Siervo ministerialanakajj wakiskir luräwinakampiw phoqapjje

FILIPOS markankirinakarojj akham sasaw Pablojj qellqäna: “Naya Pablosa Timoteosa Cristo Jesusan esclavonakapäpjjtwa. Nanakaw Cristo Jesusan taqe santo discipulonakapar qellqanipjjsma ukhamarak ancianonakarusa siervo ministerialanakarusa, khitinakatejj Filipos markankapkta ukanakaru” sasa (Filip. 1:1). Congregacionar aruntkasajja siervo ministerialanakatwa Pablojj amtasïna, jupanakan yanaptʼapajj ancianonakatakejj wali wakiskirïnwa. Jichhürunakan ukhamarakiw siervo ministerialanakajj ancianonakarusa congregacionarus wal yanaptʼapjje.

² ¿Congregacionasankir siervo ministerialanakarojj uñtʼtati? ¿Kunanaksa lurapjje, kunjamsa yanaptʼapjjestu uk yattati? Jupanakan luratanakap wali valoranitwa Jehová Diosajj uñji, uka toqet apóstol Pablojj akham sänwa: “Kawkïr chachanakatejj sum servisipki ukanakajja, taqeninsa suma uñjatäpjjewa, Cristo Jesusar confiyapjjatapsa jan ajjsartʼasaw qhan parlapjjaraki” sasa (1 Tim. 3:13).

SIERVO MINISTERIALANAKATAK BIBLIAN MAYITANAKAPA

³ ¿Kuna mayitanakampis (requisitonakampis) siervo ministerialanakajj phoqapjjañapa? Uka toqet apóstol Pablojj Timoteor akham sänwa: “Siervo ministerialanakajj responsable jaqëpjjañapawa, janiw may may parlirïpjjañapäkiti, janiw vinjja jiljas umirïpjjañapäkiti, janiw qollqe chuymäpjjañapäkiti, janirakiw kunatï jupanakatak walïki ukak thaqerïpjjañapäkiti. Ukhamarus jupanakajj luräwinakampi phoqapjjaspati janicha ukaw nayraqat yantʼasiñapa, jupanakatejj jan khitinsa juchañchkaya sarnaqapjjchejja, siervo ministerialanakjamajj servipjjaspawa. [...] Siervo ministerialanakajj mä sapa warminikïpjjañapawa, wawanakaparusa familianakaparusa sum pʼeqtʼapjjañapawa” sasa (1 Tim. 3:8-10, 12). Cheqansa uka mayitanakajj wali wakiskiriwa. Siervo ministerialat serviñ munir jilatanakajja, cristianjamajj wali yateqaskayaw sarnaqapjjañapa, asignacionanakapampis sum phoqapjjañapa. Ukhamatwa congregacionarojj jan kunats juchañchaskaniti.

⁴ Siervo ministerialat servir wayna jilatanakasa jilïrinakasa taqe chuymaw sapa phajjsejj predicapjje. Ukham lurasaw Jesusat yateqasipjjatapsa kunjamtï Jehová Diosajj jaqenakat llakiski ukham llakisipjjatapsa uñachtʼayapjje (Is. 9:7).

⁵ Siervo ministerialanakajj isisiñansa parlañansa wali yateqaskayäpjjewa, sumwa sarnaqapjjaraki. Suma amuytʼasirïpjjatapatwa mayninakajj respetomp uñjapjje. Jehová Diosamp sum apasitaparusa, congregacionan asignacionanak katoqki ukarus wali valoranitwa uñjapjje (Tito 2:2, 6-8).

⁶ Kunjamtï Pablojj siskänjja, uka jilatanakajj luräwipamp phoqapjjaspati janicha ukaw nayraqatajj yantʼasi. Ukhamatwa Diosan Reinop nayrar uchañatakejj chʼamachasipjjeti janicha ukajj yatisi. Cheqansa jupanakajj wali yateqaskayäpjjewa (1 Tim. 3:10).

¿SIERVO MINISTERIALANAKAJJ KUNANAKSA LURAPJJE?

⁷ Cuerpo de ancianos ukankir jilatanakaw kuna asignacionampis siervo ministerialanakajj phoqapjjaspa uk amtapjje, kunjjay sum lurtʼañ yatipjjchi ukat kuna lurañanakay congregacionan wakischi ukarjamaw asignacionanak churapjje. Siervo ministerialanakan kunayman lurañanakamp phoqapjjatap laykojja, ancianonakajj mayninakar yatichañataki pastoreo lurañatakiw tiempo apstʼasipjje.

⁸ ¿Kunanaksa siervo ministerialanakajj lurapjje? Yaqhepanakajja Bibliat apstʼat qellqatanakatwa encargasipjje, yaqhepanakasti microfononakata, contabilidadata, territorionakata, jan ukajj sonidotwa encargasipjje, acomodadoratsa servipjjarakiwa. Salón del Reino utan qʼomäñapatakisa, suma uñjatäñapatakis siervo ministerialanakaw wal yanaptʼapjje. Ukatjja yaqha lurañanakan yanaptʼapjjañapatakiw ancianonakajj jupanakar mayipjjarakispa.

