Anajj wawanïñatakiw Jehová Diosar orasi

Elcaná sat mä israelitajj pä warminïnwa. Maynejj Ana satänwa, maynisti Peniná satarakïnwa. Elcaná chachajj Anaruw jukʼamp munasïna. Peniná warmejj walja wawanakanïnwa. Anajj janiw mä wawanïkänsa. Ukatwa Peniná warmejj jupar wal jiskʼachäna. Elcaná chachajj sapa maraw familiaparojj Siló markar irpirïna, Jehová Diosar tabernaculon adorañataki. Mä kutejja, uka markankasipkäna ukhaw Ana esposapan wali llakitätap Elcaná chachajj amuyäna, ukatwa akham säna: ‘Ana, mirä amp suma, jan jachjjamti. Nayaw jumampïskta, wal jumar munassma’ sasa.

Qhepatjja, Anajj sapakiw orasir saräna. Jehová Diosarojj jachtʼasisaw yanaptʼa mayisïna. Akham sasaw Diosar mä promesa luräna: ‘Jehová Dios, mä wawa churitäta ukhajja, jumaruw churäma ukhamat sapüru jumar serviñapataki’ sasa.

Anajj wal jachaskäna, lakapas wal unoqtʼäna, janirakiw arupajj istʼaskänti. Ukatwa Elí sacerdotejj umatäpachaw sasin Anat amuyäna. Ukatwa Anajj akham säna: ‘Tata janiw umatäkti. Jehová Diosaruw mä jachʼa llakijat parlaskta’ sasa. Elí sacerdotejj pantjasitap amuyasajj akham sasaw Anar säna: ‘Kuntï Diosar maykta uk jumar churpan’ sasa. Ukatjja Anajj janiw sint llakisjjänti, uka lugaratsa sarjjarakïnwa. Janïraw mä maras paskänti ukhaw wawapajj nasjjäna, Samuel sasaw sutiyarakïna. ¿Anajj kunja kusisitäpachänsa uk amuytati?

Anajj Diosar mä promesa luratap janiw armkänti. Samuelur ñuñut tʼaqjjäna ukhajja, tabernaculoruw apjjäna, ukan Diosar serviñapataki. Anajj Elí sacerdoter akham sänwa: ‘Jehová Diosaruw aka wawa mayista, jichhajj jiwañapkam jupar serviñapatakiw churjjta’ sasa. Elcaná chachampi Anampejj sapa maraw Samuel wawapar visitir sarapjjerïna, jan mangani mä suma isi regalot aparapipjjerïna. Tiempompejj Jehová Diosajj phesqa wawampwa Anar churäna, kimsa yoqallampi pä imillampi.