaw uka congregacionarojj Yoqapan wilapamp alasiwayi” sasa (Hech. 20:17, 28). Uka cristianonakajj Qellqatanakarjamaw sarnaqapjjäna, ukatwa congregacionan ancianot serviñatak ajllitäpjjäna (1 Tim. 3:1-7). Ukampis janiw Pablo mayakejj ancianonak uttʼaykänti, jan ukasti Tito jilatas Creta islankir congregacionanakan ancianonak uttʼayarakïnwa (Tito 1:5).

⁹ Jerusalenankir apostolonakasa ancianonakasa, oraqpachan jukʼamp jiljjattaskakïna uka congregacionanakarojj pʼeqtʼasipkakïnwa. Jupanakaw cuerpo gobernante taypinkirïpjjäna.

¹⁰ Éfeso markankirinakar mä carta qellqkäna ukhajja, kunjamsa congregacionajj mayachtʼatäspa uka toqetwa Pablojj parläna. Ukhamäñapatakejj Diosan espíritu santopampiw yanaptʼayasipjjañapäna, Jesusarus Pʼeqtʼiriparjamaw katoqapjjañaparakïna. Ukatjja humilde chuymanïpjjam, “espíritu santojj mayachtʼat jakasiñ churkistu ukarjam sarnaqañatak wal chʼamachasipjjam” sasaw Pablojj sarakïna. Ukhamatwa congregacionankir jilat kullakanakampejj sumankañan jakasipjjaspäna (Efes. 4:1-6). Ukjjarusti Salmo 68:18 qellqatatwa Pablojj aytäna, ukarjamajja ‘Jehová Diosajj suma chuyman chachanakaruw congregación uñjapjjañapatakejj ajlliwayi, ukhamat yaqhepajj apostolonakjama, yaqhepajj profetanakjama, yaqhepajj suma yatiyäwinak yatiyirinakjama, yaqhepajj awatirinakjama, yatichirinakjam servipjjañapataki’ sasaw qhanañcharakïna. Uka chachanakajj congregacionatakejj mä suma regalönwa, jupanakaw jilat kullakanakarojj Diosar serviñan suma saytʼatäpjjañapatakejj yanaptʼapjjäna (Efes. 4:7-16).

CONGREGACIONANAKAJJ ¿KUNJAM ORGANIZTʼATASA?

¹¹ Jehová Diosan Testigonakapan congregacionanakapajja, nayrïr patak maranakanjam organiztʼatarakiwa. Oraqpachanjja taqe congregacionanakaw mayachtʼatajja, ajllit cristianonakas uka taypinkapjjarakiwa (Zac. 8:23). Ukham mayachtʼatäpjjañapatakejj Jesusaw yanaptʼaski. Jupajj arsutaparjamaw ajllit arkirinakapar yanaptʼaski, ‘akapachajj tukuskani ukhakamaw’ jupanakampïskarakini. Jichha tiemponjja, walja jaqenakaw cristiano congregacionar mantanisipkaraki, suma yatiyäwinak katoqasajj Jehová Diosaruw jakañ vidap katuyasipjje, bautisasipjjarakiwa (Mat. 28:19, 20; Mar. 1:14; Hech. 2:41). Jupanakajj ‘yaqha ovejanak’ taypinkirïpjjewa. Ukatjja ‘suma awatiri’ Jesusaruw pʼeqtʼiriparjam arkapjje, alajjpachar sarañatak ajllit cristianonakampis ‘mä sapa tamakïpjjarakiwa’ (Juan 10:14, 16; Efes. 1:22, 23). Uka pä gruponakajj mayachtʼatäpjjewa, kuna laykutejj Jesusaw jupanakan Pʼeqtʼiripajja, jupan uttʼayat ‘suma phoqeri amuyasir esclavorus’ istʼapjjarakiwa. Cheqansa uka esclavorojj taqe chuymaw jiwasajj istʼañasa (Mat. 24:45).

ENTIDADES LEGALES

¹² Jilat kullakanakajj horasapar Diosar serviñan yanaptʼanak katoqapjjañapatakejja, mä qhawqha entidades legales ukanakaw uttʼayasiwayi. Janïr akapach tukuskipan predicasiñapatakejj ukanakaw yanaptʼawayi, maynit maynikamas yanaptʼasipjjarakiwa, leyirjamas walja markanakanwa uñtʼatäpjjaraki.

SUCURSALANAKA

¹³ Oraqpachan walja sucursalanakaw utji, ukanakaw mä markana jan ukajj jukʼamp markanakan predicación pʼeqtʼapjje. Sapa sucursalanjja, Comité de Sucursal ukaw utji, kimsa jan ukajj jukʼamp ancianonakaw ukankapjje, jupanakat maynejj coordinadorawa.

¹⁴ Sucursalankir territorionjja, congregacionanakajj circuitonakar jaljatawa. Mä circuitojj qhawqha congregacionas territorion utji, congregacionanakajj kawkja cheqankapjjesa, kuna arunaksa parlapjje ukarjamaw uttʼayasi, ukatwa yaqhep circuitonakajj wali jachʼajja, jan ukajj jiskʼakisa. Uka circuitonakar uñjañatakejja, superintendente de circuito jilatanakaruw uttʼayasi. Lurañanakap sum phoqapjjañapatakejj sucursalaw jupanakar yanaptʼi.

¹⁵ Diosan markapajj kunjam organiztʼatasa uk congregacionanakajj respetompiw uñjapjje. Sucursalanaka, circuitonaka ukat sapa congregación uñjañatak ancianot uttʼayatäpki uka jilatanakarojja, taqe chuymaw jilat kullakanakajj apoyapjje. Ukatjja kuna yanaptʼanaktï suma phoqeri amuyasir esclavojj apayanki ukanakampis yanaptʼayasipjjarakiwa. Maysa toqetjja suma phoqeri esclavojj Jesusarojj wali respetompiw uñji, Biblian wiñay yatichäwinakaparjamas (principios bíblicos) taqe chuymaw sarnaqe, espíritu santompis irpayasirakiwa. Niyakejjay Diosarojj wali mayachtʼat serviskstanjja, nayrïr patak maranakan jakir cristianonakjamaw walja bendicionanak katoqtanjja, jupanakajj ‘Diosaruw jukʼampi confiyasipjjäna, urut urutjamaw yapjjattapjjarakïna’ (Hech. 16:5).