Oraqpachankir mayachtʼat mä familia

ISRAEL markajja, mä 1500 maranakaw Jehová Diosan markapjam uñtʼatänjja. Uka qhepatjja Jehová Diosajj ‘yaqha markanak taypitwa sutipatakejj mä marka ajllisïna’ (Hech. 15:14). ‘Sutipatak ajlliskäna uka markajj’ servirinakapäpjjewa, mä arunjja testigonakapäpjjewa, jupanakajj kunayman markatäkasas mä pachpa amuyunikïpjjewa, mä pachpa amtanikirakiw kuns lurapjje. ¿Kunjamsa jupanakarojj tantachtʼasiwayi? Kuntï Jesusajj siskäna ukarjam lurasitapatwa jupanakarojj tantachtʼasiwayi, jupajj discipulonakapar akham sänwa: “Ukhamasti sarapjjam, taqe markanakankir jaqenakar nayan discipulojar tukuyapjjam, bautisapjjam Awkina, Yoqana, espíritu santon sutipjjaru. Ukatsti taqe kuntï nayajj jumanakar yatichapksma ukanak phoqañ yatichapjjarakim” sasa (Mat. 28:19, 20).

² Diosar vidas katuyasisin janïr bautisaskasajja, jan jiwasjamäpki uka jaqenakampejj inas jan chikachasiñ munkchiyätanti. Ukampis Jesusan discipulopar tukusajja, oraqpachankir Diosan mayachtʼat familiap taypinkjjtanwa. Jiwasajj kuna markansay nasiwaystan, wali utjirinïstansa janisa, jan ukajj wali yatjjattʼatästansa janisa, cristianonakajj mayachtʼatätanwa (Sal. 133:1). Taqe jilat kullakanakaruw munastanjja, respetompiw uñjaraktanjja. Munasiñaw jupanakamp mayachtʼatäñatakejj yanaptʼistu, uka munasiñajja amigonakasaru, pachpa religionasankirinakaru, familiaranakasar munasiñat sipans jukʼamp jilankiwa (Mar. 10:29, 30; Col. 3:14; 1 Ped. 1:22).

YAQHACHASIÑ AMUYUNAK APANUKSNAWA

³ Yaqhepanakajj walja maranakaw jañchi toqensa, política toqensa, jan ukajj yaqha ukham toqensa yaqhanakar yaqhachawayapjje, ukatwa jupanakatakejj taqenir mä igualak uñjañajj jan faciläkiti. ¿Kunas jupanakar yanaptʼaspa? Nayrïr patak maranakan jakir judío cristianonakat yateqasiñaw yanaptʼaspa. Jupanakajj jakapkäna uka tiemponjja, yaqha markankirinakajj jan judío religionankapjjatapat yaqhachataw uñjasipjjäna. Apóstol Pedros yaqhachir chuymanirakïnwa, ukatwa Jehová Diosajj Cornelio chachan utapar janïr khitkasajj Pedror wakichtʼäna (Hech., cap. 10).

⁴ ¿Kunjamsa uk luräna? Jehová Diosajj mä visión Pedror uñjayäna, ukanjja Pedrorojj qʼañut uñjatäkäna uka animalanak jiwayasin manqʼañapatakiw mayïna. Pedrojj janiw uk lurañ munkänti, ukampis alajjpachat aka arunakaw istʼasïna: “Kunanaktï Diosajj qʼomachki ukanakarojj jan qʼañuw sisjjamti” sasa (Hech. 10:15). Amuyup cambiañapataki ukhamarak yaqha markankir mä jaqer visitañapatakiw Jehová Diosajj ukham sasin Pedror säna. Kunapachatï Pedrojj Jehová Diosan mayitapar istʼäna ukhajja, Cornelion utapankirinakarojj akham sänwa: “Mä judío jaqetakejj yaqha kasta jaqemp chikachasiñasa jan ukajj jakʼachasiñasa kunja jan walisa ukjja jumanakajj sum yatipjjtajja. Ukhamarus Diosaw nayar uñachtʼayitu, janiw khitirus qʼañuchata jan ukajj jan qʼomachata sasajj sañajäkiti. Ukatwa nayajj jumanakan jawsayatajj iyaw sasin jutta” sasa (Hech. 10:28, 29). Mä qhawqha tiempotjja, Cornelio chacharusa utapankirinakarus kunjamsa Jehová Diosajj uñjäna ukwa Pedrojj amuyjjäna.

⁵ Tarso markankir Saulo chachajja, ukhamarakiw humilde chuymanïna, amuyupsa cambiarakïna. Jupajj wali yatjjattʼat fariseo jaqëkchïnsa, nayrajj yaqhachkäna uka jaqenakampiw chikachasiñapäna, instruccionanakaparus istʼañaparakïnwa (Hech. 4:13; Gál. 1:13-20; Filip. 3:4-11). Ukampis janiw Pedrompi Pablompikejj yaqhanakar yaqhachañ jaytapkänti. Sergio Paulo, Dionisio, Dámaris, Filemón, Onésimo ukat yaqha cristianonakas ukhamarakiw yaqhachasiñ jaytapjjäna (Hech. 13:6-12; 17:22, 33, 34; Filem. 8-20).

