Apéndice

Awk taykanakatak mä qhawqha arunaka

Awk taykanakajja, wawanakapajj Jehová Diosar munasipjjaspa, jupar vidap katuyasipjjaspa ukwa munapjje. ¿Kunjamsa wawanakaparojj bautisasipjjañapatak yanaptʼapjjaspa? ¿Kunapachas wawanakajj bautisasiñatak wakichtʼatäjjapjjaspa?

Jesusajj akham sasaw arkirinakapar ewjjtʼäna: “Taqe markanakankir jaqenakar nayan discipulojar tukuyapjjam, bautisapjjam” sasa (Mat. 28:19). Ukhamajj maynitï bautisasiñ munchi ukhajja, Jesusan discipuloparuw nayraqatajj tukuñapa. Ukatakejj janiw Jesusan yatichäwinakap aleqak yatiñapäkiti ni aleqakis ukanakar creyiñapäkiti, jan ukasti ukarjam sarnaqañatakiw chʼamachasiñapa. Wawanakas uka pachparakwa lurapjjaspa.

Luratanakamampiw wawanakamar yatichapjjañama, Jehová Diosan yatichäwinakapajj chuymanakapar purtʼañapatakis yanaptʼapjjañamarakiwa (Deut. 6:6-9). Biblian yatichäwinakap uñtʼapjjañapatakisa Biblian wiñay yatichäwinakaparjam (principios bíblicos) amtapjjañapatakisa, ¡Wiñayatakiw kusisit jakasisma! sat librompiw yatichapjjañama. Kunarutï creyipki ukanak pachpa arunakapamp qhanañchañ yateqapjjañapatakiw yatichapjjañama (1 Ped. 3:15). Jumanakatï wawanakamar yatichapjjäta chʼamañchtʼapjjarakïta ukhajja, jupanakajj bautisasipjjaniwa, Diosar serviñansa nayraruw sartapjjani. Maysa toqetjja, Bibliat sapak yatjjatañasa, Familiampi Bibliat Yatjjatañasa, tantachäwinakar sarañasa, congregacionan suma amigonakanïñas wawanakamarojj bautisasiñataki ukhamarak Jehová Diosar serviñan nayrar sartapjjañapatakiw wal yanaptʼani. Diosar serviñan jukʼamp lurañ amtapjjañapatakis jumanakaw wawanakamar yanaptʼapjjañama.

Proverbios 20:11 textojj akham siwa: “Mä wawasa luratanakapampiw uñtʼayasi, sarnaqäwipajj qʼomati cheqapati janicha ukjja” sasa. ¿Wawaman kuna luratanakapas bautisasiñatak wakichtʼatäjjatap uñachtʼayi?

Jesusajj 12 maranïkäna ukhajja, ‘awk taykapar istʼasapuniw sarnaqerïna’ sasaw Bibliajj qhanañchi (Luc. 2:51). Bautisasiñ munir qʼajjo wayn tawaqonakajj ukhamarakiw awk taykapar istʼapjjañapa (Hech. 5:29; Col. 3:20). Awisajj pantjasipjjaniwa, ukampis Jesusat yateqasis sarnaqañatakiw chʼamachasipjjañapa, mayninakas suma sarnaqeritwa jupanakar uñtʼapjjañapa.

Wayn tawaqonakajja, Bibliat jukʼamp yatjjatañ munapjjatapwa uñachtʼayapjjañapa (Luc. 2:46). Akham jisktʼasipjjam: “¿Wawajajj tantachäwinakar sarañatakisa, ukan arstʼañatakis chʼamachasiti? ¿Biblia liyiñatakisa yatjjatañatakis chʼamachasirakiti?” sasa (Sal. 122:1; Mat. 4:4).

Bautisasiñatak chʼamachasir wawanakajja, Diosan Reinop nayraruw jakäwipan uchapjje (Mat. 6:33). Mayninakar Jehová Diosat parlañ wakisitapsa sum amuyapjje, kunayman toqet yatiyañatakiw chʼamachasipjjaraki. Profesoranakaparusa yateqer masinakaparus jan ajjsarasaw “Jehová Diosan Testigopätwa” sasin sapjje. Ukatjja Cristianjam Jakañataki ukat Yatiyañataki tantachäwin asignacionanakap phoqañatakis sumwa wakichtʼasipjjaraki.

Taqe kunansa sum sarnaqañatakiw bautisasiñ munirinakajj chʼamachasipjje. Ukatakejj suma amigonakwa thaqapjje, wali amuyumpiw videonaksa, musicanaksa, anatañ videonaksa ajllipjje. Televisionansa Internetansa janiw jan walinak uñchʼukipkiti (Prov. 13:20; 1 Cor. 15:33).

Walja wayn tawaqonakajja, awk taykapan yanaptʼataw Biblian cheqa yatichäwinakap sum yatjjatawayapjje ukat bautisasiwayapjjaraki. Wawanakamar bautisasipjjañapatak yanaptʼapjjatamatjja, Jehová Diosaw bendisipjjätam.

Jan bautisat publicadoratak mä qhawqha arunaka

Bibliat yatjjatañajj Diosar uñtʼañataki, promesanakapar confiyañataki ukat Diosar serviñan nayrar sartañatakiw yanaptʼawaytamjja. Jichhajj jan bautisat publicadorjamaw Diosar servisktajja. ¡Walik ukham chʼamachastajja! (Juan 17:3; Heb. 11:6).

