Jehová Diosar adorañatak utanaka

JEHOVÁ DIOSAJJA servirinakaparojj tantachasiñasatakiw mayistu, ukhamat Biblian yatichäwinakap yateqapjjañasataki, maynit maynikamas chʼamañchtʼasipjjañasataki (Heb. 10:23-25). Diosan ajllit markapajja, mä arunjja israelitanakajj tabernaculonwa Diosar qalltan adorapjjäna (Éx. 39:32, 40). Mä qhawqha tiempotjja, David reyin Salomón yoqapajj Diosar jachʼañchañatakiw mä templo luräna (1 Rey. 9:3). Kunapachatï uka templojj 607 antes de Cristo maran tʼunjatäkäna ukhajja, judionakajj sinagoga lugaranakanwa tantachasiñ qalltapjjäna. Mä qhawqha maranak qhepatjja, templojj mayampiw lurasjjäna, uka templonwa Jehová Diosarojj wasitat adorasjjäna. Jesusajj uka templona ukhamarak sinagoganakanwa yatichäna, mä qollunsa yaticharakïnwa (Mat. 5:1-7:29; Luc. 4:16; Juan 18:20).

² Jesusan jiwatap qhepatjja, Bibliat yatichañatakisa jilat kullakanakamp chikäñatakis cristianonakajj walja jaqenakajj utjki uka lugaranakanwa tantachasipjjäna, jilat kullakanakan utanakapansa tantachasipjjarakïnwa (Hech. 19:8, 9; Rom. 16:3, 5; Col. 4:15; Filem. 2). Awisajj enemigonakapamp jan katjayasiñatakejj jamasanakanwa tantachasipjjerïna. Ukhamasti nayra tiempon jakir Diosan servirinakapajja, ‘Jehová Diosamp yatichayasiñatakejj’ wal tantachasiñ munapjjerïna (Is. 54:13).

³ Jichha tiemponjja, cristianonakajj ukhamarakiw Salón del Reino utana jan ukajj yaqha utanakan tantachastanjja. Predicacionar mistuñatakis uka utanakanwa tantachastanjja. Jilat kullakanakatakejja predikir mistuñatak utap maytʼañajj mä privilegiowa, ukham lurapjjatapat Diosar serviñan wali chʼamañchtʼataw jikjjatasipjjaraki.

SALÓN DEL REINO UTANAKA

⁴ Jehová Diosan Testigonakapajja, tantachasiñ amtamp luratäki jan ukajj askichatäki uka Salón del Reino utanakanwa tantachastanjja. Awisasti tantachasiñatakejj mä lugar alquilañaw wakisiraki. Mä Salón del Reinonjja walja congregacionanakaw tantachasipjjaspa, ukhamat uka lugar sum aprovechtʼañataki ukat qollqsa jan ina chʼusar tukjañataki. Kunapachatï mä salonajj luraski jan ukajj askichaski ukhajja, Jehová Diosaruw uka salonajj dedicasiñapa. Ukampis mä qhawqha cheqanakak askichaschi ukhajja janiw uk lurañajj wakiskiti.

⁵ Salón del Reino utanakajj wali suma lurtʼatawa, ukampis janiw jaqenakar musparayañ amtamp luratäkiti (Hech. 17:24). Ukhamarusa kawkjanjjay mä salonajj luraschi ukarjamaw mayj mayja lurasiraki.

⁶ Mä Salón del Reinon gastonakapatakisa askichasiñapatakis uka salonan tantachasir congregacionanakaw qollqemp yanaptʼapjje. Janiw khitirus qhawqha qollqsa churañapa ukajj obligaskiti. Antisas tantachäwinakar sarapki uka jilat kullakanakajja, sapa mayniw ‘chuymapan amtapki’ ukarjam contribución churapjjaspa (2 Cor. 9:7).

