Diosar confiyatapaw yantʼasïna

Jehová Diosar munasiñapataki, taqe promesanakapar confiyañapatakiw Abrahanajj Isaac wawapar yatichäna. Isaacajj niya 25 maranëjjäna ukhajja, Jehová Diosajj Abrahanarojj mä chʼama luräw lurañapwa mayïna. ¿Kuns lurañapäna?

Diosajj akham sänwa: ‘Mirä amp suma, Moria sat qollun munat yoqamar sacrificiot loqtita’ sasa. Kunatsa Diosajj ukham mayïna uk janiw Abrahanajj yatkänti, ukhampachas Diosar istʼänwa.

Qhepürojj wali alwatwa Abrahanajj Isaacampi pä servirinakapamp Moria qollur sarapjjäna. Kimsa uruw sarjjapjjäna ukhaw jayat qollunak uñjapjjäna. Abrahanajj servirinakapar jaytasajj Isaacampikiw sacrificio loqtirejj saräna. Abrahanaw cuchillo apäna, Isaacasti lawanakwa nin nakhayañatak apäna. Isaacajj akham sasaw tatapar jisktʼäna: ‘¿Kawkinkarak sacrificiot loqtañatak ovejasti?’ sasa. Abrahanajj akham sarakïnwa: ‘Wawa, Jehová Diosaw churistani’ sasa.

Qollur purisajj mä altar lurapjjäna. Ukatjja Abrahanajj Isaacaruw amparampit kayumpit chinuntäna, altar patjjaruw apjjatarakïna.

Abrahanajj cuchillo aptaskäna ukhamaruw Jehová Diosan angelapajj alajjpachat akham sanïna: ‘¡Abrahán! ¡ Yoqamarojj jan jiwayamti, jan kuns kamachamti! Diosar taqe chuyma confiyatam nayajj yatjjtwa, mä sapa yoqamar sacrificiot churañatakejj janiw jumajj janiw sisktati’ sasa. Ukhamaruw Abrahanajj mä orqo oveja uñjäna, alinakar wajjranakat achuntata. Ukatjja jankʼakiw Isaacar jararäna. Wawap lantejj uka ovejwa sacrificiot loqtäna.

Uka urutwa Abrahanajj amigojawa sasin Jehová Diosajj säna. ¿Kunatsa? Kuna laykutejj Abrahanajj taqe kunanwa Jehová Diosar istʼäna. Kunatsa Diosajj ukham mayïna uk janis amuykchïnjja, jupajj istʼänwa.

Jehová Diosajj wasitampiw Abrahanar akham säna: ‘Nayajj bendisïmawa, wawanakamas waljarakïniwa’ sasa. Uka arunakampejj ‘familiam taypiw walja jaqenakajj bendisitäpjjani’ sasaw Jehová Diosajj saskäna.