Jehová Diosaw Sansonar chʼam churäna

Israelitanakat waljaniw idolonakar mayamp adorjjapjjäna. Ukatwa Jehová Diosajj israelitanakar Filistea markankir jaqenakan amparapar jaytäna. Ukampis yaqhep israelitanakajj taqe chuymaw Jehová Diosar munasipjjäna, jupanakat maynejj Manóah satänwa. Jupampi esposapampejj janiw wawanïpkänti. Mä urojja Jehová Diosajj mä angelaruw khitäna, Manóah chachan esposapar akham sañapataki: ‘Mä wawanïyätawa, jupaw filisteonakan amparapat israelitanakar salvani. Nazareo jaqerakïniwa’ sasa. ¿Khitinakas nazareo satäpjjäna uk yattati? Nazareonakajj Jehová Diosar serviñatak ajllitänwa, janipuniw ñikʼutanakap khuchurasipjjañapäkänti.

Tiempompejja Manóah chachan wawapajj nasjjänwa, Sansón sasaw sutiyarakïna. Jachʼäjjäna ukhajja, Jehová Diosaw chʼam churäna. ¡Amparampikiw leonarus jiwayirïna! Mä kutejja, sapapakiw 30 filisteo jaqenakar jiwarayäna. Ukatwa filisteonakajj wal uñisipjjäna, jiwayañ munapjjarakïna. Mä arumajja, Sansonajj Gaza sat markanwa ikiskäna. Enemigonakapajj markan punkupanwa suytʼapjjäna, alwaw jiwayañ munapjjarakïna. Ukampis Sansonajj chika arumaw sartäna, markan punkupar sarasasti uka jachʼa punkup liwsüna. Uka punkus qʼeptʼataw Hebrón marka jakʼankir mä qollur makatarakïna.

Ukatsti Sansonan Dalila noviapampi parliriw filisteonakajj sarapjjäna, akham sapjjarakïnwa: ‘Kunatsa Sansonajj wali chʼamani uk yatiyapjjetäta ukhajja, walja qollqe churapjjäma. Sansonar katuntas carcelar llawintañwa munapjjta’ sasa. Dalilajj wal qollq munäna, ukatwa iyaw säna. Qalltanjja Sansonajj janiw kunatsa chʼamanïna uk Dalilar yatiyañ munkänti. Ukampis sapa kuti jiskhitap laykuw Sansonajj qarjjäna, ukatwa akham sasin yatiyäna: ‘Nayajj nazareo jaqëtwa, janipuniw ñikʼutaj khuchurayasirïkti. Ñikʼutaj khuchurapjjetaspa ukhajj janiw chʼamanëjjeristti’ sasa. Sansonan Dalilar ukham yatiyatapajj janipuniw walïkänti.

Dalilajj jankʼakiw filisteonakar akham säna: ‘¡Kunatsa wali chʼamani uk yatjjtwa!’ sasa. Dalilajj jarphiparuw Sansonar ikjayäna, ukatsti maynimpiw ñikʼutap khuchurayäna. Dalilajj akham sasaw artʼasirakïna: ‘¡Sansón, filisteonakaw akankapjje!’ sasa. Sarthapïna ukhasti, janiw chʼamanëjjänti. Filisteonakajj katuntasaw juykhuptayapjjäna, carcelaruw llawintapjjarakïna.

Mä urojja waranq waranqa filisteonakaw Dagón sat diosapan templopan tantachasipjjäna. Akham sasaw arnaqasipjjarakïna: ‘Sansonarojj diosasaw amparasar katuyistu. Sansonar irpsunipjjam, jupat larusiñataki’ sasa. Pä columnanak taypiruw Sansonar saytʼayapjjäna, wal jupat burlasipjjarakïna. Sansonajj jachʼatwa akham säna: ‘Jehová Dios Tata, mirä amp suma, jichha mä kutimpi chʼam churakitaya’ sasa. Ñikʼutapajj jachʼanakäjjänwa, taqpach chʼamapampiw templon columnanakap nuktʼäna. Ukhamatwa templojj allthaptäna, taqeniw uka manqhankirinakajj jiwarapjjäna, Sansonas ukanwa jiwjjarakïna.