¡Mä wawanëjjapjjänwa!

Abrahanampi Sarampejj walja maranakaw casaratäjjapjjäna. Ur markankir suma utap jaytanisajj carpanakanwa jakjjapjjäna, Sarajj janiw ukat quejaskänti, kunattejj Diosaruw confiyäna.

Sarajj wawanïñ wal munäna, ukatwa Abrahanar akham säna: ‘Agar servirijamp wawanïpjjam, uka wawajj wawajäkaspas ukhamäniwa’ sasa. Tiempompejja, Agar warmejj yoqall wawanïnwa, juparojj Ismael sasaw sutiyapjjäna.

Walja maranak qhepatjja kimsa jaqenakaw Abrahanar visittʼapjjäna. Ukhajj Abrahanajj 99 maranïnwa Sarasti 89 maranirakïnwa. Uka jaqenakarojja, ‘aka qoqa jakʼan samartʼapjjam, manqʼasiñatakis quedasipjjam’ sasaw Abrahanajj säna. ¿Uka jaqenakajj khitinakänsa uk yattati? Angelanakäpjjänwa. Jupanakajj akham sasaw Abrahanar sapjjäna: ‘Akat mä mararojja, Sarampejj mä wawanïpjjätawa’ sasa. Sarajj carpa manqhat uk istʼasajj chuymapan akham sasaw larusïna: ‘¿Cheqapunit nayajj aka edadar wawanïristjja?’ sasa.

Mä maratjja, cheqapuniw kunjamtï Diosan angelapajj siskäna ukarjam Sarajj wawanïna. Abrahanajj Isaac sasaw uka wawar sutiyäna, uka sutejj “larusiña” sañ muni.

Isaacajj mä phesqa maranëjjäna ukhajja, Ismaelarojj Isaacat burlasiskatapwa Sarajj uñjäna. Wawapar jarkʼaqañ laykuw Abrahanar akham säna: ‘Agar warmirusa Ismael wawaparus akat alisnukjjam’ sasa. Abrahanajj janiw munkänti. Ukampis Jehová Diosajj Isaacar jan walinakat jarkʼaqañ munarakïnwa, ukatwa Abrahanar akham säna: ‘Kuntï Sarajj sisktam ukar istʼam. Nayaw Ismaelar uñjaskäjja. Promesanakajajj Isaac wawam taypiw phoqasini’ sasa.