⁷ Salón del Reinon gastonakapatak contribución churañajj mä privilegiowa, uka uta qʼomachañasa askichañas ukham suma privilegiorakiwa. Uka trabajonak lurasiñapatakejja, mä anciano jan ukajj mä siervo ministerialaw organiztʼi. Jilapartejja, predicacionatak uttʼayat gruponakaw salón qʼomachapjje, ukatakejj grupo pʼeqtʼirinaka jan ukajj yanapirinakapaw qʼomachañan nayrankapjje. Niyakejjay Salón del Reino utanakajj Jehová Diosampiru organizacionapampir representchejja, uka uta manqhanakasa anqanakas qʼomäñapawa.

⁸ Mä pachpa salonan walja congregacionanakajj tantachasipki ukhajja, Comité de Mantenimiento del Salón del Reinow uttʼayasi. Cuerpo de ancianos ukankir jilatanakaw uka comité uñjapjje, ukatjja mä coordinadorwa uttʼayapjjaraki. Uka comité taypinkir jilatanakaw salonan qʼomäñapatakisa, askichatäñapatakis encargasipjje, kunanakatï munaski ukanak jan faltañapatakis jupanakaw encargasipjjaraki. Ukanak sum lurasiñapatakejja, taqe congregacionanakaw yanaptʼapjjañapa.

⁹ Paya jan ukajj jukʼamp congregacionanakatï mä Salón del Reinon tantachasipjjchi ukhajja, mä qhawqha tiempot horarionakap cambiapjjaspawa. Tantachasiñ horarionak cambiañatakejja, jilat kullakanakar munasipjjatapa jupanakat llakisipjjatapwa ancianonakajj uñachtʼayapjjañapa (Filip. 2:2-4; 1 Ped. 3:8). Janiw mä congregacionajj mayni congregación lantejj mä horario amtkaspati. Maysa toqet superintendente de circuito jilatajj mä congregacionar visitkani ukhajja, maynïr congregacionanakajj wakiskani ukarjamaw uka semanajj horarionakap mayjtʼayapjjañapa.

¹⁰ Casarasiñataki jan ukajj maynin jiwatapat mä discurso arstʼasiñapatakejja, congregacionankir Comité de Servicio taypinkir jilatanakatwa permiso mayisiñapa. Ancianonakajj taqe solicitudwa sum uñakiptʼapjjañapa, sucursalan mayitanakaparjamaw iyawsapjjaniti janicha uk amtapjjañaparaki.

¹¹ Kunapachatï mä cristianorojj salonan mä kun lurañapatak permiso churaski ukhajja, jupajj taqe kunsa sumwa lurañapa. Kunanakatï jilat kullakanakar jan gustkaspa, jan ukajj Jehová Diosan sutip qʼañuchkaspa, jan ukajj congregacionar jan walit uñjaykaspa ukanakajj janipuniw mä salonan lurasiñapäkiti (Filip. 2:14, 15). Maysa toqetjja, sucursalajj Escuela del Ministerio del Reino jan ukajj Escuela del Servicio de Precursor sat escuelanak mä salonan apasiñapatakiw amtarakispa.

¹² Congregacionankirinakajj tantachasipki uka lugar wali respetompiw uñjapjje, ukatwa Jehová Diosan servirinakapjamajj sum sarnaqañasa. Isisitasasa kʼachachtʼasitasas cheqpach cristianötaswa uñachtʼayañaparaki (Ecl. 5:1; 1 Tim. 2:9, 10). Uka toqenakan Biblian ewjjtʼanakaparjam sarnaqtan ukhajja, tantachäwinak wali valoranit uñjataswa uñachtʼaytanjja.

¹³ Tantachäwinakajj sumaw apasiñapa, ukatwa awk taykanakarojj wawanakapamp chik qontʼasipjjañapatak mayisi. Kunapachatï wawanakajj jiskʼäsipki ukhajja, awisajj cheqañchañaw wakisi jan ukajj mä kunan yanaptʼañaw wakisi, ukatwa jilat kullakanakan ukanak jan uñjapjjañapatakejj yaqha cheqar qontʼasipjjañapatak mayisispa.