ORAQPACHAN MAYACHTʼATÄSKAKIÑATAK CHʼAMACHASISIPKAKIÑÄNI

⁶ Kunatï Diosat cheqäki uk yateqkayätan ukhajja, jukʼampiw Jehová Diosarusa markaparus jakʼachasiyätanjja, ukatakejj kunjamsa jilat kullakanakajj munasiñamp uñjasipjjäna ukaw yanaptʼawayistu. Jesusan arunakaparjamajja, cheqpach cristianonakajj munasirit uñtʼatäpjjañapänwa, jupajj akham sänwa: “Nayajj mä machaq mandamiento churapjjsma: jumanakajj maynit maynikam munasipjjam. Kunjamtï nayajj munasipksmajja, ukhamarak jumanakajj maynit maynikam munasipjjam. Cheqpachans jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa (Juan 13:34, 35). Uka munasiñajj janiw congregacionanak uñjaskiti, jan ukasti oraqpachankir taqe cristianonakaw munasiñamp uñjasipjje, uk amuyasajj jukʼampiw Jehová Diosarusa markaparus jakʼachasiwaytanjja. Kuntï Miqueas 4:1-5 textojj siski uk phoqasir taqeniw uñjtanjja, uka textonjja aka qhepa urunakan walja jaqenakaw Jehová Diosar mayachtʼat adorapjjani, sumankañaw utjarakini sasaw qhanañchi.

⁷ Tʼaqa tʼaqa sarnaqer jaqenak taypinjja, ‘kunayman tribunakata, kunayman kasta jaqenakata, kunayman aru parlirinakat’ jutir jaqenakaw Diosar mayachtʼat adorapjje, ukajj wali musparkañawa (Apoc. 7:9). Akapachanjja qollqeninakampi pobrenakamp jan igualakïpjjatapasa, jan ukajj tecnología toqet yatjjattʼatanakampi tecnología toqet jan kun yatirinakamp jan igualakïpjjatapas tʼaqanoqtañanakwa utjayapjje. Religionanakasa markapat saytʼasirinakas jaqenakarojj tʼaqanoqtayarakiwa. Kunanakas jaqenakar tʼaqanoqtayi uk sum amuytan ukhajja, Diosan markapan mayachtʼata ukat suman jakasiñ utjatapat wal muspartanjja, cheqas Taqe Chʼamani Diosakiw uka milagro utjayaspa (Zac. 4:6).

⁸ Mayachtʼat jakasiñajj cheqpachapuniw utji. Kunapachatï Jehová Diosan Testigopjam bautisasktan ukhajja, mayachtʼat mä familia taypiruw manttanjja. Uka familian mayachtʼatakiskañapatakiw sapa maynejj chʼamachasiñasa. Ukatakejj kuntï Pablojj siskäna ukarjamaw lurañasa, jupajj Gálatas 6:10 texton akham sänwa: “Jiwaskam yanaptʼasirjamäskstan ukhajja, taqenir yanaptʼapjjañäni, ukampis jiwasjam creyentëpki uka jilat kullakanakasaruw jukʼamp yanaptʼañasa” sasa. Ukat Filipenses 2:3, 4 texton akham sarakïnwa: “Jan kunsa jumanakajj jiskhisiñ laykusa ni wali wal tukuñ laykus lurapjjamti, jan ukasti mayninakarojj humilde chuymamp uñjapjjam, jumanakat sipansa jilankapkaspas ukhama. Jan jumanak pachpatak llakisipjjamti, jan ukasti mayninakat llakisipjjarakim” sasa. Jehová Diosajj janiw khitirus yaqhachkiti, ukhamajj jiwasatï jupat yateqasis jilat kullakanakar sum uñjañatak chʼamachasiñäni ukhajja, wali sumaw taqenimpis apasiñäni (Efes. 4:23, 24).

MAYNINAKAT LLAKISIPJJAÑÄNI

⁹ Congregacionankir jilat kullakanakajj kunja mayachtʼatasa, jupanakkamas kunjamsa munasiñamp uñjasipjje uk qhanstayañatakejja, apóstol Pablojj jaqen cuerpopatwa parläna (1 Cor. 12:14-26). Jilat kullakanakasajj jiwasat jayankapkchisa, jupanakat wal llakistanjja. Jupanakar uñisiñat arknaqapjje ukhajj wal tʼaqestanjja, ukat yaqhep jilat kullakanakajj desastres naturales ukanakampi jan ukajj markan jan waltʼayasiñanakamp tʼaqesipki ukhas jankʼakiw Diosar serviñ toqensa yänakasampis yanaptʼtanjja (2 Cor. 1:8-11).