⁹ Yaqhep congregacionanakanjja walja siervo ministerialanakaw utji, jupanakat sapa mayniw mä luräwimp phoqapjje. Yaqhep congregacionanakansti mä luräwimpejj walja siervo ministerialanakaw phoqapjjaraki. Ukampis yaqhep congregacionanakanjja, mä siervo ministerialakiw walja lurañanakamp phoqe. Janitï walja siervo ministerialanakajj utjkchi ukhajja, ancianonakajj yateqaskay jilatanakampiw yanaptʼayasipjjaspa, ukhamatwa uka jilatanakarojj siervo ministerialäñapatak wakichtʼasispa. Janitï jilatanakajj utjkchi ukhajja, yateqaskay mä kullakaruw yanaptʼa mayipjjaspa, ukampis jupajj janiw siervo ministerialat uttʼayatäkaspati. ¿Kunjamatsa mä cristianon yateqaskayätap yatsna? Jakäwipan wali yateqaskayaw sarnaqe, tantachäwinakatsa predicacionatsa janiw faltaskiti, familiap taypins sumaw sarnaqe, sumäkis ukanakampiw kʼuchirtʼasi, isisitapas kʼachachtʼasitapas yateqaskayarakiwa.

¹⁰ Jukʼa anciano jilatanakak utjki uka congregacionanakanjja, wakichtʼat siervo ministerialanakaw bautisasiñ munir jilat kullakanakarojj jisktʼapjjaspa. Jupanakajj Parte 1: “Cristianonakan creencianakapa” sat cheqankir jisktʼanakwa jisktʼapjjaspa. Ukampis Parte 2: “Diosan leyinakaparjam sarnaqaña” sat cheqankir jisktʼanakjja ancianonakaw jisktʼapjjañapa, kuna laykutejj uka cheqanjja wali wakiskir (asuntos personales delicados) jisktʼanakaw utji.

¹¹ Kuna asignaciontï mä siervo ministerialajj katoqki ukjja, walja tiempow phoqañapa, ukhamat mä kuns sum lurtʼañ yateqañapataki ukhamarak jukʼamp experiencianïñapataki. Ukampis ancianonakatï munapjjchi ukhajja, maynirusa jan ukajj waljanirus asignacionanakapatwa cambiapjjaspa.

¹² Congregacionajj kunjamay jikjjataschi ukarjamajja, Jehová Diosar serviñan nayrar sartapki uka siervo ministerialanakarojj yaqha lurañanakaw churasispa (1 Tim. 4:15). Janitï walja ancianonakajj utjkchi ukhajja, mä siervo ministerialaw grupon auxiliarapäspa jan ukajj siervo de grupöspa, ukampis uk sum phoqapjjañapatakejj ancianonakaw uñjapjjañapa. Siervo ministerialanakajj discursonak arstʼapjjarakispawa, Cristianjam Jakañataki ukat Yatiyañataki tantachäwinsa ansignacionanakampiw phoqapjjaspa, congregacionan Bibliat yatjjatañataki sat cheqsa sarayapjjarakispawa. Ukatjja yaqha lurañanakajj utjchi wakichtʼatäpjjarakchi ukhajja, yaqha previlegionak katoqapjjarakispawa (1 Ped. 4:10). Siervo ministerialanakajj ancianonakar yanaptʼañatakejj dispuestokïpjjañapawa.

¹³ Siervo ministerialanakan lurañanakapajj janiw ancianonakan luräwinakapjamäkiti, ukampis wali wakiskir luräwinakampiw phoqapjje, ukhamat taqe kunas congregacionan sum sarañapataki. Siervo ministerialanakatï jilat kullakanakar sum uñjapjjchi, suma yatichirïpjjarakchi ukhajja, tiempompejj ancianot servipjjañapatakiw jupanakar recomendasispa.

¹⁴ Waynanakasa jichhak bautisasipki ukanakasa, siervo ministerialat serviñatakejj chʼamachasisipkiti janicha uk amuykiptʼasipjjañapawa (1 Tim. 3:1). Sapa maraw walja jaqenakajj Diosan markapar mantanipjje, ukatwa congregacionanakar sum uñjapjjañapatakejj Dios chuyma chachanakajj wal munasi. Ukhamajj jilat kullakanakar yanaptʼañatak chʼamachasim, ¿kunjamsa uk lurasma? Ukatakejj Jesusan sarnaqäwipatwa lupʼiñama (Mat. 20:28; Juan 4:6, 7; 13:4, 5). Mayninakar yanaptʼasin kusisita jikjjatasisajja, jukʼampiw yanaptʼañ munäta (Hech. 20:35). Ukhamajj puedkta ukhajj mayninakar yanaptʼapunim, Salón del Reinon suma uñjatäñapatakis yanaptʼarakim, Cristianjam Jakañataki ukat Yatiyañataki tantachäwin mayninakar reemplazañatakis chʼamachasirakim. Sapa semana Bibliat sapaki yatjjatasin Diosar serviñan nayrar sartaskakim (Sal. 1:1, 2; Gál. 5:22, 23). Taqe kunsa suma phoqeri jilatäñamawa, ukhamatwa congregacionan luräwinakapamp phoqañatak confiyapjjätam (1 Cor. 4:2).

¹⁵ Siervo ministerialanakajj Diosan espíritu santopamp ajllitäpjjewa, ukhamat congregacionan taqe kunas sumar sarañapataki. Ukhamasti kuna lurañanakampitï jupanakajj phoqapki uk valoranit uñjapjjañäni, lurañanakap sum phoqapjjañapatakis taqe chuyma yanaptʼapjjarakiñäni. Ukhamatwa kuntï Jehová Diosajj jiwasar sum uñjañatak lurki ukat yuspärañäni (Gál. 6:10).