¹⁴ Kunanaktï acomodadoranakajj lurapki ukajja, tantachäwi sum apasiñapatakiw yanaptʼi. Ukatwa acomodadoranakajj jilat kullakanakar munasiñamp yanaptʼapjjañapa, taqe kunsa wali amuyumpiw uñjapjjañapa, wali atencionampiw kunsa uñchʼukipjjañaparaki. Ancianonakampi siervo ministerialanakampiw uka luräwi sum phoqapjjaspa. ¿Kunanaksa lurapjjañapa? Machaqanakaruw sum arunttʼapjjañapa, jan ajjsarapjjañapatakiw jupanakar yanaptʼapjjañapa, qheptʼanipki ukanakarojj mä asiento jikjjatapjjañapatakiw yanaptʼapjjañapa, qhawqhanis tantachasipjje ukwa jakthapipjjañapa, salonan jan sinti thayäñapatakisa ni sinti juntʼüñapatakis jupanakaw encargasipjjañapa. Wakiskani ukhajja, wawani awk taykanakarojj wawanakapan tantachäwin jan tʼijnaqapjjañapatakiw acomodadoranakajj mayipjjaspa, plataforman jan anatapjjañapatakis mayipjjarakispawa. Mä wawatï tantachäwin mayninakar jan istʼayjjani ukhajja, awk taykaparojj munasiñampiw acomodadoranakajj anqar irpsuñapatak mayipjjaspa.

SALÓN DEL REINO UTANAK LURAÑA

¹⁵ Nayrïr patak maranakanjja, yaqhep cristianonakajj mayninakat sipansa jukʼamp utjirinïpjjänwa, ukatwa Pablojj jupanakar akham sasin qellqäna: “Kunatï jumanakan jiltʼki ukajja, jupanakan faltki ukar phoqachpan. Kunatï jupanakan jiltʼki ukasti, jumanakan faltki ukar phoqacharakpan. Ukhamat taqeninsa mä igualak utjañapataki” sasa (2 Cor. 8:14). Jichhürunakan niya ukhamaw pasaraki. Oraqpachan utjki uka congregacionanakan contribucionanakapajja, kawkjanakantï Salones del Reino utanak askichañasa jan ukajj lurañas munaski ukatakiw irtasi. Diosan markapasa congregacionanakas uka contribucionanakat wal beneficiasipjje, ukatwa jilat kullakanakan wajjtʼasir chuymanïpjjatapat wal yuspärapjje.

¹⁶ Mä cheqankir congregacionajj kawkïr Salón del Reinonsa tantachasini uk sucursalaw amti. Kawkjansa ukat kunapachas machaq salonanakajj lurasini, kunapachas yaqhep salonanakajj askichasini uksa amtarakiwa. Ukat mä jan waltʼäwejj utjki ukhajja, jan waltʼayatäpki uka salonanak askichasiñapatakiw sucursalajj organiztʼi. Awisajj jilat kullakanakan utanakapas askichasirakiwa.

¹⁷ Construccionan trabajipki uka voluntarionakarusa Salón del Reino utanakan mantenimiento lurapki uka voluntarionakarus sucursalaw organiztʼi. Jupanakaw mä salonajj kunjamänis uk diseñapjje, oraqsa alapjje, permisonaksa apsupjje. Niyakejjay Jehová Diosan markapajj jukʼamp jiltaskchejja, walja salonanak lurasiñapatakejj jukʼamp voluntarionakaw munasi. Ukatwa mayitanakamp (requisitonakamp) phoqapki uka jilat kullakanakarojj mä solicitud phoqantapjjañapatak mayisi, ukatjja khitinakatï uka solicitud phoqantapki ukanakajj congregacionapankir comité de servicioruw churapjjañapa. Jan bautisatäpki uka publicadoranakajja, tantachasipki uka Salón del Reinojj luraskani jan ukajj mantenimiento luraskani ukanakanwa yanaptʼapjjaspa.

