Gedeonajj madianitanakaruw atipji

Tiempompejja, israelitanakajj Jehová Diosar apanukusajj wasitatwa falso diosanakar adorjjapjjäna. Madianitanakajj paqallqo maranakaw israelitanakar uywanakap lunthatapjjäna, yapunakapsa qʼal tukjapjjarakïna. Ukatwa israelitanakajj qollunakaru qollu pʼiyanakar imantasipjjäna. Jehová Diosaruw yanaptʼa mayisipjjarakïna. Diosasti mä angelaruw khitanïna, Gedeón waynar akham sañapataki: ‘Jehová Diosaw ajllistam, jumajj chʼamani soldadoyätawa’ sasa. Gedeonajj sarakïnwa: ‘Janiw nayajj khitïktsa, ¿kunjamarak Israel markar salvästi?’ sasa.

Gedeonajj Jehová Diosan ajllitapati janicha uk yatiñwa munäna. ¿Ukatakejj kuns luräna? Oraqer tʼarwa uchasaw Diosar akham säna: ‘Qharür alwatï tʼarwajj sullantani, ukampis oraqejj wañakïskani ukhajja, israelitanakar salvañataki nayar ajllitamwa yatëjja’ sasa. Qhepürojj cheqapuniw tʼarwajj chʼaranäna, ukampis oraqejj wañakïskänwa. Gedeonajj mayampwa Diosar akham säna: ‘Qharüru alwajj oraqejj sullantatäpan, ukampis tʼarwajj wañakïskpan’ sasa. Uka mayitapajj wasitatwa phoqasïna. Ukhamatwa Diosajj jupar ajllitap yatjjäna. Ukatwa madianitanakamp nuwasiñatak soldadonak tantachthapïna.

Jehová Diosajj Gedeonar akham sänwa: ‘Atipapjjañapatakejj nayaw israelitanakar yanaptʼäjja. Ukampis walja soldadöpjjatap laykojja, kapasakiw chʼamanakapampis atipapkaspa ukham amuyapjjaspa. Jan ukhamäñapatakejj ajjsarir soldadonakarojj utanakapar khitjjam’ sasa. Ukatwa 22.000 soldadonakajj sarjjapjjäna, 10.000 soldadonakakiw quedasipjjäna. Diosajj Gedeonar saskakïnwa: ‘Soldadonakajj waljäsipkakiwa. Jawirar irpam, ukan um umtʼapjjpan. Kawkïr soldadonakatï enemigojj jutiti janicha uk uñchʼukis umtʼapki ukanakaruw ajllïta’ sasa. 300 soldadonakakiw ukham umtʼapjjäna. Diosajja ‘uka 300 soldadonakakiw 135.000 madianit soldadonakar atipapjjani’ sasaw säna.

Uka arumajja Jehová Diosajj Gedeonar akham sänwa: ‘Madianitanakampi nuwasir sarañatakejj horasäjjewa’ sasa. Gedeonajj pututunakampi, ñeqʼet lurat jachʼa jarranakampwa soldadonakar churäna, uka jarranak manqhanjja antorchanakaw utjäna. Ukatsti sarakïnwa: ‘Nayaruw uñtanipjjetäta, kuntï nayajj lurkäjja ukwa lurapjjarakïta’ sasa. Gedeonajj pututup tuktʼasïna, jarrap pʼakjarakïna, antorchapsti maysat maysaruw aytäna, akham sasa: ‘¡Nuwasiñajj Jehová Diosankiwa, Gedeonankarakiwa!’ sasa. Gedeonan 300 soldadonakapajj ukham lurapjjarakïna. Madianitanakajj wal sustjasipjjäna, loqher uñtataw uksar aksar tʼijnaqapjjäna. Ukatjja jupanakkamaw nuwarasipjjäna. Ukhamatwa Diosajj israelitanakarojj enemigonakapar atipjañ yanaptʼäna.