¿Khitïnas Job chachajja?

Uz sat lugaranjja, Jehová Diosar adorir mä jaqew jakasïna. Jupajj Job satänwa, wali qamirïnwa, familiapanjja waljanïpjjarakïnwa. Wali suma jaqënwa, pobrenakarusa, viudanakarusa, jan awkini jan taykani wawanakarus wal khuyaptʼayirïna. Ukham suma jaqëtapat ¿janit kuna llakis jupar paskäna?

Job chachajj janis amuyaskchïnjja, Diablow jupar uñchʼukiskäna. Jehová Diosajj Supayar akham sänwa: ‘¿Job servirijar uñjtati? Janiw jupjam jaqejj utjkiti. Jupajj istʼasiri sum sarnaqeri jaqewa’ sasa. Supayajj sarakïnwa: ‘Jumajj jan walinakatwa jupar jarkʼaqta, bendista, oraqenaka uywanak churta, ukatwa istʼtamjja. Taqe ukanak aparjjätajj janiw adorjjätamti’ sasa. Diosasti sarakïnwa: ‘Yantʼañ munstajj yantʼaskakim, ukampis janiw jiwayätati’ sasa. ¿Kunatsa Jehová Diosajj Supayampi yantʼaypachäna uk yattati? Jehová Diosajja ‘Job chachajj janiw nayat jitheqtkaniti’ sasaw confiyäna.

Supayajj kunayman jan walinakampiw Job chachar yantʼäna. Nayraqatjja sabeo jaqenakampiw vacanakapa, asnonakap lunthatayäna. Ovejanakapsa ninaw nakhantäna. Caldeo jaqenakarakiw camellonakap lunthatapjjäna. Uywanakap uñjirinakarus jiwayapjjänwa. Ukatsti yaqha jukʼamp jan waliw pasäna: wawanakapajj manqʼasipkäna ukhaw utajj alljjattasin taqenir jiwarayäna. Job chachajj wali llakitapunïnwa, ukhampachas Jehová Diosar adoraskakïnwa.

Job chachajj jukʼamp sufrispa ukwa Supayajj munäna, ukatwa cuerppachar llaganak sartayäna. Ukajj wal cuerpop usuyäna. Taqe uka jan walinakajj kunatsa pasäna uk janiw jupajj yatkänti, ukhampachas Jehová Diosar adoraskakïnwa. Diosajj uk uñjaskänwa, ukatwa Job chachan aguantatap uñjasajj wal kusisïna.

Ukatjja Supayajj kimsa jaqeruw Job chachar yantʼañatak khitäna. Job chachar akham sapjjänwa: ‘Jumajj juchachaspachätawa, uk imtʼañwa munarakpachätajja. Ukatwa Diosajj castigtamjja’ sasa. Jupajj sarakïnwa: ‘Nayajj janiw kuna jan walsa lurkti’ sasa. Ukampis qhepatjja akham amuyjjäna: ‘Diosaw aka jan walinak apayanitu, jupajj janiw cheqapar uñjkituti’ sasa.

Kuntï sapkäna ukjja, Elihú sat mä waynaw amuk istʼaskäna. Ukampis qhepat akham sasaw jupanakar säna: ‘Jumanakajj pantjasipjjtawa. Jehová Diosajj amuyktan ukat sipansa wali jachʼawa, jupajj janipuniw kuna jan walsa lurkaspati. Diosajj taqe kun uñjaniski, jan walinakan uñjasipki uka jaqenakarus yanaptʼarakiwa’ sasa.

Jehová Diosajj Job chachar akham sarakïnwa: ‘¿Alajjpachampi oraqempi nayajj lurkayäta ukhajja, jumajj kawkinkayätasa? ¿Kunatsa janis cheqapar uñjkirisma ukham amuyta? Jan walinakajj kunatsa pasi uk jan yatisaw parltajja’ sasa. Job chachasti sarakïnwa: ‘Pantjastwa, perdontʼita. Nayajj jumat istʼakiyätwa, jichhajj cheqapuniw uñtʼjjsma, jumatakejj janiw kunas chʼamäkiti’ sasa.

Yantʼanakajj tukusjjäna ukhajja, Jehová Diosaw Job chachar qolljjäna, kunatï nayrajj utjkäna ukanakat sipansa jukʼamp churjjäna. Job chachajj kusisitaw jaya tiempo jakäna. Chʼamäkchïnsa taqe chuymaw istʼäna, ukatwa Diosajj bendisïna. ¿Jumasti, Job chachjamarakit jan walin uñjaskasas Jehová Diosar serviskakïta?