SALONES DE ASAMBLEAS UTANAKA

¹⁸ Nayrïr cristianonakajj jiskʼa gruponakanakwa jilapartejj tantachasipjjerïna, ukampis awisajj jukʼamp waljaniw tantachasipjjarakirïna (Hech. 11:26). Jichha tiemponjja, ukhamarakiw asamblea de circuitonsa, asamblea regionalansa waljan tantachastanjja. Ukatakejj tantachasiñatak jachʼa lugaranakwa alquiltanjja. Ukampis ukham lugaranakajj jan jikjjatañjamäki, janirak sumäki ukhajja, tantachasiñatakejj mä jachʼa utwa lurtanjja jan ukajj mä jachʼa utwa altanjja. Ukham utanakarojj Salones de Asambleas sasinwa uñtʼasi.

¹⁹ Awisajja tantachasiñatakejj mä jachʼa uta alasaw askichasi, ukampis jilapartejj mä oraqe alasaw tantachasiñatak mä jachʼa utajj lurasi. Salones de Asambleas utanakajj qhawqchʼa jachʼänisa ukajj qhawqha publicadoras mä cheqan utji ukarjamaw lurasi. Mä Salón de Asambleas uta janïr lurkasajja, uka uta lurasiñapajj wakisipuniti janicha ukwa sucursalajj nayraqat amuykiptʼi, qhawqhas cuestani, qhawqha circuitonakas ukan tantachasipjjani uksa amuykiptʼarakiwa.

²⁰ Diosan markapan utjki uka utanak cuidapjjañapatakisa, mantenimiento lurapjjañapatakis sucursalaw mä qhawqha jilat kullakanakar ajlli. Salones de Asambleas utanak sum uñjañatakejj congregacionankir jilat kullakanakas yanaptʼapjjarakiwa, jupanakajj sapa kuti jan ukajj sapa sojjta phajjsiw uka lugaranak qʼomachapjje, mantenimiento lurasas yanaptʼapjjarakiwa. Uka lurañanakan yanaptʼañajj wali askipuniwa, ukatwa taqe chuyma uka lurañamp phoqapjjañapatakejj taqenir chʼamañchtʼasi (Sal. 110:3; Mal. 1:10).

²¹ Salones de Asambleas utanakanjja, yaqha tantachäwinakaw apasiraki. Sañäni, Biblia toqet yatichaski uka escuelanaka, superintendente de circuitonakatak tantachäwinaka ukhamarak mä circuitonkir ancianonakatak tantachäwinaka. Cheqansa uka utanakajj Diosar adorañatakiwa, ukatwa sarnaqatasasa, isisitasasa, kʼachachtʼasitasas Diosar servitas uñachtʼayañapa. Kunjamtï Salón del Reino utar sarktan ukhamwa uka lugaranakar sarañasaraki.

²² Jehová Diosan bendicionapampejja, aka qhepa urunakan walja jaqenakaw organizacionapar mantanisipki (Is. 60:8, 10, 11, 22). Ukatwa tantachasiñ lugaranakajj jukʼamp munasi. Ukhamajj tantachasiñatak mä lugar jikjjatañatakejj wal chʼamachasipjjañäni, ukampis mä tantachasiñ lugaratï utj-jjchistu ukhajja qʼoma ukat sum uñjañatak chʼamachasipjjarakiñäni. Ukham lurasajja, Diosar adorañatak lugaranak wali valoranit uñjataswa uñachtʼayañäni, cheqansa ukanwa maynit maynikamajj chʼamañchtʼastanjja. Ukham lurañajj aka qhep qhepa urunakan wali wakiskiriwa.