¹⁰ Jilat kullakanakasatakejj sapüruw orañasa. Awisajj jan walinakan uñjasipjjatapwa yattanjja, ukampis awisajj janiw jupanakat kuns yatkaraktanti. Yaqhep jilat kullakanakajj trabajopankir compañeronakapan uñisitaw uñjasipjje, jan ukajj tʼaqanoqtat familia taypinwa jakasipjje, yaqhepanakasti jan walinak lurañatak yantʼataw uñjasipjjaraki (Mat. 10:35, 36; 1 Tes. 2:14). Taqe jupanakat wal llakistanjja, kuna laykutejj jilat kullakanakasäpjjewa (1 Ped. 5:9). Sapürunjam Diosar serviñ amtawayapki, predicacions nayrarupun uchapki, congregacionanakaru jan ukajj oraqpachankir Diosan markapar uñjapki uka jilatanakats ukhamarakiw wal llakistanjja. Taqe jupanakatakiw orarapiñasa, cheqas jiwasajj ukakwa jupanak laykojj lurañ puedsna. Ukham lurañäni ukhajja, jupanakar munasitasa, jupanakat cheqpachapun llakisitaswa uñachtʼayañäni (Efes. 1:16; 1 Tes. 1:2, 3; 5:25).

¹¹ Aka qhepa urunakan jakañajj jukʼamp chʼamäjjewa. Terremotonaka, inundacionanaka ukat yaqha ukham desastres naturales ukanak utjatapatjja, jilat kullakanakasar yanaptʼañatakejj organiztʼasiñaw wakisi. Awisajj jukʼampinakan yanaptʼañaw wakisiraki. Jehová Diosan markapajj taqe ukanakatakejj suma wakichtʼatäñapawa, uka toqet nayrïr cristianonakajj wali yateqaskayäpjjewa. Antioquía markankir discipulonakajja, Jesusajj yatichkäna ukarjamajj jankʼakiw Judea markankir jilat kullakanakarojj yanaptʼanak apayapjjäna (Hech. 11:27-30; 20:35). Ukatjja labores de socorro ukan yanaptʼapjjañapatakiw Pablojj Corinto markankirinakar mayïna, cheqas ukhakamajj suma organiztʼataw taqe kunas lurasiskäna (2 Cor. 9:1-15). Jichhürunakan ukaw pasaraki, jilat kullakanakasajj yanaptʼa munapki ukhajj jankʼakiw yanaptʼtanjja.

MUNAÑAP LURAÑAPATAKEJJA DIOSAJJ MÄ MARKWA AJLLISI

¹² Diosan munañap lurañatak mayachtʼat mä markanktanwa. Jichha tiemponjja, Jehová Diosajj suma yatiyäwinak aka oraqpachan yatiyañasa, autoridadanïpki ukanakar respetañasa, mayitanakaparjam sarnaqañaswa muni (Mat. 24:14; Efes. 5:21; 1 Ped. 1:14-16). Ukatwa munañas thaqañat sipans Diosan Reinop nayrar uchañasa (Mat. 6:33). Ukhamtï lurañänejja jichha tiempon kusisitäñäniwa, jutïrin walja bendicionanakwa katoqarakiñäni.

¹³ Jehová Diosajj qʼoma markapankañasataki, kusisit chuymamp jupar serviñasatakiw ajllisistu (Tito 2:14). Diosan markapjamajj janiw utjkiti. Testigonakajj kunayman markanakansa jakaskstanjja, mayachtʼataw Jehová Diosar adortanjja. Taqenirakiw Diosan qʼoma arup parltanjja, predicktan ukarjamaw sarnaqaraktanjja. Jehová Diosajj akham sasaw Sofonías toqejj mä profecía arsüna: “Markanakan arupjja mä qʼoma aruruw cambiäjja, ukhamat taqe jupanakajj Jehová Diosan sutipat artʼasipjjañapataki, ukhamarak mayachtʼat servipjjañapataki” sasa (Sof. 3:9).

¹⁴ Jehová Diosan amuytʼayatajja, Sofoniasajj oraqpachankir Diosan familiapat akham sarakïnwa: “Khitinakatï Israel markat jiltʼapkani ukanakajja, janiw kunatï jan cheqapäki uk lurapkaniti, janiw kʼarinaksa parlapkaniti, janirakiw lakanakapampejj jaqenakar engañjapkaniti. Jupanakajj manqʼasipjjaniwa, iktʼasipjjarakiniwa, janiw kunas jupanakarojj ajjsaraykaniti” sasa (Sof. 3:13). Biblia sum amuyatasata, amuyus cambiatasata, Diosan leyinakaparjam sarnaqatasatwa Diosarojj mayachtʼat sirvtanjja, ukham mayachtʼatäñajj akapachankir jaqenakatakejj wali chʼamawa. Jiwasjam Jehová Diosar jachʼañchir markajj janiw aka oraqpachan utjkiti (Miq. 2:12).