Jehová Diosaw Jehosafat reyir enemigonakapat jarkʼaqäna

Jehosafatajj Judá tribun reyipänwa, jupaw Baal diosan altaranakapsa, uka markan utjkäna uka idolonaksa tʼunjäna. Jaqenakajj Jehová Diosan leyinakap yatipjjaspa ukwa munäna. Ukatwa markan principenakapampiru levitanakampirojj Judá markpachar khitäna, ukhamat Jehová Diosan leyinakap yatichapjjañapataki.

Jehová Diosajj wal Judá markar yanapäna, ukatwa uka jakʼankir markanakajj jupanakamp nuwasiñ ajjsarapjjäna. Jehosafat reyitakejj regalonak apapjjerïna. Ukampis Ammón, Moab markanakasa, Seír toqenkir markanakasa, Judá markamp nuwasiriw jutapjjäna. Jehosafat reyejj Jehová Diosan yanaptʼap wakisitapwa amuyäna. Ukatwa taqpach chachanakaru warminakaru wawanakar Jerusalenar tantachthapïna. Jupanak nayraqatanwa akham mayisïna: ‘Jehová Dios, jan yanaptʼapkitasmajj janiw atipapkiristti. Mirä amp suma, kun lurañas wakisi uk sapjjakitaya’ sasa.

Jehová Diosajja Jehosafat reyir istʼänwa ukat akham sänwa: ‘Jan ajjsarapjjamti, nayaw yanaptʼapjjäma. Lugaranakamar saytʼasipjjam, jan kuns lurapjjamti, kunjamsa nayajj salvapjjäma uk uñjapjjarakim’ sasa. ¿Kunjamsa Jehová Diosajj salvaspäna?

Qhepür alwajja, Jehosafat reyejj cantirinakwa ajllïna, soldadonak nayra sarapjjañapwa mayirakïna. Jerusalenat mistusajj nuwasiñ lugararuw sarapjjäna, ukajj Tecoa sat lugarankänwa.

Cantirinakajj wali kusisitaw jachʼat Jehová Diosar alabanzanak cantapjjäna. Ukañkamajj Jehová Diosaw markap laykojj nuwasïna. Ammonitanakampiru moabitanakampirojj pantjayänwa, ukatwa jupanakkam nuwarasisajj taqen jiwarapjjäna. Jehová Diosaw Judá markankir jaqenakarusa, soldadonakarusa, sacerdotenakarus jarkʼaqäna. Uka jakʼankir markanakajj taqeniw kuntï Diosajj lurkäna uk yatipjjäna. Ukhamatwa Jehová Diosajj markapar yanapaskakitap yatipjjäna. ¿Kunjamsa Diosajj markapar salvi? Kunaymanitwa yanaptʼi. Ukham lurañatakejj janiw jaqenakan yanaptʼap necesitkiti.