Jehová Diosan Testigonakapamp janïr Bibliat yatjjatkasajja, inas yaqha religionar sarchiyäta jan ukajj religionat jan kuns yatiñ munkchiyätati. Inas kunatï Diosatak jan walïki ukanaksa lurarakchiyäta. Ukampis jan wali luratanakamat arrepentisisaw Jehová Diosar confiyatam uñachtʼaytajja, nayra jakäwimsa apanuktawa, ukatjja Diosatakjam sarnaqañwa amtawayaraktajja (Hech. 3:19).

Maysa toqetjja, inas jumajj wawäkasin Diosar uñtʼawaysta. Ukaw sum sarnaqañatakisa jachʼa juchanakar jan purtʼasiñatakis yanaptʼawaytamjja (2 Tim. 3:15). Yateqer masinakamamp chik jan walinak jan lurañsa, jan walinak lurañatak yantʼanakar saykatañsa yateqawayaraktawa. Kuntï Bibliat creykta ukanak yaqhanakar parlasasa cheqa yatichäwinak arjjatasasa Diosar confiyatamwa uñachtʼaytajja. Predicañatak wakichtʼawayapktam ukas janïr bautisatäkasin Diosan arunakap yatiyañatakiw chʼamañchtʼawaytamjja.

Wawäkasinsa jan ukajj jilïrëjjasinsa Jehová Diosar uñtʼawaystajja, jichhajj jupar jakañ vidam katuyasiña ukat bautisasiñwa amtaskpachätajja. Mä oración lurasaw wiñayatakiw servïma sasin Diosar jakañ vidas katuyastanjja (Mat. 16:24). Ukatjja bautisasisaw Diosar jakañ vidas katuyasitas uñachtʼaytanjja (Mat. 28:19, 20). Diosar jakañ vidas katuyasisin bautisasisaw jupan servirinakap taypinkjjtanjja, ¡ukajj wali kusiskañawa!

Bautisaskäna uka qhepatjja, “espíritu santow Jesusarojj wasarar irpäna, ukanwa Diablojj yantʼäna” (Mat. 4:1). Kunjamtï Bibliat yateqaniwayktajja, jumajj ukhamarakiw kunayman yantʼanakan uñjasïta, yamas bautisaskäta uka qhepat jukʼamp yantʼanakanwa uñjasïta (Juan 15:20). Inas familiaranakamajj Diosar serviñam jan munapkchiniti. Colegionkiri jan ukajj trabajonkir masinakamasa nayra amigonakamas inas jumat burlasipjjchini (Mat. 10:36). Ukhamanakan uñjasïta ukhajja, Jesusan arunakap amtañaw yanaptʼätam, jupajj akham sänwa: “Qhanakwa sapjjsma, khititejj naya layku ukhamarak suma yatiyäwinak laykojj utsa, jilanaksa, kullakanaksa, tayksa, awksa, wawanaksa, oraqenaksa jaytki ukajja, taqe ukanakat sipansa 100 ukhampwa jichha tiempon katoqani: utanaka, jilanaka, kullakanaka, taykanaka, wawanaka, oraqenaka. Arknaqatas uñjasirakiniwa, ukampis jutir pachanjja wiñay jakañ katoqani” sasa (Mar. 10:29, 30). Ukhamajj kunayman yantʼanakansa uñjaskchïtajja, Jehová Diosat janipun jitheqtamti leyinakaparjam sarnaqañatakis chʼamachasiskakim.

Bautisasiñ munäta ukhajja, coordinador del cuerpo de ancianos jilataruw yatiyañama. Bautisasiñatakejj wakichtʼatäjjtati janicha uk amuyañatakejja, ancianonakaw akjjar uñstki uka jisktʼanak jumamp uñakipapjjani. Ukatakejj jichhatpachwa Bibliat sapaki yatjjatkasajj uka jisktʼanak uñakiptʼasma.

Jisktʼanakar qhanañchañatak wakichtʼaskasajja, taqpach textonakwa liytʼañama, amuykiptʼañamarakiwa. Yatjjatkasajja kuntï qellqtʼasiñ munkta ukanak qellqtʼasismawa. Ancianonakamp parlkäta ukhajja, qellqtʼasiwaykta uka notanaksa aka librsa uñjjattʼasiskasmawa. Mä jisktʼa jan sum amuykäta ukhajja, yatichirimaru jan ukajj mä ancianoruw jisktʼasisma.

Pachpa arunakamampiw jisktʼanakar qhanañchtʼañama. Wal parlañat sipansa, mä qhawqha arunakamp qhanañchañaw jukʼamp askejja. Jisktʼanakar qhanañchkasajja, maya jan ukajj pä textonakampiw yanaptʼayasirakisma.

Ancianonakatï Biblian yatichäwinakapat yatjjataskakiñam amuyapjjani ukhajja, jumar jukʼamp yanaptʼasiñapatakiw amtapjjani. Ukaw Diosan Arup sum amuyañatakisa yaqhanakar uka toqet parlañatakis yanaptʼätam, ukhamat qhepat bautisasiñamataki.

[Ancianonakataki: Bautisasiñ munirinakampejj kunjamsa tantachasipjjasma ukajj 208-212 paginanakanwa qhanañchasi].